1 ¿Nsak bega zha nzhinnona besa be ta li ndun besa wa? ¿Nsak bega zha nkiꞌin usaꞌa besa dub git ndoꞌ bega gudiꞌizh‑a xteꞌe wen nak besa zha? ¿Nate nkiꞌin besa ukeꞌa bega dub git li gab, usaꞌa besa‑yá ndoꞌ stub men? Ncho bexa nkiꞌinka‑yá, parea leꞌa besa naꞌanpa nkiꞌin‑a. 2 Leꞌa bega nak cuent dub git noꞌo besa len ladoꞌo besa. Leꞌa gor na iniꞌí be men ta wen nak bega, weꞌe iniꞌí bexa leꞌa ta ndun besa utsinka nak. 3 Leꞌa bega cuent dub git mkeꞌa Cristo ta nyun besa cuent. Parea naꞌanpa nkea‑yá no tint, leꞌa‑yá ndi nkea no Espíritu ten Dios nban. No naꞌanpa nkea‑yá ndoꞌ tabl geꞌ, leꞌa‑yá ndi nkea len ladoꞌo bega.

4 Li mbidiꞌizh besa ta wa geal leꞌa besa ngeꞌ ladna Dios ta na nak besa xmen Cristo. 5 Leꞌa besa lá yoo gan gun ni dub taꞌa leꞌaka leꞌatsa besa, leꞌa ta ndun besa wa leꞌa Dios leꞌa msaꞌa ta wa. 6 Leꞌa xa wa leꞌa msaꞌa ta ndák besa ndadiꞌizh besa ná xteꞌe nak trat kub mbinno Dios be men. Leꞌa trat wa naꞌanpa nak lak ndab ley, leꞌa‑yá ndi dub ta msaꞌa Espíritu ten Dios. Leꞌa bexa ndencho ndoꞌ ley wa satka, ná leꞌa Espíritu wa ndun nban beuna.

7 Leꞌa ley polta wa ta ukea ndoꞌ tabl geꞌ uzheꞌeb dub ta chul, gast lá yoꞌo gan iwiꞌi bexa Israel ndoꞌ Moisés, tant ndon nduꞌu naꞌ xa. Parea unitndoꞌka ta na li nduꞌu naꞌ Moisés wa. Leꞌa ley wa ndab leꞌa tal ton lá uxobgek ndoꞌ‑yá nsabndoꞌ gat. 8 Ná leꞌa trat kub ndanno Espíritu ten Dios beuna mas uzhebpa nluu ta juert nak Dios. 9 Leꞌa ley wa dub ta juert maska ndab‑a leꞌa be men nsabndoꞌ gat. ¡Parea mas uzheꞌeb dub ta juert ta na ndun Dios wen yaꞌan beuna ndoꞌ xa! 10 Leꞌa ta juert ten ley polta wa, leꞌa ta wa naꞌanpa juert nak lak uzheꞌeb juert ta ncho nat. 11 Leꞌa ta juert ten ley wa ta nitndoꞌ, ná leꞌa ta kub ndanno Dios beuna mas uzhebpa dub ta juert leꞌa‑yá naꞌanpa initndoꞌ.

12 Leꞌa ta na li uniꞌí beuna ta wa, ta weꞌe leꞌa besa naꞌanpa izheb gudiꞌizh besa diꞌizh ten Dios ndoꞌ gaꞌal be men. 13 Naꞌanpa ukachko besa diꞌizh wa lak mtsaw Moisés ndoꞌ na no dub bleꞌa lad, ndontsa naꞌanpa iniꞌí bexa Israel leꞌa ta na nduꞌu naꞌ ndoꞌ xa wa nsanitndoꞌ. 14 Parea leꞌa bexa wa lá kaꞌab yakbeꞌena ta wa. No gast nat leꞌa gor na ndoꞌol bexa ley polta ten Dios wa, bi ncho cuent dub ta ntsaw ndoꞌ ta ndanbeꞌe bexa, ndontsa lá yakbeꞌena bexa diꞌizh ten Dios. Leꞌa nabtsa Cristo gun gan yakbeꞌena bexa‑yá. 15 Leꞌa gor na ndoꞌol bexa ley ten Moisés wa, leꞌa bexa lá nyakbeꞌena‑yá, cuent ncho dub bleꞌa lad ntsaw gek bexa wa. 16 Ná leꞌa gor na ndangea ladna bexa Jesús Xwan beuna, weꞌe leꞌa ta ntsaw wa cha nitndoꞌ. 17 Leꞌa Cristo nak Espíritu, leꞌa tal Espíritu ten Dios ncho len ladoꞌo beuna, leꞌa beuna yá utoꞌo ndoꞌ ley polta wa. 18 Ta weꞌe nat leꞌa beuna naꞌanpa nsaꞌnyaw ndoꞌ na, leꞌa beuna nak cuent dub waꞌán nluꞌu be ta chul no ta juert nak Dios. Leꞌa Espíritu ten Dios ndun leꞌa beuna nsayak lak nak xa.