Salmo 65
65
Dad gamtikeng nimò Dwata
I lingag ani satu lingag Dabid.
1 E Dwata, gablà moon ku dnayenmi ge déén di banwem Sion,
na dnohòmi i dad fakangmi di ge;
2 du ge i tmimel dad dasal,
taman ge gufdadong dad to di klamang banwe du nun salàla.
3 Di kagfisanmi di salàmi,
nlifetam sa.
4 Too nun kafye di gami i dad to tanalékam na fdadongam
du fneam di gustifun dad to mangamfù di ge!
Na i too gafnò nawami i kdee kafye di Bong Gumneam.
5 E Dwata, ge i falwà gami,
na fagu di too gamtikeng nimoam tnimelam i dasalmi na falwaam gami;
na i kdee to di klamang banwe na balù dad to di talà mahin,
landè dademe gusmaligla.
6 Tafitem i kbong ktulusam fagu di kagafdakam dad bulul di gufneam dale;
na fagu di enegam tatangalam ale.
7 Ge fafanak i uni dad mahin,
i luk i dad malbang lwek,
na ksugak i dad to.
8 Na taman too tikeng dad to di klamang banwe di gamtikeng mgimoam;
mkit i dad to mdà di dad banwe di gusut i duh kel di gusdafan di klehewla.
9 Fitem i kafdufam i tanà fagu di kfebem i ulen na di kfabuam i tanà;
na fananoam yéél i dad sbang na blém i ulê i dad fule fagu di gamtikeng nimoam.
10 Hae, banlém ulen i dad dnaru du fye too gsab i yéél di tanà;
fatlitikam, du fye flumak i tanà na ftaboam i dad fule déén.
11 Na mdà di bong kafyem too munge i dad fule,
na landè gukulang balù nè gusalum.
12 Balù i sasè tanà là fakay gumule fanbalingam i too fye gumteb du fnulenam;
na salngad i dad bulul, too nun tmabò déén.
13 Dad gumteb fnò i dad bilibili na dad datal fnò i dad fule;
na kdee mkit na mlingag di klehewla.