1 Ná nchanho Jesús tají ngaxinhi nihngo icha importante para jinchecoenhe chojni de ixin Dios, co jindache na tti jian joajna are vintteguiji canxion xidána que vaquetonha ngain icha xidána, canxion ximaestroe ley, co canxion xí que chonda joachaxin ngain nihngo mé. 2 Co vinttendac̈ho xa ngain Jesús:

―Ndachjenji ni ra quehe joachaxin chonda jaha para nchehe cain cosa jihi. ¿Quensen chjá joachaxin jihi?

3 Cottimeja ndac̈ho Jesús ngain xa:

―Janha cai sanchianguiha ra ná cosa. Co rrondachjenji ni ra: 4 ¿Quensen rroanha Juan para joincheguitte chojni? ¿A Dios o ani chojni?

5 Pero coexinhi xa joanchianguihi chó xa co ndac̈ho xa:

―¿Quehe rrondac̈ho na? Si rrondac̈ho na que Dios tti rroanha Juan, jehe rrondattjo na: “¿Quedonda vitticaonha ra remé?” 6 Co si rrondac̈ho na que chojni tti rroanha Juan, cainxin chojni nasoenxon na ján na de ixin ẍo ixin jehe na chonda na seguro que Juan vanichja joajna que vagayé de ngain Dios.

7 Co jehe xa vinttendac̈ho xa ixin noeha xa quensen rroanha Juan para joincheguitte chojni. 8 Cottimeja ndac̈ho Jesús ngain xa:

―Cai janha rrondattjoha ra quehe joachaxin nttaxin janha cain cosa jihi.

9 Cottimeja coexinhi Jesús nichjé chojni, co ndac̈ho ngain na ejemplo jihi:

―Vehe ná xí que cjoenga xa ná jngui de nttauva co después joanjo xa nttattochjoin media ngain canxion tti nchehe ẍa co jehe xa sacjoixin xa de nttiha para tsje tiempo. 10 Co are ojoí tiempo de cosecha, jehe xa rroanha xa ná tti nchehe ẍé xa para joiganchia tti parte de cosecha que jiquininxin sayé tti xinajni mé. Pero jehe tti nicoá nttattochjoin media mé coaxin na tti nchehe ẍa mé nttá co vengui na co ẍonhi chjé na. 11 Cottimeja xinajni mé rroanha xa iná tti nchehe ẍé xa pero cai tti nicoá nttattochjoin media nichja na feo ngain tti nchehe ẍa mé co coaxin na nttá co vengui na co ẍonhi chjé na. 12 Xinajni mé cjan xa rroanha xa iná tti nchehe ẍa, pero cai joinchenihi na tti nchehe ẍa mé co vengui na co ẍonhi chjé na.

13 ’Cottimeja xinajni mé ndac̈ho xa: “¿Quehe sinttaha? Janha rrorroanha tti xanhna que janha anto rinaho. Are jehe na sicon na xanhna jihi puede rrochonda na respeto ngain xan.” 14 Pero are jehe na vicon na xan, ndache chó na: “Xan jihi xan sayé ngoi nontte jihi inchin herencia, mexinxin nasoenxon na xan para que ján na sittoá na cain.” 15 Cottimeja joantsjegaxin na xan de nttauva mé co nagoenxon na xan.

Cottimeja joanchiangui Jesús ngain chojni co ndac̈ho:

―¿Quehe sinchehe xinajni mé ngain tti chojni que vittoehe jnguihi xa? 16 Jehe xa tsí xa co nasoenxon xa chojni mé co sanjo xa jnguihi xa ngain ojé chojni.

Are vinttequinhi chojni jihi, vinttendac̈ho na:

―¡Que Dios sanjoha joachaxin yá!

17 Pero Jesús tsjehe ngain jehe na co ndac̈ho:

―Mexinxin, ¿quehe rroc̈ho tti jitaxin ngain Palabré Dios? Nttiha ndac̈ho:

19 Cainxin xidána que vaquetonha ngain icha xidána co ximaestroe ley nttiha joinao xa rrotse xa Jesús ngain rato mé ixin coinxin xa que ixin ejemplo jihi rroc̈ho de ixin jehe xa. Pero ẍagoen xa cain chojni. 20 Mexinxin rroanha xa canxion xí que tsaya ngain Jesús co xí mé vanchehe xa que ixin jehe xa anto jian xa para que rrojinchenichja xa Jesús ná cosa nchaoha para nchao rrocjanguihi xa Jesús ngain xigobernador. 21 Mexinxin joanchiangui xa ngain Jesús co ndac̈ho xa:

―Maestro, janha na nona na que soixin nichja co nchecoenhe chojni tti ndoa, co ncheha juzgado chojni rico ojé que chojni noa, sino que soixin ndoa nchecoenhe na de ixin tti rinao Dios. 22 Ndachjenji ni ra: ¿Anchao jí tsjenga na hna impuesto ngain xiemperador, o ani nahi?

23 Pero Jesús oconohe de tti jianha que jehe xa teẍaxaon xa de ixin jehe, co jehe ndac̈ho ngain xa:

―¿Quedonda rinao ra sincheyana ni ra? 24 Tjagohna ni ra ná tomi. ¿Quensen con jinganito jihi, co quensen nombré jitaxin jihi?

Jehe xa vinttendac̈ho xa:

―Con xiemperador co nombré xa.

25 Cottimeja ndac̈ho Jesús ngain xa:

―Mexinxin chjehe ra xiemperador tti jiquininxin xa, co danjo ra ngain Dios tti jiquininxin sayé jehe.

26 Co jamé c̈hoha joinchenichja xa Jesús ni ná cosa nchaoha; sino que vinttegoan xa admirado de ixin tti ndac̈ho jehe co jamé ndavinttetencoa xa.

27 Después de cain jihi canxion xisaduceo vinttecji xa ngain Jesús. Xisaduceo vaguitticaon xa que chojni que ndadenhe irroxechonha na; mexinxin ndac̈ho xa ngain Jesús:

28 ―Maestro, ley que vayé Moisés jitaxin que si ná xí ndadenhe xa co sittohe c̈hihi xa co si ẍonhi chjan joichonda na, xichó xindavenhe chonda xa que secao xa jehe nc̈higanha mé co rrochonda na chjan para que chjan mé sehe xan inchin xenhe tti ndavenhe. 29 Nchao remé; vintte yáto xí, chó xa. Xisaho vecao xa nc̈hic̈hihi xa pero ndavenhe xa co ẍonhi chjan cointtohe xa. 30 Xiyoxin vecao xa jehe nc̈higanha mé, pero cai ndavenhe xa co ẍonhi chjan cointtohe xa ngain nc̈higanha mé. 31 Cottimeja xininxin vecao xa jehe nc̈higanha mé pero ẍajeho jamé conhe xa. Co jamé hasta tti yatoxin xa ndavenhe xa cai co ẍonhi chjan cointtohe xa ngain nc̈higanha mé. 32 Co después ndavenhe nc̈higanha mé cai. 33 Mexinxin are rroxechon na, ¿Quexehe de tti yáto xí mé sehe mero xixihi jehe nc̈hí mé, ixin cain xa vinttecao xa nc̈hí mé?

34 Cottimeja ndac̈ho Jesús ngain xa:

―Ngain mundo jihi, xí co nc̈hí tottehe na. 35 Pero tti chojni que tequininxin tsji para ngajni co rroxechonxin na de tti ndavenhe na, nttiha ni tsotteha na, ni sanjoha na xenhe na para tsottehe xan 36 ixin nttiha ic̈hoha ndasenhe na. Are mé sintte na inchin ángel de Dios co sintte na xenhe Dios ixin Dios tti sinchexechon na. 37 Hasta ngain tti parte que coentaxin Moisés ixin vicon ẍohi ngagaha canchaha, jehe mismo jointtanoa na que ixin chojni que ndadenhe rroxechon na. Nttiha ndac̈ho que Dios, Dios de Abraham, co Isaac, co Jacob. 38 Pero Dios jeha Dios de nindadiguenhe, sino que Dios de tti nitechon. Co mé rroc̈ho que para ixin Dios cain chojni techon na.

39 Cottimeja cainxin ximaestroe ley vinttendac̈ho xa:

―Nchao ndac̈ho, Maestro.

40 Co icjanha xa joanchiangui xa icha ngain Jesús.

41 Jesús ndac̈ho ngain na:

―¿Queẍén ndac̈hoxin chojni que ixin Cristo ná xannttí David? 42 Ixin David mismo dindac̈ho janhi ngain libroe Salmo:

45 Cainxin chojni nttiha tatettinhi na are Jesús ndac̈ho janhi ngain tti chojni que vacao:

46 ―Ttjiho ra cuidado de ncheha ra inchin nchehe ximaestroe ley ixin jehe xa ncheẍoxinhi xa c̈hji xa conixin lontto icha jinjini, co rinao xa que chojni sanjo na joajna ngain xa conixin anto tsje respeto are ngain ndásin, co are ngaxinhi nihngo jehe xa ttjé xa tti nttaxintaon icha importante para dinttetaha xa, co are ttji xa dijine xa jehe xa rinao xa tti icha jian lugar ngain mesa. 47 Cai dantsjehe xa nc̈higanha nchiandoha nc̈ha ixin ittixinha nc̈ha ttjenga nc̈ha hna contribución, co para ẍonhi chojni rroẍaxaon tti jianha que nchehe xa, jehe xa nchecoanxinhi xa Dios anto sé. Cain jehe xa xisayé icha soji castigo.