1 Leꞌa bego uniꞌíka leꞌa Cristo ndun juert nak ladoꞌo beuna, no nkweaꞌ ladna xa beuna ta nluꞌuzh xa beuna, no dubtsa Espíritu ten Dios ncho len ladoꞌo beuna, no nlats ladna Cristo beuna. 2 Ta weꞌe bin bega be ta gáp naꞌ ndee, ndontsa mas iten lad naꞌ: lá kuyono bega be ltsaꞌa bega, no bkweaꞌ ladna bega bexa, no dubtsa gok bega, no dubtsa binbeꞌe bega. 3 Naꞌanpa izhinna bega, no ni lá ukwaꞌan bega ta gab men leꞌa bega dub xa nsak. Ndi xetsa gok bega ndoꞌ be ltsaꞌa bega, no binno bega bexa cuent dub xa mas nsak. 4 Lá ukwaꞌan bega be ta nladtsa bega, ndi no bkwaꞌan bega xteꞌe gakno bega be ltsaꞌa bega. 5 Lndeꞌe binbeꞌe bega lak ndanbeꞌe Cristo Jesús:

12 Bega nak amig ten naꞌ, lak mxobgek bega ndoꞌ naꞌ zha na bi nchoꞌo naꞌ lat bega, no nxobgek bega nat naꞌantapa nchoꞌo naꞌ sa baꞌ, no liga bin bega ta wen, ta uluu leꞌa Dios uloꞌola bega ndoꞌ be ke ten bega, no uzhebpa gop bega mod ndoꞌ Dios. 13 Leꞌa juers ten Dios leꞌa bega nlad gun bega lak nsak ladna xa, no liga ndakno xa bega gun bega ta wa.

14 Ndoꞌ itea be ta ndun bega, naꞌanpa inisi bega be ltsaꞌa bega, no naꞌanpa kuyotoꞌo bega, 15 ndontsa naꞌan ton gab leꞌa bega ndap ke. Leꞌa bega ncho ndoꞌ gizhliyo ndee lat be men ugap, ná leꞌa bega nak xin Dios wa nsabndoꞌ umbiꞌi gak ndoꞌ Dios no gak bega cuent dub xeꞌa ndoꞌ gizhliyo ndee. 16 Gaꞌaltsa ute bega no diꞌizh ten Cristo ta nsaꞌa gealnaban, ndontsa gal zha ilen Cristo leꞌa naꞌ iten ladna, leꞌa tiꞌin mbin naꞌ lat bega wa ngoktiꞌinka. 17 Leꞌa ta na ngeꞌ ladna bega Dios no ndun bega tiꞌin ten Dios nak cuent dub xnab nsaꞌa bega ndoꞌ Dios. Tal leꞌa naꞌ gat leꞌa naꞌ no gak cuent dub xnab usa naꞌ ndoꞌ Dios, parea leꞌa naꞌ nten ladna lak nten ladna bega nat. 18 No liga leꞌa bego nsabndoꞌ iten ladna lak nten lad naꞌ.

19 Tal leꞌa Jesús Xwan beuna ulaꞌa, leꞌa naꞌ sken utuꞌub Timoteo ndoꞌ bega, ndontsa mas iten lad naꞌ gor ilen xa gab xa xteꞌe nde bega. 20 Leꞌa nabtsa Timoteo ndanbeꞌe lakkata naꞌ, leꞌa xa idub ncho ladna nyuꞌno ladna bega. 21 Leꞌa iteata be men nkwaꞌan xteꞌe wen yoo leꞌaka leꞌa xa, naꞌanpa nkwaꞌan bexa ta nsak ladna Cristo Jesús. 22 Ná leꞌa bega yá uniꞌíka xteꞌe wen ndun Timoteo leꞌa xa nak cuent dub xiꞌín naꞌ, dubtsa ndadiꞌizh besa diꞌizh wen ten Cristo. 23 Ta weꞌe nlad naꞌ utuꞌub naꞌ xa ndoꞌ bega, zha na inítsa naꞌ ná xteꞌe itiꞌid naꞌ ndoꞌ be ta ndee. 24 No ndangea lad naꞌ leꞌa Dios ulaꞌa leꞌa naꞌ sken gal inaꞌ bega.

25 No nsak naꞌ nsabndoꞌ utuꞌub naꞌ no Epafrodito ndoꞌ bega, leꞌaka xa mtuꞌub bego gakno naꞌ wa. Leꞌa xa wa no nak beuna xmen Cristo no ndunno xa naꞌ tiꞌin ten Cristo, lak ndun dub soldad tiꞌin ndoꞌ xa nibeꞌe xa. 26 Leꞌa xa wa uzhebpa nlad yaꞌinaꞌ iteanak bega, no uzheꞌeb nyuꞌ ladna xa geal leꞌa bega mbiꞌín leꞌa xa kweaꞌ usak. 27 Ta ugeaka leꞌa xa kweaꞌ usak gast yamer ngat xa, ná leꞌa Dios ngokno xa lá ulaꞌa Dios ngat xa. No li ngokno Dios naꞌ ndontsa naꞌanpa mas uban yolad naꞌ tal leꞌa xa ngat. 28 Ta weꞌe leꞌa naꞌ sken utuꞌub xa ndoꞌ bega, ndontsa zha iniꞌígal bega xa leꞌa bega iten ladna no naꞌantapa yuꞌno lad naꞌ bega. 29 Leꞌa gor ilanseaꞌ xa, bten ladna bega no utsin binno bega xa, leꞌa xa no nak beuna xmen Dios. Leꞌa bega nsabndoꞌ gap mod ndoꞌ bexa na ndun lak ndun xa wa. 30 Leꞌa xa uzheꞌeb ndun tiꞌin ten Cristo gast yamer ngat xa. Msaꞌa xa xa guniꞌi mas gat xa, ndontsa gakno xa naꞌ itea be ta lá yoo gan gakno bega naꞌ wa.