42
Zobi
1 Olaṉia Zobi se Zihova,
2 “Gilania rau, sapu Agoi tagoa sa ṉiniraṉira;
Agoi boka taveti doduru sapu koa pa Mua hiniva.
3 Nanasa si Agoi, ‘Esei si agoi pude zama sapu lopu toṉoto sari na Qua tinavete?’* Zob 38:2
Hinokara sapu zama ni rau sari ginugua sapu lopu gilani arau,
sari ginugua sapu tolava hola ke lopu boka tumae ni rau.
4 Zama si Agoi, ‘Kamahire mamu va avoso, pude Maqu zama si Arau:* Zob 38:3
Maqu nanasa igo si agoi,
meke agoi kaqu olaṉau si Arau.’
5 Na avoso nigo mo arau pa vivinei tadi na tie,
ba kamahire si dogoro soti Nigo mataqu rau si Agoi.
6 Ke kurekure ni rau sari qua zinama, equ hiva vagi pule ni;
gua ke maqu habotu pa korapa eba na kavuru pude qu vata dogoro nia sa qua tinalotaṉa sapu sea si arau.”
Vina betona
7 Mudina sapu zama se Zihova koe Zobi, si zama la si Asa koe Elipazi na tie pa vasileana nomana pa Temani, “Bugoro hola nigo Rau si agoi meke sari karua mua baere, sina lopu zama nia gamu sa hinokara pa guguaqu Rau, gua sa hinokara sapu zama ni e Zobi sa Qua nabulu. 8 Ke kamahire si mamu vagi lani koe Zobi ka zuapa bulumakao meke ka zuapa sipi kokoreo, mamu la va vukivukihi ni pude na mia vinukivukihi. E Zobi, sa Qua nabulu, kote varavarani gamu, meke kote va tabea Rau sa nana vinaravara meke lopu kaqu tavete atu ni Rau gua sapu garodi ri na mia zinama hoboro. Sina lopu hinokara si zama ni gamu pa guguaqu Arau, gua sa hinokara sapu zama ni e Zobi, sa qua nabulu.”
9 Ke lulia ari Elipazi sa tie pa vasileana nomana pa Temani, e Bilidadi, sa tie mae guana pa popoa Sua, meke e Zopara sapu mae guana pa popoa Neama gua sapu zama nia e Zihova, meke va tabea e Zihova sa vinaravara te Zobi.
10 Sipu beto varavara ni Zobi sari ka ṉeta nana baere, si mana pule nia e Zihova si asa, meke poni pule nia tinagotago Tamasa si asa karua totoso hola nia sapu tagoi sa tatasana.* Zob 1:1-3 11 Sari doduru tasina koreo, vineki, meke sari nana baere meke sari doduru pu gilania si asa si mae pa vetu te Zobi meke henahena turaṉia si asa. Va manotia rini si asa meke tozi dia tinalotaṉa koari na kinaleana pu vata raza ni e Zihova koasa. Meke hopeke ponia poata meke keke riṉi qolo arini si asa.
12 Mana nia e Zihova sa kukuru tinoa te Zobi hola nia sa minana pa totoso kekenu. Tagoi Zobi si ka manege made tina sipi, ka onomo tina kameli, karua tina bulumakao, meke keke tina doṉ'ki. 13 Meke ka zuapa tuna koreo meke ka ṉeta tuna vineki si asa. 14 Sa tuna vineki kenuna si e Zimaema pozana, sa vina rua si e Kezaia, meke sa mudina hokara si e Kereni Hapuku pozana. 15 Lopu ta dogoro pa ninae popoa pule sari vineki sapu tolavaedi hola gugua sari vineki te Zobi. Meke poni ni hinia tinagotago tugo sa si arini turaṉae koa ri na tasidia koreo.
16 Mudina asa si ka keke gogoto made ṉavulu puta vuaheni pule si toa se Zobi; dogori sa sari tuna meke sari tudia rina tuna kamo ka made sinage si toa kamoi sa. 17 Toa seunae meke barogoso va gorevura meke tiqe mate si asa.