Pathien Lekhabu Inthieng Chongtung Thar 2 Thessalonika 1

THESSALONIKA

Mingei Kôma Paul Lekhamuthuon Inikna

Chongmaruoi

Khrista juong nôkna rang chungroia mindon injêlna han Thessalonika koiindanga bâiinkhamnangei ala suok banga. Thessalonika mingei kôm Paul Lekhamuthuon Inikna hin a rilsensâi chu Pumapa juong nôkna nikhuo chu atung sai piel kêng ani zoi ti iemna hih ani. Paul'n hima injêlna hah a mindik pe ngeia, Khrista a juong nôk mân, “Puoloi Inkhat” (2.3), ruoipunina nuoia misîrtheiloi saloi le puoloina ânsangtakna dên a ta, ama han Khrista doi atih, tiin a rilminthâr pe ngeia.

Tîrton'n a lekhamuthuon le aporengeiin intakna le dûktongna kâra khom an taksônna det tita, Paul le a sintho champuingei an tho ngâi anghan an ringna rang sin an tho anâng tie le asa tho rangin tuongdierna an nâng tie hih lunghâng a tho ani.

Asûnga chongtângpuingei

Chongmaruoi 1:1-2

Minpâkna le rilminsana 1:3-12

Khrista juong nôkna roia rilnangei 2:1-17

Khristien nunchan ranga mohôkna 3:1-15

Chongkhârna 3:16-18

1 Paul, Silas, le Timothy ngei renga,

Pathien ei Pa le Pumapa Jisua Khrista ta, Thessalonika koiindanga mingei kôm:

2 Pathien ei Pa le Pumapa Jisua Khrista'n moroina le inngêina nangni pêk rese.

Khrista juong tika roijêkna

3 Kin lâibungngei le sarnungei, nangni rangin zoratin Pathien kôm râisânchong kin ril ngêt rang ani. Hi anga tho hih keini rangin adik ani, nin taksônna hah asân ânsôna, midangngei nin lungkhamna khom ahong lien uol sikin. 4 Masika han keini nanâkin Pathien koiindangngei lâia nin chungroia nangni kin song ngâi ani. nuomlonangei le dûktongnangei nin tuonglâi khomin iemnân nin dier tit ngâi sikin nangni kin song ngâi ani.

5 Ma nin tuongnangei nâm hah Pathien roijêkna diktie riet minthâr theina le ama Rêngram mi nin hongni theina ranga ani. 6 Pathien chu adik hih tho a ta: dûk nangni mintong ngei chunga dûktongna juong chôi atih, 7 male ama'n nangni le keini dûktong ngei hih hoina mi pêk atih. Maha Pumapa Jisua'n râtinchung a vântîrtonngei leh invâna a juong inlang tika thông a ta, 8 Pathien pomloipu ngei le ei Pumapa Jisua Khrista Thurchi Sa jômloi ngei hah meidon leh dûk tho ngei atih. 9 Mangei han Pumapa makung renga le a râtna roiinpuitak renga sensâiin kumtuong inmangna dûktongna tuong an tih, 10 a mi inthieng ngei kôm renga roiinpuina chang rang le ama iempu ngei murdi renga miritna chang ranga a juong Nikhuo lehan. Nangni khom thurchi nangni kin misîr pe hah nin iem sikin nangni khom anni ngei lâia inchel sâng nin tih.

11 Masika han nin ta rangin zoratin chubai kin tho bang ngâi. Nangni a koi lam anghan pomtheiruo ringnun nin dôn theina rang le i-ih asana rang le taksônna nin sin zoina ranga nin ôina murdia a sinthotheinân tuon nangni mintung pe theina rangin Pathien kôm kin ngên ngâi ani. 12 Ma angdênin ei Pathien le ei Pumapa * Jisua Khrista moroina jârin nangni renga ei Pumapa Jisua riming hah roiinpuina chang a ta, male nangni khomin a kôm renga chang thei nin tih.

1:1 1:1: Sin 17:1

1:9 1:9: Isa 2:10

*1:12 1:12: Ei Pathien le Pumapa ha; aninônchu Ei Pathien le Pumapa.