1 Hola kaiqa totoso si mate sa baṉara pa Amoni se Nahasi, meke sa tuna koreo si baṉara hobea. 2 Zama se Devita, sa baṉara, “Kaqu va dogoro nia rau sa qua binaere nabuna koe Hanunu, kekeṉoṉo gua sapu evaṉia e Nahasi sa tamana koa rau.” Ke garunu la tie paleke inavoso se Devita pude la tozia sa nana tinalotaṉa.

3 Sipu la kamo ri pa Amoni, si zama la ia rina koimata vasina sa baṉara, “Balabala ia goi sapu pa pinamaṉana sa tamamu si garunu mae nia tie e Devita pude mae tozia sa nana tinalotaṉa? Namu lokari hokara! Na tie piko si garunu mae ni sa hire, pude vilitia sa vasileana lavata pude boka va kilasa gita!” gua.

4 Ke tuqe vagi Hanunu sari na tie paleke inavoso te Devita, neri pani gumidi, meke magu pani sa pa totoso kopetedi sari dia poko, meke garunu taloa ni sa. 5 Kurekure hola dia pude pule la pa dia popoa. Totoso avoso nia Devita sapu gua ta evaṉa, si vala inavoso si asa koarini pude koa paki pa Zeriko osolae toqolo pule sari gumidi meke tiqe pule.

6 Sipu rovea sa baṉara Hanunu meke sari na tinoni Amoni sapu ele va sea la tu koe Devita si arini, si veko ni poata ka toloṉavulu made tina kilo mamatadi sari na siliva, pude tabara vagi paki sari na totopili varipera meke sari na tie koidi. Vagi rini pa batuna sage sa popoa Mesopotemia meke koari na pinaqaha popoa Ma'aka meke Zoba pa Siria. 7 Sari ka toloṉavulu rua tina totopili varipera sapu tabara ni rini meke sari na tie koidi, meke sari na tie varipera tanisa baṉara pa Ma'aka si mae koa pa ipi tata pa Medeba. Vura mae tugo sari na tie pa Amoni pa hopeke dia vasileana, mae va namanama pude varipera.

8 Avoso nia e Devita sapu gua asa, ke garunu la nia sa se Zoabi meke sa doduruna sa qeto minate. 9 Ene va tokele vura sari na tinoni Amoni meke hopeke la turu tokele pa dia tuturuana koasa siraṉa sapu la gua pa Raba, sa dia ṉati vasileana lavata. Meke sari baṉara pu mae guadi pa Siria pude vari tokae si va namanama pa kalina sa popoa koasa pavasa lavata.

10 Dogoria Zoabi sapu kote rapata mae gua pa kekenu meke pa mumudi sari na kana, ke vizata vagi sa sari na tie varipera bokabokadi pa Izireli, meke vekoi sa pa vasina kaqu mae gua sa qeto minate tadi pa Siria. 11 Sari doduru pule si vekoi sa pa kinopu te Abisai sa tasina, pude razai sari na tinoni Amoni. 12 Zama la koasa se Zoabi, “Pude dogoria goi sapu va kilasau rina tinoni Siria, si mae mamu toka nau, meke be va kilasigo rina tinoni Amoni si kote atu toka nigo rau. 13 Koa varane na mataqara! Mada varipera va ṉiṉirae poni sari nada tie, meke gua tugo sari na vasileana lavata te Tamasa. Mani gorevura sa hiniva te Zihova.”

14 Ke rizu la se Zoabi meke sari nana tie pude varipera gua, meke govete sari na tinoni Siria. 15 Sipu dogoria rina tinoni Amoni sapu govete taloa sari na tinoni Siria, si govete nia rini se Abisai sa tasina Zoabi, meke togolo nuquru pule la tu koasa vasileana lavata. Ke kekere pule la pa Zerusalema se Zoabi.

16 Totoso gilania rina tinoni Siria sapu tava kilasa si arini koari na tinoni Izireli, si garunu tie paleke inavoso si arini pude tioko la i sari na tinoni Siria saripu koa pa kali gasa rimata koasa Ovuku Iuparetisi. Koa si arini pa kinopu te Sopako, sa koimata koasa qeto minate varipera te baṉara Hadadeza pa Zoba. 17 Sipu avoso nia Devita sapu gua asa si varigara ni sa sari doduru qeto minate varipera pa Izireli. Karovia rini sa Ovuku Zodani, meke la turu va tia i rini sari na tinoni Siria, meke podalae sa vinaripera. 18 Meke hadu puleni rina tinoni Izireli sari na tinoni Siria. Va matei e Devita meke sari nana tie si ka zuapa tina tie varipera pa totopili, made ṉavulu puta tina tie varipera enedi, meke va matea tugo sa se Sopako sa koimata pa dia qeto minate varipera. 19 Sipu dogoria ri doduru baṉara pu toka nia se Hadadeza sa baṉara sapu tava kilasa si arini koari na tie Izireli, si la varibulei si arini koe Devita meke koa aqorae mo koasa. Ke korodia toka pule ni rina tinoni Siria sari na tinoni Amoni.