1 Leꞌa zha na nsayal gax ujest Pascua, zha ndaw bexa judio pan lá nyoꞌo levadur, 2 leꞌa be uleꞌay nibeꞌe wa no be mech ten ley nkwaꞌan bexa na xteꞌe gut bexa Jesús dub mod lá iniꞌí be men‑a, geal leꞌa bexa nzheb ndoꞌ be men.

3 Leꞌa maxuꞌu cha uyoꞌo len ladoꞌo Judas Iscariot, dub xa nak dub isatibtop be xmen Jesús. 4 Cha ngwaꞌyadiꞌizhno xa be uleꞌay nibeꞌe, no bexa nibeꞌe ten bexa nlaꞌach niꞌi ten Dios, ná xteꞌe yun xa cuent Jesús ndoꞌ yaꞌa bexa wa. 5 Leꞌa bexa wa cha mten ladnabe, ndab bexa leꞌa bexa usaꞌa med ikaꞌa Judas. 6 Leꞌa Judas cha uni lak ndab bexa wa, cha usaxan nkwaꞌan xa xteꞌe yun xa cuent Jesús, dub mod na lá iniꞌí be men ta wa.

7 Leꞌa ngol wizh ndaw bexa judio pan lá nyoꞌo levadur, wizh ndut bexa dub borreg ndaw bexa cuent ten ujest Pascua, 8 leꞌa Jesús cha mtuꞌub Pedr no Juan, ndab xa:

—Waꞌyundeꞌe bega ta gaw beuna ujest Pascua.

9 Leꞌa bexa wa cha unabdiꞌizh ndoꞌ Jesús, ndab bexa:

—¿Pa nlad go gundeꞌe besa ta wa zha?

10 Leꞌa Jesús cha ndab:

—Waꞌ bega gezh Jerusalén baꞌ, leꞌa toꞌo gezh wa izheꞌal bega dub xabgiꞌi noꞌo dub te ncho nits. Cha isankea bega tsoꞌo xa gast len niꞌi sa ilanseaꞌ xa wa. 11 Cha gud bega ndoꞌ xwan niꞌi wa: “Leꞌa mech nabdiꞌizh ná ma len cuart gawno mech be xmen xa ta ten ujest Pascua.” 12 Leꞌa xa wa cha uluu dub cuart siꞌil ndoꞌ bega, ta nde gek niꞌi wa. Leꞌa sa wa listla nde be ta guntiꞌin bega. Cha bindeꞌe bega be ta gaw xcheꞌe beuna sa wa.

13 Weꞌe leꞌa Pedr no Juan cha nchaꞌbe, cha mzhealka bexa men wa, no be ta ndab Jesús wa. Cha mbindeꞌe bexa ta gaw bexa ujest Pascua.

14 Leꞌa ngol gor gaw xcheꞌe bexa, cha usob Jesús ndoꞌ mes no be xmen xa. 15 Cha ndab Jesús:

—Uzhebpa nten lad naꞌ gawnogal naꞌ bega cuent ten ujest Pascua nattsa biseata gat naꞌ. 16 Li ndáp naꞌ ta wa geal leꞌa naꞌ yá naꞌantapa gaw cuent ten ujest ndee, gast gal tiemp inibeꞌe Dios ndoꞌ gizhliyo.

17 Cha usen Jesús dub vas ncho vin ten uv, cha msaꞌa xa xno ndoꞌ Dios, cha ndab xa:

—Itea bego gu ta ndee. 18 Leꞌa naꞌ gáp ndoꞌ bega leꞌa naꞌ yá lá goꞌota vin ten uv gast gal zha ilen tiemp inibeꞌe Dios.

19 Cha liga usen xa pan, cha msaꞌa xa xno ndoꞌ Dios. Cha uleꞌa xa‑yá, msaꞌa xa‑yá ndoꞌ bexa wa, ndab xa:

—Leꞌa pan ndee beꞌal las naꞌ, ta usa naꞌ por bego. Nat isaxan bega gun bega ta ndee, ndontsa lá yalad bega leꞌa naꞌ ngut sakndoꞌ bega.

20 Leꞌa gor na mtayaw xcheꞌe bexa, cha usengal Jesús dub vas ncho vin, ndab xa:

—Leꞌa ta ndee ten ten naꞌ usa naꞌ por bego. Leꞌa ta ndee nluu leꞌa nat leꞌa Dios mbinno be men dub trat kub, ná xteꞌe wen yaꞌan bexa ndoꞌ Dios.

21 ’Ná leꞌa nat leꞌa xa na yun cuent naꞌ no nsob ndoꞌ mes ndee. 22 Leꞌa naꞌ, Xa Myak Men Ndoꞌ Gizhliyo, itiꞌidka lak nsabndoꞌ‑yá, parea proꞌob xabgiꞌi na yun cuent naꞌ ndoꞌ yaꞌa bexa wa.

23 Cha usaxan be xmen Jesús unabdiꞌizh ndoꞌ be ltsaꞌa na, ndab bexa:

—¿Tonma beuna nde ndee yun cuent xa?

24 Leꞌa be xmen Jesús cha usaxan ndeyotoꞌo lat be ltsaꞌa na ná ton mas nsak. 25 Ná leꞌa Jesús cha ndab:

—Leꞌa bexa nibeꞌe be nacion naꞌanpa ulaꞌa gun be men dub ta naꞌanpa nibeꞌe bexa. Leꞌa bexa wa leꞌatsa ndab leꞌa bexa uzhebpa be ta wen ndun. 26 Parea leꞌa bego ndee naꞌanpa nsabndoꞌ li gak. Leꞌa bexa mas nsak wa nsabndoꞌ ndi gak cuent dub xa ndon leꞌa tuzh. Leꞌa dub xa nibeꞌe wa nsabndoꞌ gun tiꞌin ndoꞌ iteata bega. 27 ¿Ton mas nsak? ¿Xa nsob ndoꞌ mes, nate xa ndun tiꞌin ndoꞌ xa wa? Leꞌa xa nsob ndoꞌ mes wa, leꞌa xa mas nsak. Parea leꞌa naꞌ ndee nkeseano bega cuent dub xa ndun tiꞌin ndoꞌ bega.

28 ’Leꞌa bego leꞌakama nak bexa mxik ndoꞌ itea be ta ugan utiꞌid naꞌ. 29 Ta weꞌe leꞌa naꞌ usa juers ndoꞌ bega ndontsa inibeꞌe bega, lak nsaꞌa Xus naꞌ ta nibeꞌe naꞌ, 30 ndontsa gaw bega no goo bega ndoꞌ mes ten naꞌ sa inibeꞌe naꞌ. No kadga dub bega isob sa inibeꞌe bega ndoꞌ isatibtop xkwaꞌa bexa Israel.

31 No ndab Jesús ndoꞌ Simón Pedr:

—Simón, Simón, leꞌa maxuꞌu unab bega ndoꞌ Dios gunno maxuꞌu bega lak ngoꞌo bexa xab trig. 32 Parea leꞌa naꞌ naꞌab ndoꞌ Dios gakno lu, lá ulaꞌa lu ta ngeꞌ ladna lu naꞌ. Leꞌa gor na yach lu stub biaj igeꞌ ladna lu naꞌ, gokno be ltsaꞌa lu dubtsa kwe bexa igeꞌka ladna bexa naꞌ.

33 Leꞌa Simón cha ndab:

—Señor, leꞌa naꞌ saano go gast litgiꞌib, no tal go gat leꞌa naꞌ no gat.

34 Leꞌa Jesús cha ndab ndoꞌ xa:

—Pedr, leꞌa naꞌ gáp ndoꞌ lu, leꞌa teꞌal nat gor biseata kwezh boy, leꞌa lu mkwiꞌinla chon biaj, ndab lu leꞌa lu lá nchandoꞌ naꞌ.

35 No ndab Jesús ndoꞌ be xmen na:

—Leꞌa zha na mtuꞌub naꞌ bego li lá ngoꞌo bega bols, no ni med, no ni stub nes ndab bega, ¿ncho xtaꞌan mbin jwalt zha wa zha?

Leꞌa bexa cha ukaꞌab ndab:

—Naꞌan xtaꞌan ngun jwalt zha wa.

36 Cha ndab Jesús:

—Leꞌa nat leꞌa bego na ndap bols no med, biꞌi bega‑yá. Leꞌa bego na lá ndap spad, bdoꞌo bega dub xab bega cha usiꞌi bega dub spad. 37 Leꞌa lak nkeaniꞌi diꞌizh ten Dios cuent ten naꞌ, leꞌa ta wa gakka cumplir. Leꞌa ta wa ndab: “Leꞌa be men mbinno xa cuentta dub xa ugap.” Leꞌa itea be ta ndab diꞌizh ten Dios cuent ten naꞌ wa, leꞌa ta wa gakka cumplir.

38 Leꞌa be xmen Jesús cha ndab ndoꞌ xa:

—Señor, leꞌa sa ndee nde top spad.

Leꞌa Jesús cha ukaꞌab ndab:

—Yá lá gudiꞌizhta beuna ta wa.

39 Cha utoꞌo Jesús nchaꞌa Bet Olivo lakka ndun xa. Leꞌa be xmen xa cha no usankea tsoꞌo xa. 40 Leꞌa gor na ulayaꞌ bexa sa wa, cha ndab Jesús ndoꞌ bexa:

—Unab bega ndoꞌ Dios gakno bega, ndontsa naꞌanpa utsabgix maxuꞌu bega.

41 Cha nab Jesús usea stub tuzh sa, dub lak sit ntsaꞌab men dub geꞌ. Leꞌa sa wa leꞌa Jesús cha usaxib mbidiꞌizhno xa Dios, 42 ndab xa:

—Xus naꞌ, tal leꞌa go nlad, lá ulaꞌa go itiꞌid naꞌ ndoꞌ be gealkweaꞌ uzheꞌeb ndee. Parea lá gak‑a lak nlad naꞌ, ndi gak‑a lak nlad go.

43 Weꞌe cha mlundoꞌ dub angel utoꞌo gibeꞌa msaꞌa juers ndoꞌ Jesús. 44 Leꞌa ta na uzhebpa kweaꞌ ncho ladna Jesús, leꞌa xa mas uzheꞌeb mbidiꞌizhno Dios. Leꞌa nits msanits ndoꞌ xa nsalaꞌ gast ndoꞌ yo cuent byach ten.

45 Leꞌa gor na mtayadiꞌizhno xa Dios, cha nseaꞌ xa sa ndebe be xmen xa. Ná leꞌa bexa ndeyatsbe tant uban ncho ladna bexa. 46 Leꞌa Jesús cha ndab:

—¿Xtaꞌan ndi ndeyats bega zha? Goste bega, unab bega ndoꞌ Dios, ndontsa naꞌanpa utsabgix maxuꞌu bega.

47 Bi li nsoꞌyab Jesús ta wa leꞌa kwaꞌad be men ulen. Leꞌa Judas xa no nak isatibtop xmen Jesús leꞌa nsea ned ndoꞌ be men wa. Cha ubii xa, cha mchealtoꞌo xa ndoꞌ Jesús. 48 Leꞌa Jesús cha ndab:

—Judas, ¿lbaꞌa myun lu cuent naꞌ Xa Myak Men Ndoꞌ Gizhliyo zha?

49 Leꞌa bexa ndeno Jesús uniꞌí ta wa, cha ndab bexa:

—Señor, ¿kuyono besa bexa no be spad ndee zha?

50 Leꞌa dub bexa wa cha ulobtoꞌog nchaꞌ lad gaꞌal dub xa ndun tiꞌin ndoꞌ uleꞌay ndon leꞌa nsak. 51 Leꞌa Jesús cha ndab ndoꞌ be xmen na:

—Unika‑yá. Blaꞌa bego bexa baꞌ.

Leꞌa Jesús cha mgal nchaꞌ xa wa, cha myakna‑yá. 52 Cha ndab Jesús ndoꞌ be uleꞌay nibeꞌe, no ndoꞌ bexa nibeꞌe ten bexa nlaꞌach niꞌi ten Dios, no ndoꞌ bexa gox nsak, bexa na nseabegiꞌi Jesús, ndab xa:

—¿Xtaꞌan nseano bega spad nsea garrot, nseabesen bega naꞌ cuent dub waꞌan? 53 Leꞌa itea wizh mluu naꞌ be men tale ten niꞌi ten Dios lat bega, ná naꞌan xtaꞌan ngunno bega naꞌ. Parea leꞌa nat ngolka gor ten bega, gor na gun maxuꞌu ta nlad na.

54 Cha usen bexa Jesús, cha mbiꞌi bexa xa ta lid uleꞌay ndon leꞌa nsak. Leꞌa Pedr sittsa nchankea tsoꞌo Jesús. 55 Leꞌa tlaw le ta lid uleꞌay wa mkwaꞌa bexa giꞌ, cha ute pla bexa wats giꞌ wa. Leꞌa Pedr cha no usob wats bexa wa. 56 Leꞌa dub xagots ndun tiꞌin sa wa uniꞌí nsob Pedr sa wa, cha ndab xa ndoꞌ bexa wa:

—Leꞌa xa ndee no nkeseano Jesús.

57 Ná leꞌa Pedr cha mkwiꞌin ndab:

—Xagots, naꞌ lá nchandoꞌ ton xa baꞌ.

58 Tsoꞌoma wa leꞌa stub xabgiꞌi wa uniꞌígal Pedr, cha ndab xa ndoꞌ Pedr:

—Go no nak xmen Jesús.

Leꞌa Pedr cha mkwiꞌingal ndab:

—Mgiꞌi, leꞌa naꞌ naꞌanpa no.

59 Ngok pa stub gor tsoꞌo wa, leꞌa stub xa ndabgal ndoꞌ be ltsaꞌa na cuent ten Pedr:

—Leꞌa xa ndee ta ugeaka no ukeseano Jesús, leꞌa xa ndee xa Galilea.

60 Leꞌa Pedr cha ndab:

—Mgiꞌi, leꞌa naꞌ lá iní xtaꞌan ndab lu.

Bi li gor wa zha leꞌa dub boy utezhla. 61 Leꞌa Jesús cha mgeak mwiꞌi ndoꞌ Pedr. Leꞌa Pedr cha mtseꞌa ladna ta ndab Jesús: “Leꞌa teꞌal nat gor na biseata kwezh boy, leꞌa lu mkwiꞌinla chon biaj ndab lu leꞌa lu lá nchandoꞌ naꞌ.” 62 Cha utoꞌo Pedr tsoꞌo juer, cha uzhebpa mbiꞌin xa.

63 Leꞌa be xabgiꞌi na li ndeulaꞌach Jesús wa kweaꞌ uníꞌi ndoꞌ Jesús, no udin bexa xa. 64 No mtsaw bexa ndoꞌ Jesús, cha utichyaꞌa bexa ndoꞌ xa, ndab bexa ndoꞌ xa:

—¡Gud ton utichyaꞌa ndoꞌ lu!

65 No sianta be diꞌizh ugap ndab bexa ndoꞌ Jesús.

66 Leꞌa ngot xeꞌa wa, cha mzhealbe bexa gox nsak ten bexa judio, no be uleꞌay nibeꞌe, no be mech ten ley. Cha mbiꞌi bexa Jesús dub sa nzhealbe sbeꞌen bexa nibeꞌetsa ten bexa judio. Cha ndab bexa ndoꞌ Jesús:

67 —Gud naga lu nak Cristo xa mti Dios.

Leꞌa Jesús cha ukaꞌab ndab:

—Tal leꞌa naꞌ gáp leꞌa ta wa naꞌka, leꞌa bego lá gungea ladna‑yá. 68 No tal inabdiꞌizh naꞌ ndoꞌ bega, leꞌa bega lá ikaꞌab ndoꞌ naꞌ, no ni lá ulaꞌa bega naꞌ. 69 Parea leꞌa nat idub nchaꞌa ndoꞌ ndee, leꞌa naꞌ, Xa Myak Men Ndoꞌ Gizhliyo, yatsoꞌobgal wats Dios lad gaꞌal, Dios xa ndon leꞌa nibeꞌe.

70 Weꞌe cha itea bexa ndab:

—¿Nat zha lu nak Xin Dios?

Leꞌa Jesús cha ukaꞌab ndab:

—Leꞌaka bega ndab‑a.

71 Weꞌe leꞌa bexa wa cha ndab ndoꞌ be ltsaꞌa na:

—Yá lá nkiꞌin beuna kwaꞌadta xa usake xa. Leꞌa beuna ndoꞌón ndab xa leꞌa xa leꞌaka ta wa.