Salmo 72
72
I dasal gablà di tingà i harì
Ani satu salmo Solomon
1 E Dwata, banlém i harì kfulung mukum fagu di kaglut,
na banlém i tingà i harì tmadol kenen i ge katlu,
2 du fye keben dad tom too matlu,
na i kukuman dad mdanà to fagu di kaglut.
3 Balù dad bulul gumule i dad tom nun bong ulê kadang i fulela déén,
du mdà di matlu kagotan.
4 Nsenan i kaglut i dad to landè knun,
na falwaan dad to landè tmabeng dale di agot dad mkut dale,
na toon fnisan dad mkut i dademela to.
5 Na là tlag i kagotan di klo nun duh fa na bulen,
na di klo i nun to di tah tanà.
6 I ktabeng i kagotan salngad di ktabeng i ulen tatek di dad fule,
na i tlitik tatek di tanà.
7 Too matnù i katlu i dad to di klo i kagotan,
na too nun ktanak i banwe landè gutlagan.
8 Magot kenen i klamang banwe mdà di satu mahin kel ditù di satu mahin,
mdà di bong yéél Yufratis kel ditù di klamang banwe.
9 I dad to dmuen kenen, lkuad fdanà di kenen kadang,
na lamfan di tanà di munan.
10 Dad harì di banwe Ésfanya na di dademe banwe di kilil i mahin mlé di kenen kadang,
na kel di dad harì di banwe Arabya na Itiyofya mlé di kenen.
11 Kdee harì lkuad kadang di munan,
na kdee sahal dad to mimen i knayean;
12 du di kenen kagot kadang, falwaan i dad to landè di kalimala,
na i dad to too nun kanlidù, na i kdee to landè tmabeng dale,
ku ftabeng ale di kenen.
13 I dad to mlungay na dad to mdanà kandon,
na falwaan i dad to landè tmabeng dale di fati.
14 Hae, falwaan ale mdà di kabkut na kafsasè i dademe to dale,
du too mabtas i nawala di kenen.
15 Too mlawil moon i harì! Na mablé kenen kadang i blawen mdà di banwe Arabya.
Na nun moon dad to fadlug dmasal kenen du fye mablé kenen kafye mdà di ge, Dwata, di klit duh.
16 Tilub moon dad fule i tanà, na lamwek balù kel déén di tah i dad bulul,
na too nun ulê i dad fule salngad di banwe Lébanon,
na fnò i dad to i dad syudad salngad di bnas tmabò di nligo.
17 Nang moon nlifet i dagit i harì kel di landè sen,
i kdengegan too fadlug klo i nun duh.
Mdà di kenen mablé dad to kafye,
na dad to di kdee sahal banwe dmayen kenen!
18 Dnayenito Amuito Dwata, i Dwata gusmalig i bel Israél,
du alò kenen gmagan mimò dad gamtikeng nimò ani!
19 Magdayen i kdatah dagitan kel di landè sen,
na i kdee to di klamang banwe dmilè moon i kbong kdatahan. Amén! Amén!
20 Ani gusen i dad dasal Harì Dabid, i tingà Dyési.