18
Zheremi wìla kari cɔgɔ fanrifɔ
wa yeri
1 Yawe Yɛnŋɛlɛ làa li sɛnrɛ ti kan Zheremi wi yeri, ma yo fɔ: 2 «Yiri ma kari wa cɔrɔ fanrifɔ wi go, na maga sa gbɔn wa, sɛnrɛ nda ti yɛn na yeri, mi yaa ti yo ma kan.»
3 Kona, a mì si kari wa cɔrɔ fanrifɔ wi go, mɛɛ saa wi yan wila cɔgɔ ka fanri wa cɔrɔ fanripɛlɛ li ni. 4 Cɔgɔ ŋga wìla pye na fanri joro ti ni, a kì si jɔgɔ wi kɛɛ. A wì si cɔgɔ ka yɛgɛ fanri ki joro nuŋgba ti ni, paa yɛgɛ ŋga kùu ndanla we.
5 Kona, a Yawe Yɛnŋɛlɛ lì sili sɛnrɛ ti kan na yeri ma yo fɔ: 6 «Yoro Izirayɛli woolo, naga yɛn ma, ŋga ki cɔrɔ fanrifɔ ŋa wì pye, mi se ya mbege kala nuŋgba li pye ye na wi le?» Yawe Yɛnŋɛlɛ lo lì yo ma fɔ: «Joro ti yɛn wa cɔrɔ fanrifɔ wi kɛɛ yɛgɛ ŋga na, yoro Izirayɛli woolo, pa ye yɛn na kɛɛ ma. 7 Sanga wa ni, mi ma para cɛnlɛ la wogo na, nakoma wunluwɔ tara ta wogo na mbe yo fɔ mi yaa pe yirige wa pe yɔnlɔ, mbe pe gbɔn, mbe pe tɔngɔ. 8 Ɛɛn fɔ ki cɛnlɛ na mi ma para li wogo na, na li woolo paga pe kapege ki jɛn mbege yaga, pa kona jɔlɔgɔ ŋga mìla pye na jaa mbe wa pe na, mi maga yaga. 9 Sanga wa ni fun, mi ma para cɛnlɛ la wogo na, nakoma wunluwɔ tara ta wogo na mbe yo fɔ mi yaa ti gbegele mbe yeresaga kan ti yeri. 10 Ɛɛn fɔ na ki cɛnlɛ woolo pe kaa ŋga ki yɛn mala mbɛn ki piin, na pe woro na nuru na yeri, pa kona kajɛŋgɛ ŋga mìla pye na jate mbe pye pe kan, mi maga yaga.
11 «Koni, ki yo Zhuda tara woolo pe kan konaa Zheruzalɛmu ca woolo pe kan fɔ, pa Yawe Yɛnŋɛlɛ lì yo yɛɛn fɔ: ‹Mi yɛn na jɔlɔgɔ ka gbɛgɛlɛ ye mɛgɛ ni, mi yɛn na kala la kɔɔn na teri ye mɛgɛ ni. Ki kala na, ye ni fuun nuŋgba nuŋgba, ye sɔngɔrɔ ye yiri wa ye kombegele ke ni, ye ye tangalɔmɔ naa ye kapyere ti kanŋga.› 12 Ɛɛn fɔ pe yaa ma yɔn sogo mbe yo fɔ: ‹Maga kaa ma yɛɛ tege! Ŋga we yɛn na sɔnri, ko we yaa pye; we ni fuun nuŋgba nuŋgba we yaa la tanri mbaa yala we nawa jatere pere to ni.› »
Izirayɛli woolo pè fɛgɛ
Yawe Yɛnŋɛlɛ li na
13 Ki kala na, pa Yawe Yɛnŋɛlɛ lì yo yɛɛn fɔ:
«Ye kari ye sa cɛngɛlɛ sanŋgala ke yewe;
ambɔ wila ki kala cɛnlɛ na la logo faa?
Izirayɛli woolo pè kapegbɔgɔ pye fɔ ma toro.
14 Naga yɛn ma, yaa nɛzhi wi yan wi kɔ wa Liban tara yanwira ti go na, wa wasege ki ni wi le?
Naga yɛn ma, tɔnyinmɛ mba pi maa yinrigi fɔ wa lege na fuun na tinri, pi mbe ya waga wi le?
15 Ma si yala na woolo pè fɛgɛ na na,
pe saa na wusuna nuwɔ taan sori yarisunndo nda ti yɛn wagafe ti kan.
Tì pe kan pe yɛn na kunrugu wa pe kondangala li ni;
pè kɛ ma wɔ wa pe kolɛlɛ li na,
ma koŋgolo kele yɛgɛ lɛ, ŋgele ke woro ma yɔn.
16 Pège pye, a pe tara tì jɔgɔ ma koro waga,
ma pye titɛgɛrɛ yaraga fɔ sanga pyew.
Kì to torofɛnnɛ pe ni fuun pe yɔn na,
fɔ pe maa go fingi ti na.
17 Mi yaa ka pe gbɔn mbe pe jaraga wa pe juguye pe yɛgɛ,
paa yɛgɛ ŋga na yɔnlɔ yirisaga tifɛlɛgɛ ki ma yaara ti gbɔn mberi jaraga we.
Pe jɔlɔgɔ sanga ni, mi yaa puŋgo wa pe yeri,
mi se yɛgɛ wa pe yeri mbe pe saga.»
Leele pàa yɔn le Zheremi wi na,
konaa Zheremi wi Yɛnŋɛlɛ yɛnrɛwɛ
18 Leele pàa yo fɔ: «Ye pan we yɔn le Zheremi wi na. We se saraga wɔfɔ la, mbaa we nari Yɛnŋɛlɛ li lasiri wi ni, kajɛnŋɛ se la we yeri, mbaa yɛrɛwɛ jɛmbɛ kaan we yeri, we se Yɛnŋɛlɛ yɔn sɛnrɛ yofɔ la, mbaa Yɛnŋɛlɛ sɛnrɛ yuun we kan. Ye pan woo mɛgɛ ki jɔgɔ we yɔn sɛnrɛ ti ni; waga kaa wi sɛnrɛ ti jate.»
19 «Yawe Yɛnŋɛlɛ, logo na yeri;
na winfɛnnɛ pe yɛn na sɛnrɛ nda yuun, ti logo!
20 Naga yɛn ma, ki daga pe kajɛŋgɛ ki fɔgɔ tɔn kapege ni le?
Ma si yala, pè titɛgɛ wɔ wa na yɛgɛ, jaŋgo mbe to wa ki ni.
Yɛnŋɛlɛ, ma jatere wi tɛgɛ ki na fɔ mìla yere ma yɛgɛ sɔgɔwɔ,
mɔɔ yɛnri ma kajɛŋgɛ pye na kan,
jaŋgo mbɔɔn naŋgbanwa pi laga lali pe ni.
21 Ki kala na, ma ti fuŋgo mbe to pe piile pe na;
pe pe gbo tokobi ni.
Pe jɛɛlɛ pe pe piile pe la, pe pye naŋgunjaala;
ma ti yambewe mbe pe pɛnɛ pe gbo,
tokobi mbe pe lefɔnmbɔlɔ pe gbo malaga na.
22 Na maga ka pe fo mbe beŋganri pyefɛnnɛ torogo pe yeri sanga ŋa ni,
ma ti gbeere mbaa yinrigi wa pe yinrɛ ti ni,
katugu pè titɛgɛ wɔ wa na yɛgɛ mbanla yigi.
Pè mɛrɛ jan na na mbanla yigi.
 
23 «Ɛɛn fɔ, mboro wo na Yawe Yɛnŋɛlɛ, yɔn lemɛ mba fuun pè le na na mbe ta mbanla gbo,
màa jɛn.
Maga ka pe kajɔɔgɔ ki kala yaga pe na,
maga ka pe kapere ti kɔ mberi wɔ wa ma yɛɛ yɛgɛ sɔgɔwɔ.
Ma ti pe toori ma yɛgɛ sɔgɔwɔ,
na ma naŋgbanwa sanga wi ka gbɔn, ma yiri pe kɔrɔgɔ.»

© 2014 WBT