1 Chi ma zë reeman gajxh Jerusalén, niz lod rigaꞌ guiedx Betfagé con Betania, gajxh guiaꞌ la Olivos, dxel guxhaal Jesús tioꞌp ree xbejnman, 2 rëbaman:

―Gol chej guiedxdo rigaꞌ delant guin. Chi guidxindi guidxaaglojdi tijb burquieꞌn, caduub achut wabib laab. Gol guxhiequib gol tanëb. 3 Abiꞌ bal chu guiniabdiidx lojdi: “Chexc zeel caxhiequidi laab”, gol güjdx: “Dad Jesús cayaadx laab, doo yaxhaal gajcaman laab.”

4 Dxel wej reeman, bidxaagloj gajc reeman burdo guin, caduub runejz roꞌ tijb port, abiꞌ guxhiec reeman laab.

5 Bén baguiaa ree zian gunabdiidx reeman loj reeman, rëb reeman:

―¿Xhie rüjndi? ¿Chexc zeel caxhiequidi burdo guin?

6 Badxiꞌ reeman laan ziꞌc rëb Jesús, abiꞌ cwëjb ree bén guin zinë reeman laab. 7 Bidxinnë reeman laab lojman, badxiib xab reeman xijchib, persi gudxibaman laab. 8 Zien ree bejn riguijxh xab niz lod rdëdaman, yuꞌ tëë reeman rutüüg zijn persi rguijxh reeman laan niz lod rdëdaman.

9 Abiꞌ ziꞌc ree bén ned, në ree bén nal rbixdiaj reeman, rëb reeman:

―¡Gagnëman dunuj ree yan! ¡Nagleꞌ bén zëëd por Dios! 10 ¡Nagleꞌ bén zëëd nabee ziꞌc dux béngulal ree rey Davi! ¡Quixtëë dux Dad ree Dios Bén yuꞌ xanyabaa!

11 Zian guyu Jesús Jerusalén abiꞌ guyuman lën yadooroꞌ Jerusalén. Chi gulox baguiaaman graczi, dxel zinë guidxiptioꞌp ree xbejnman Betania guial ma gudxe.

12 Chi bareguiaal, barii reeman Betania. Dxel guzuloj calaan Jesús. 13 Zijtri baguiaaman tijb yag higo ca ree balag lojn. Abiꞌ wejman biquiaaman bal ca higo lojn. Per achet bidxaaglojman, balagzi ree ca lojn din ad xtiamptanan. 14 Dxel rëbaman loj yag higo guin:

―¡Ad yuꞌtri dxej gaw bejn ninejxh tia lojl!

Abiꞌ biguiejn ree xbejnman ni rëbaman.

15 Chi bidxin reeman Jerusalén. Dxel guyu Jesús roꞌ yadooroꞌ Jerusalén guin, abiꞌ guzuloj caybëëman bén cutoꞌ ree në ree bén cazii. Barexguiataman xmex ree bén ruchaa milia con xyagxhil ree bén rutoꞌ ree palom, 16 ad rtiëjbtaman xhie chuꞌnë ree bejn roꞌ yadoo guin. 17 Abiꞌ guzuloj culüüman laa reeman, rëbaman:

―Loj xtiidx Dios rëb: “Lidxan grii laj yu lod rbejdx rniab bejn Dios.” Per lëjt nüjndan ziꞌc lidx ree xingubaan.

18 Bixhioz rniabee ree bixhioz con ree mextr rajc ley, chi biguiejn reeman ni rëb Jesús, guzuloj raguiil reeman mod xhienaag gugüjt reeman Jesús, guial rdxeb reeman laaman din gra bejn radxaloj ni rulüüman. 19 Chi ma caxhin, bazanë ree xbejn Jesús Jerusalén.

20 Chi bareguiaal rsildoo, badëd reeman niz lod zojb yag higo guin, abiꞌ baguiaa reeman ma gubidx diizd liujn. 21 Dxel basaaladx Bëd ni rëb Jesús, abiꞌ rëbaman lojman:

―Mextr, ¡baguiaa yag higo ni bazaalil diidx guijc ma gubidxan!

22 Badxiꞌ Jesúsan rëbaman:

―Gol bililadx Dios. 23 Din diidxliczi ganin, bal chu guiëb loj guiaꞌ guin: “Bisüd guie biajb loj nijsdoo”, bal id yuꞌ nawëëg luxdooman, bal rliladxaman, gac ni guneeman. Zian gacan. 24 Zeel rnin lojdi, gra ni rniabidi loj Dios, gol bililadx guial ma cwaꞌdi laan, abiꞌ zacaꞌdan. 25 Guiáad chi ribejdx rniabidi Dios, bal yuꞌ bén rdxeꞌchidi, gol beenman perdon din ziangajc xDadidi bén yuꞌ xanyabaa güünman perdon xtolidi. 26 Din bal id züjndi perdon, ziangajc xDadidi Bén yuꞌ xanyabaa ad züjntaman perdon xtolidi.

27 Chi badxin reeman Jerusalén. Chi caza Jesús niz lën yadooroꞌ Jerusalén guin, dxel gubig bixhioz rniabee ree bixhioz con ree mextr rajc ley con ree xguxtis ree bén Israel, 28 gunabdiidx reeman loj Jesús, rëb reeman:

―¿Xhie guialrniabee rajpil zeel rüjnl ni guin ree? ¿Chu banee guialrniabee lojl güünl zian?

29 Badxiꞌ Jesúsan rëbaman:

―Ziangajc naj yuꞌ ni ganabdiidxan lojdi, bal yadxiꞌdan dxel ganin chu banee guialrniabee günan ni guin ree. 30 ¿Chu guxhaal Waj bidgaroobnijsaman bejn ree? ¿Dios ya o bénguidxliuj? Gol badxiꞌn.

31 Dxel guzuloj rëb loj lasaꞌ reeman:

―Bal yaguieꞌch ree, Dios guxhaal laaman, zanaman: “¿Chexquiza zeel ad bililadxtidi laaman?” 32 Ad zajc tëët yaguieꞌch ree, bénguidxliuj guxhaal laaman.

Rëb reeman zian guial rdxeb reeman bejn ree, din graczi reeman rliladx guial gojc Waj tijb bén badëë xtiidx Dios loj ree bejn, bén wali gunee xtiidx Dios. 33 Abiꞌ badxiꞌ reeman laan rëb reeman:

―Ad rayagbeetan.

Zeel rëb Jesús loj reeman:

―Niꞌqui naj ad zanitan lojdi chu banee guialrniabee günan ni guin ree.