19
1 Leana tu sa tie malaṉa sapu loke tinazutu pa nana tinoa,
hola nia sa tie pekipeki sapu boni beruna.
2 Lopu leana si be ṉaliṉali hoboro sa tie ba loketoṉa gilania,
babe bebeno si asa meke sea nia sa sa siraṉa.
3 Sa pinekipeki tanisa telena si ṉovalia sa nana tinoa,
gua ke pa bulona si ta ṉaziri nia sa se Zihova.
4 Na tinagotago si va kamo soku baere,
ba sa tie malaṉa si veko pania ri nana baere.
5 Sa tie va sosode kokoha si kaqu tava kilasa,
meke asa pu va vura koha si lopu kaqu govete.
6 Soku tie si hiva baeri sari na ṉati hiniva,
meke doduru tie si na baere tadirini pu varivariponi.
7 Sa tie malaṉa si ta doṉo palae koari doduru turaṉana,
meke gua tugo sari doduru nana baere!
Hata luli tugo sa pude zamai,
ba lopu ta dogoro sari nana baere.
8 Asa pu vagi tinumatumae si toka nia sa maqomaqona;
asa pu qetu nia sa ginilagilana si koa va leana.
9 Sa tie va sosode kokoha si kaqu tava kilasa,
meke asa pu va vura koha si kote mate.
10 Lopu doṉo pada pude sa tie pekipeki si koa guana tie tagotago,
babe pude sa pinausu si baṉara nia sa koburu tavia.
11 Na tie gilae si lopu bubugoro;
na nana vina lavata sa si pude doṉo pania sa sinea.
12 Sa tinaṉaziri tanisa baṉara si guana kurumu tanisa laione,
ba sa lineana tanisa si guana puni pa duduli.
13 Sa koburu pekipekina si na tinasuna tanisa tamana,
meke sa barikaleqe nominomi si guana honi ruku loke betona pa vetu.
14 Vetu meke poata si na tinago maedi koari tiatamadia ri koburu,
ba sa barikaleqe gilaena si mae guana koe Zihova.
15 Na hinakohako si variva puta muliuṉuna,
meke sa tie sapu udapelu si va kamo ovia.
16 Asa pu va tabei sari tinarae te Tamasa si lavelave nia sa nana tinoa,
ba asa pu kilui si kote mate.
17 Asa pu toka ni sari tie malaṉa si variponi koe Zihova,
meke kote pia ia Sa koasa lineana tavetia sa.
18 Tarae nia na va toṉotia sa tumu koreo, vasina mo koa sa hinarupu,
be lopu gua si kote vari tokae si goi koasa nana minate.
19 Sa tie bubugoro haru si kaqu vagia sa laena,
pana harupia goi, si kaqu harupu pilipule ia tugo goi.
20 Avosi sari na vina balau mamu va tabei sari na tinarae,
meke pa vina betona si kote gilae si goi.
21 Soku sari na hiniva pa bulona sa tie,
ba sa hiniva te Zihova si kote gorevura.
22 Sapu okoro nia sa tie si na tataru nabuna,
leana si be malaṉa ba lopu na tie kokoha.
23 Sa pinamaṉana e Zihova si variva toa;
kote koa va leana sa tie, meke tava leseve pa tinasuna.
24 Sa tie sapu udapelu si taṉini la pa ginani,
ba hakohako si asa pude vala nia sa ginani pa ṉuzuna.
25 Sekea sa tie va sisire va kaleana pude gilae sa tie pupuhu,
gegesia sa tie bokana balabala ba kote leana mo koasa.
26 Asa pu hiko koasa tamana meke hadu vura nia sa tinana
si variva kurekurena meke doṉo hikare.
27 Tuqu, pana noso va avosi goi sari na tinarae,
si kote va seu pule nigo koari na zinama va tumatumae.
28 Na tie va sosode kokohana si va sisire nia sa tinoṉoto,
meke sa ṉuzu tanisa tie kaleana si onolo kinaleana.
29 Sa vina kilasa pa vinari pitui si aqa ni sari na tie va gugue,
meke sari mudi dia rina tie pekipeki si aqa ta seke.