1 Ngol zha leꞌa besa yá lá uxikta nkwaꞌan besa bega, ta weꞌe myaꞌan nab besa gezh Atenas, 2 cha mtuꞌub besa Timoteo ndoꞌ bega. Leꞌa xa wa cuent wit beuna, no ndun xa tiꞌin ndoꞌ Dios ndadiꞌizh xa diꞌizh wen ten Cristo lak ndun besa ndee. Li mtuꞌub besa xa ndoꞌ bega ndontsa utenxeꞌa xa bega mas igeꞌ ladna bega Cristo, 3 ndontsa ni dub bega lá gach ladna ndoꞌ be gealkweaꞌ nsatid bega. Leꞌa bega uniꞌíka leꞌa beuna sian gealkweaꞌ nsabndoꞌ itid. 4 Leꞌa zha na bi ncho besa lat bega, leꞌa besa mbidiꞌizhka leꞌa beuna sian gealkweaꞌ iniꞌí. Cha likaga ngok‑a lak uniꞌí bega wa. 5 Ta weꞌe ta na yá lá uxikta naꞌ wa mtuꞌub naꞌ Timoteo mbiꞌid inaꞌ bega, naga bi ngeꞌ ladna bega Jesús. Leꞌa naꞌ nzheb nchaꞌa maxuꞌu ukwiꞌinno bega, no nchaꞌa itea ta mbin besa lat bega wa naꞌan xtiꞌin.

6 Ná leꞌa gor na mlaꞌnchaꞌ Timoteo ngwaꞌ xa sa baꞌ, leꞌa xa mbidiꞌizh ndoꞌ besa ná xteꞌe bi ngeꞌka ladna bega Cristo, no xteꞌe nkweaꞌ ladna bega be ltsaꞌa bega. No mbidiꞌizh xa ná xteꞌe nten ladna bega gor ntseꞌa ladna bega besa, no nkwaꞌan bega besa lak nkwaꞌan besa bego baꞌ. 7 Bega nak beuna xmen Cristo, uzheꞌeb bid ndesea besa no nsatid besa be gealkweaꞌ. Parea ta na li nchoka bega len nes ten Dios wa leꞌa ndun nten ladna besa. 8 Leꞌa nat uzheꞌeb nkaꞌa besa juers ta na uniꞌí besa leꞌa bega ngeꞌka ladna Jesús. 9 Ni lá iniꞌíta besa xteꞌe usaꞌa besa xno ndoꞌ Dios por bega lak nsabndoꞌ‑yá. Leꞌa be ta li ndun bega wa leꞌa ndun uzheꞌeb nten ladna besa ndoꞌ Dios ten beuna. 10 Leꞌa besa teꞌal tezhea nab ndoꞌ Dios ulaꞌa Dios giꞌid inaꞌ besa bega, uluꞌu besa bega ná xteꞌe mas uzheꞌeb igeꞌ ladna bega Dios.

11 Leꞌa Dios Xus beuna no Jesucristo Xwan beuna gakno besa nes giꞌid inaꞌ besa bega. 12 Leꞌa Jesús gun mas ikweaꞌ ladna bega be ltsaꞌa bega no itea be men, lak uzheꞌeb nkweaꞌ ladna besa bega. 13 Weꞌe leꞌa Dios gun mas igeꞌ ladna bega xa, no umbiꞌi gak ladoꞌo bega ndoꞌ Tad Dios, gor ilen Jesucristo Xwan beuna nsea itea be xmen xa, bexa umbiꞌi nak ladoꞌo na ndoꞌ Dios.