1 Ikjinni tí xroon i tsꞌayéhérá kíxin tso̱nohará kuènte tí nkexro xráxín kjuákꞌe tí na̱xa̱ tꞌónahya chjasintajni, mé tí nkexro kuínhinni nixja la ko tí nkexro kꞌuíkonxín konni. Kíxin tí nkexro mé kꞌuíkonni la ko tí nkexro kuákóxi̱n tjani, mé tí nkexro nixja tí tan tsjanjon kjuachón. 2 Kjua̱ko̱xi̱n chꞌán nkexrí kjuákꞌe chꞌán, a̱ ntá kaín tí jeheni kꞌuíkonni chꞌán, mé xi̱kaha chrónkaxínni nkexrí kjuákꞌe chꞌán; a̱ ntá tja̱kue̱xinni tí jahará nkexrí tjen tí kjuachón jnkochríxín, la mé jehe chꞌán kꞌuékjakꞌeko chꞌán Itꞌé chꞌán Dios, a̱ ntá ikui chꞌán ntihi chjasintajni. 3 Chrónkaxínni tí nkehe kꞌuíkonni la ko tí nkehe kuínhinni, kíxin kja̱xinrá jnkoko̱á chrókuinkachónkirá éxí tinkáchónkini tí jeheni, éxí tí jeheni jnkoko̱á tinkáchónkini Itꞌéni Dios la ko tí Xje̱en chꞌán Jesucristo. 4 Mé xi̱kaha ikjinni tí nkehe i, kíxin chrókjuintaxín chrókócháhará la ko chrókóchéhe̱ni.

5 Tí tan i mé Ìnchéni Jesucristo kjua̱ko̱he̱ tí jeheni, a̱ ntá jie tja̱ko̱ha̱ráni tí jahará, kíxin Dios mé tí xrohi, a̱ ntá kohya ninkehó sítié tí tjen tí jehe chꞌán. 6 A̱ ntá tí tsontáchroni kíxin tinkáchónkini tí jehe chꞌán, a̱ ntá na̱xa̱ ixrini tí nti̱a sítié, na mé xi̱kaha chꞌiani kíxin chꞌehyani tí nkehe ntáchroni. 7 A̱ ntá tí xritjejóni tí tꞌinkaséyan kíxin tí Dios mé jehe chꞌán tí tꞌinkaséyan, na mé xi̱kaha jnkoko̱á tinkáchónkini chꞌán, a̱ ntá tí ijni̱é Xje̱en chꞌán Jesucristo mé tsꞌíjmáxin kaín jie̱ chóntani.

8 Tí chróntáchroni kíxin ninkehó jie̱ chóntahyani, mé xi̱kaha la jehóni chꞌiyeheni a̱sénni, a̱ ntá tí nkehe chaxín la chóntahyani. 9 A̱ ntá tí tsontáchroni kíxin chóntani jie̱, a̱ ntá tso̱noheni chaxín kíxin itjen ijnko Dios la jína chꞌán la tsꞌitjáyenhen chꞌán kaín jie̱ chóntani la ko sinchetjóáni chꞌán kíxin kaín tí nkehe jínahya kjuíchꞌeni. 10 A̱ ntá tí tsontáchroni kíxin kjuasinhyani ninkehó jie̱, la éxí chróntáchroni kíxin Dios la chꞌia chꞌán, a̱ ntá tí xi̱kaha tsixroni la chaxínhya tsíkꞌáyéhe̱ni tí tan kuènte chꞌán.