Pathien Lekhabu Inthieng Chongtung Thar John 20

Thân akorong

(Mat 28:1-8; Mk 16:1-8; Luk 24:1-12)

1 Pathienni jînga, ala jîng mumuokin, Mary Magdalene thâna a sea, thân kotbâia lung hah muluoipai saiin ava mua. 2 Simon Peter le ruoisi dang Jisua'n a lungkham ngâipu, kôm han a tâna, male an kôm, “Thân renga Pumapa hah an lâk paia, male an darna riet khâi mak me,” a tia.

3 Hanchu Peter le ruoisi dang hah thâna an sea. 4 Anruonin an tâna, aniatachu ruoisi dang hah Peter a khêl pita thâna a tung masa ani. 5 Ân kûna male puoninnêm zuot a mua, hannirese asûnga chu lût mak. 6 Anûka Simon Peter a juonga male thân sûnga a lût pata. Puoninnêm zuot chu a mua 7 male Jisua lu tuomna puon ha chu puoninnêm zuot leh munkhatin om loiin atheia ânzuotin ava mua. 8 Hanchu ruoisi dang, thâna tung masapu khom hah ava lûta; a mua male a iem zoi. 9 (Pathien lekhabu'n thina renga lân thoinôk atih, ti hah la riet thei uol mak ngei ani.) 10 Hanchu ruoisingei hah an ina an kîr nôk zoi.

Mary magdalene kôm Jisua ânlâr

(Mat 28:9-10; Mk 16:9-11)

11 Mary chu chap pumin thân pêntieng ândinga, chap chungin ân kûna, thân sûng a vênga 12 male vântîrton inik angoia invôn Jisua ruok an min jâlna luthun tieng inkhat kethuon tieng inkhat an insung a mua. 13 Ha ngei han, “Nupangnu, ithomo na chapa?” tiin an rekela.

Amanu han, “Ku Pumapa an lâk paia, khonmo an darna riet khâi mu-ung!” tiin a thuon ngeia.

14 Hanchu amanu ha a hônheiin chu mahan Jisua ânding a mua; hannirese amanu ha Jisua ani tiin riet mak. 15 Jisua'n a kôm, “Nupangnu, ithomo na chapa? Tumo no rok?” tiin a rekela.

Amanu han ruhuon donsûipu mini tiin a bôka, a kôm, “Pu, ama hah na lâkin chu khonmo na dar mi ril roh, sêng ka ta, ama ka va lâk theina rangin,” amanu han a tia.

16 Jisua'n amanu kôm han, “Mary!” a tia.

Amanu han a tieng mâi a thaka, Hebrew chongin, “Rabboni!” amanu han a tia. (Maha “Minchupu” tina ani.) 17 Jisua'n amanu kôm han, “Mi mutu sôt no roh, asikchu ka Pa kôm la se nôk mu-ung. Hannirese ka lâibungngei kôm sênla, ka Pa an Pa, ka Pathien an Pathien kôm ki kîr nôk rang ani zoi tiin va ril ngei roh,” a tia.

18 Masikin Mary Magdalene hah a sea, male Pumapa a mu tie le an inkaina a ril ngei hah ruoisingei ava misîr pe ngei zoi.

Jisua a Ruoisingei kôm ânlâr

(Mat 28:16-20; Mk 16:14-18; Luk 24:36-49)

19 Ha Pathienni kholoia han, Juda rachamneipungei an chi sikin ruoisingei hah insûnga inkhâr kalin an intûpa. Hanchu Jisua a honga an lâia ândinga, “Nin lâia rathânngamna om rese!” a tia. 20 Mahi a ti suole chu a kutngei le a kângrâm a min mu ngeia. Pumapa an mua, ruoisingei ha râisânnân an sip zoia. 21 Avêlin Jisua'n an kôm, “Nin chunga rathânngamna om rese. Pa'n mi tîr anghan kei khomin nangni ki tîr ani,” a tipe ngeia. 22 Hanchu ratha a mûtkhum ngeia male an kôm, “Ratha Inthieng man roi. 23 Mingei sietnangei khom nin ngâidam kai chu ngâidamin om an ta; nin ngâidam loi kai chu ngâidamin om no ni ngei,” a tia.

Jisua le Thomas

24 Jisua a hong lâihan ruoisi sômleinik ngei lâia Thomas (Ânphîr an ti) ha chu an lâia omaka. 25 Masikin ruoisi dangngei han, “Pumapa kin mu zoi!” an tipea.

Thomas'n an kôm, “A kuta peret sâbenûkngei ku mu noa male a sâbenûkngei ha ku kutruol leh ki khîk noa, a kângrâma sâbenûkngei khom ko tôn nônchu iem no ning,” a tia.

26 Hapta khat suole chu ruoisingei hah insûnga an intûp nôka, Thomas khom an kôm a om sa. Inkhârngei hah an kala, aniatachu Jisua a honga, an lâia ândinga, an kôm, “Nin chunga rathânngamna om rese,” a tia. 27 Hanchu Thomas kôm, “Nu kutruol leh mahin khîk inla, male ku kutngei hi en roh; hanchu ka kângrâm khom nu kut sônin pûr inla tôn roh. Iemzoiloiin om khâi nônla, male iem ta roh!” a tipea.

28 Thomas'n a kôm, “Ku Pumapa le ka Pathien ni ni!” tiin a thuona.

29 Jisua'n a kôm, “Mi ni mu sika ni iem mini? Mi mu loia mi iem ngei chu satvur ani bak na!” a tipea.

Hi lekhabu'n akhîn

30 Jisua'n a ruoisingei mitmu chunga sininkhêl dang tamtak ngei a thoa, mangei hah hi lekhabu sûng hin miziek nimak. 31 Hannirese Jisua hih Messiah, Pathien Nâipasal ani ti nin iem* theina rang le ama nin iemna sika ringna nin dôn theina ranga hingei hi chu miziek ani.

John
<
20
>

20:23 20:23: Mat 16:19; 18:18

*20:31 20:31: iem; miziek senkhat ngei an dôn chu iem titna rangin.