Xtiidxzaꞌc Jesucrist ni bacaa San Lujc
1
Rxhiaal Lujc guiꞌch loj Teófilo
1 Zien ree bén ma been naguiejn gucaa ni goc con dunuj ree, 2 ziꞌcgajczi balüü ree bejn dunuj ree, bén baguiaa ree diizd guiaꞌxchej ni been Jesús në ni guzacaman, gutieꞌch tëë reeman xtiidxaman. 3 Naj baguilxnejzchaaw diizd guiaꞌxchejn, dad Teófilo, zeel naladxan zagdxen gucanan xnejz par lüj, 4 din chigniaꞌl zagdxe diidxli balüü reeman lüj.
Rugojn tijb anjl gal Waj
5 Tiamp gunabee rey Herodes guidib niz Judea, guyu tijb bixhioz brii laj Zacarías, bachajgaman tib cwaa ree bixhioz brii laj xbejn Abías. Xbéngunaa Zacarías brii laj Elisabet, zaman loj xdiaa bixhioz brii laj Aarón. 6 Grop reeman gubajn xnejz loj Dios bazoob tëë reeman diidx graczi ni rniabee Dios, abiꞌ achut rileꞌ guiëb guial rajp reeman dol. 7 Per achut xiꞌn reeman guyu guial ad gojct niu xiꞌn Elisabet, grop reeman ma na̱j bengol.
8 Tijb dxej ni bayal ree bixhioz noꞌch Zacarías loj, been reeman sirv loj Dios, 9 ziꞌc na̱j xcostumbr ree bixhioz guin, gudxijt reeman suert din guidoon chu yayal gudxeꞌ goxyaal lën yadooroꞌ Jerusalén, abiꞌ bayal Zacarías cuꞌman goxyaal guin. 10 Laꞌtgaj caguꞌman goxyaal guin, gra ree bejn rigaꞌ luleꞌ cabejdx canab reeman Dios. 11 Dxel balüüloj tijb xianjl Dios loj Zacarías, zaꞌliman xladbee altar lod cayu goxyaal guin. 12 Chi baguiaa Zacarías anjl guin, ad badxejlt xhie nüjnman, dád bidxebaman. 13 Per rëb anjl guin:
―Zacarías, ad rdxebil ma bacaagdiajg Dios ni gunabil. Chuꞌ xiꞌn xbéngunaal Elisabet, gaquix xinguiaaw abiꞌ yaguꞌl lajx Waj. 14 Yabaa daꞌtil, në zien ree bejn yabaa chi galix, 15 guial gaquix xin lasajc loj Dios. Ad zëꞌtix vin niꞌqui ni gusüdx laax. Abiꞌ diizd chi gadix gal mal zaꞌnë xSprijt Dios laax. 16 Por laax zien ree bén Israel yayejc loj xDad reeman Dios. 17 Laax ned lojman, chuꞌ xSprijt Dios luxdoox gap tëëx guialrniabee ziꞌc Elías, bén badëë xtiidx Dios loj ree bejn, yabeꞌcdxex bén na̱j ree dad con xiꞌn reeman, gulüü tëëx bén ad ruzoobt ree diidx din guzuxnejzix bejn ree guidxgaꞌ reeman laaman chi guiꞌtaman.
18 Dxel rëb Zacarías loj anjl guin:
―¿Xhienaag gagbeen guial gac cumplid ni nal? Din naj con da béngunaan ma nayajcan bengol.
19 Badxiꞌ anjl guinan rëbaman:
―Naj na̱j Gabriel, rünan sirv loj Dios, laaman guxhaal naj zidnëꞌn diidxzaꞌc guie lojl. 20 Per yan guial ad bililadxtil da diidxan, yayaꞌnl gop ad zajct guinieel xt guidxin dxej gal xindo guin.
21 Guiáad ree ben rigaꞌ luleꞌ guin cabëz reeman Zacarías yuꞌ nawëëg reeman guial cayaglaaman lën yadoo guin. 22 Chi bariiman ad rajctri rnieeman, gaz sen rüjnman guial ma bayaꞌnman gop. Dxel gogbee reeman guial yuꞌ xhie baguiaaman lën yadoo guin.
23 Zianz bazaꞌ ree dxej ni been Zacarías sirv lën yadoo guin, dxel zia lidxaman. 24 Chi gudëd ree dxej guin, guyu xiꞌn xbéngunaaman Elisabet. Gaay bëëw tib guyuzaman lënü, rëbaman: 25 “Ze na̱j ni beennë Dios naj lën ree dxej guie chitëë guzeꞌri ree bejn naj.”
Rugojn tijb anjl Li gal Jesús
26 Ni goc xhoꞌp bëëw, guxhaal Dios anjl la Gabriel luguiedx Nazaret ni rigaꞌ niz Galilea, 27 din chignajman tijb biinxdüb lam Li. Ma na̱j tiaꞌ tijb xin la Xiëb laam, xin zëëd loj xdiaa rey Davi.
28 Guyu anjl guin lod yuꞌ Li abiꞌ rëbaman:
―¡Xchan Li, Dios ma gulej lüj! Dios zaꞌnë lüj, ma beenleꞌ tëëman lüj loj gra ree béngunaa.
29 Chi baguiaa Li anjl guin dád badxa lojm guial rëbaman zian, abiꞌ gunabdiidxim xhie rën guiëb ree diidx guin. 30 Dxel rëb anjl guin:
―Li, ad rdxebil din lüj gule Dios beenleꞌ tëëman lüj. 31 Chuꞌ xiꞌnl, abiꞌ chi galaman yaguꞌl lajman JESÚS. 32 Laaman gac bén zojbloj, guiniee ree bejn laaman Xiꞌn Dios bén yuꞌ xanyabaa. Güün dux Dad ree Dios laaman rey ziꞌc goc xdiaagulalaman Davi, 33 din nabeeman bén Israel ree xt goctëëz, abiꞌ xguialrniabeeman ad yuꞌt dxej loxan.
34 Dxel rëb Li loj anjl guin:
―¿Xhienaag chuꞌ da xiꞌnan awa achut bénguiaaw nabannëꞌn?
35 Badxiꞌ anjl guinan rëbaman:
―Por xSprijt Dios chuꞌ xiꞌnl, abiꞌ xguialrniabee Dios bén yuꞌ xanyabaa gusiaawan guijquil con xbalan. Zeel xiꞌnl bén gal, gacaman naya nali abiꞌ guiniee ree bejn laaman Xiꞌn Dios. 36 Ziangajc lasaꞌl Elisabet ma yuꞌ xiꞌnman, majsi ma najman bengol, bén rëb ree bejn ad zajct chuꞌ xiꞌn, per yan ma gojc xhoꞌp bëëw yuꞌ xiꞌnman. 37 Din Dios graczi zajc güünman.
38 Dxel rëb Li loj anjl guin:
―Dios na̱j bén rniabee naj, gacza ziꞌc rënman.
Ziat anjl guin.
Rignaj Li Elisabet
39 Lën ree dxej guin wej Li cari daꞌt tijb guiedx ni rigaꞌ la̱d ree guiaꞌ niz Judea, 40 dxel guyum lënü lidx Zacarías, bagajpdiozim Elisabet. 41 Chi biguiejn Elisabet chaꞌm cugajpdiozim laaman, laa baniib gajc xindobëz yuꞌ lënman, dxel guyu xSprijt Dios luxdooman guidiblagaa. 42 Abiꞌ gunee Elisabet rejs, rëbaman:
―¡Dios ma beenleꞌ lüj loj gra ree béngunaa, beenleꞌ tëëman bejndobëz yuꞌ lënl! 43 ¿Chuza najn zeel zidganaj xniaa da Diosan naj, bén rniabee? 44 Din biguiejnzan chaꞌl bagajpdiozil naj, laa baniib gajc da bindoon lënan guial babaam. 45 Xiquilbaal guial bililadxil, din gac ziꞌc bagojn Dios lüj.
46 Dxel rëb Li:
Ruzatan Dios zagdxe,
47 rabaanëꞌ tëën laaman, guial ragnëman naj.
48 Guial baguiaaman naj, majsi biin rüjnzi sirv lojman naj.
Abiꞌ diizd yan xt goctëëz guzaꞌt ree bejn naj, guiëb reeman xiquilbaam.
49 Din Dios, bén rniabee, dád zroꞌ na̱j ni ma beennëman naj.
Naya naliman.
50 Ad rbëzt rayaman graczi ree bén ruzoob xtiidxaman.
51 Zroꞌ na̱j ni ma beenman con xguialrniabeeman.
Baseꞌnman xixgab ree bén rüjn benroꞌ,
52 biquiedaman guialrniabee loj ree bén rniabee,
guiáad loj ree bén ad zojblojt badëëman guialrniabee loj reeman.
53 Badëëman guialnazaꞌc loj ree bén biaadx guialraw,
guiáad ree benrijcw basaꞌnman laa reeman zezi.
54 Gognëman bén Israel ree, xbejnman,
abiꞌ ad bayanladxtaman nayaman laa reeman,
55 ziꞌc rëbaman loj dux béngulal ree,
Abraham në loj ree xdiaaman.
56 Abiꞌ bayaꞌnnë Li Elisabet cost choon bëëw, dxel baguiaj lidxim.
Rajl Waj
57 Chi bidxin dxej gojl xiꞌn Elisabet najx xinguiaaw. 58 Abiꞌ gogbee ree lasaꞌman në ree bén zojb gajxh guial baya Dios laaman, dád babaa reeman bignaj reeman laaman. 59 Chi ma gojc xindobëz guin toxman, dxel binë reeman laax guyux sen ni ru ree bén Israel. Abiꞌ guyën reeman naguꞌ reeman lajdoox Zacarías ziꞌc la xdadix, 60 per gunee xniaax, rëbaman:
―Ad zayutan zian. Rayal gaquim Waj.
61 Dxel rëb reeman lojman:
―¿Chexquiza zeel gaquix Waj? Achut ree lasaꞌl la zian.
62 Abiꞌ con sen gunabdiidx reeman loj xdad xindobëz guin chu rënman grii lajx. 63 Zianz gunabaman tibliaꞌ tabl abiꞌ bacaaman lojn: “Waj grii lajx.” Dád badxaloj gra ree bén guin. 64 Loj hor ziigajc gojc banee Zacarías, abiꞌ guzuloj cuzaꞌtaman Dios zagdxe. 65 Gra ree bén zojbnëman gajxh dád badxa loj reeman, xt gra ree guiedx rigaꞌ la̱d ree guiaꞌ niz Judea gogbee reeman graczi ni goc. 66 Guiáad graczi ree bén gogbee zian, rniabdiidx loj lasaꞌ reeman, rëb reeman:
―¿Chu gac xindo guin yaꞌn chi niꞌsix?
Rëb reeman zian guial laa rguien gajc ma beenleꞌ Dios laax.
Ni gunee Zacarías
67 Zacarías, bén na̱j xdad xindo guin guyu xSprijt Dios luxdooman guidiblagaa, zianz guzuloj caneeman, rëbaman:
68 Benzaꞌc bendxoon na̱j Dios, dux Dad ree nayajc ree bén Israel,
guial biꞌtaman bidganajman dunuj ree nayajc ree xbejnman, bidgalëë tëëman dunuj ree loj ni cayzaꞌc ree.
69 Guxhaalaman tijb bén rajp guialrniabee din yabëëman dunuj ree loj ni cayzaꞌc ree,
zëëdaman loj xdiaa rey Davi, bén na̱j xbejn Dios.
70 Ziꞌc been Dios promejs diizd gocli, zian gunee ree bén badëë xtiidxaman loj ree bejn, bén guban ree ziꞌc rënman:
71 guial yabëëman dunuj ree loj ree bén ralen dunuj ree, në loj gra ree bén yuꞌxyajn dunuj ree,
72 yaya tëëman dux béngulal ree,
abiꞌ ad zayanladxtaman promejs ni beenman.
73 Ni ne na̱j promejs ni beenman loj dux béngulal ree Abraham:
74 guial yabëëman dunuj ree loj ree bén ralen dunuj ree,
din chileꞌ yaguieen ree sirv lojman sin guialrdxeb,
75 yabajn ree yaguieen tëë ree ziꞌc rënman, guidib tiamp ni yabajn ree.
76 Guiáad lüj xiꞌn, guiniee ree bejn lüj bén rudëë xtiidx Dios loj ree bejn, Dios yuꞌ xanyabaa.
Din nedil chiguieenchaawil xnejz bén na̱j Dad,
77 gulüü tëël xbejnman din gagbee reeman xhienaag gac xtol reeman perdon,
laa tëë reeman loj casti.
78 Guial raya daꞌt dux Dad ree dunuj ree,
zeel guxhaal xiꞌnman, bén na̱j ziꞌc xbachaꞌ gubijdx din gusniman du loj ree,
79 guixhial tëëman xquiarguiejn ree bén zë loj nejzmal, bén ad nabant ree xnejz ziꞌc rën Dios,
gulüü tëëman dunuj ree yadxoo ree loj xnejzaman din yabajn ree zagdxe sin wadijl.
80 Guiáad xindo guin guniꞌsix guyu tëë xquiarguiejnx mazri por Dios. Guzujx loj yujbidx, xt bidxin dxej guneex xtiidx Dios loj ree bén Israel.