143
Tayta Diosman yäracur mañacushan
David isquirbishan alabansa.
1 Tayta Dios, mañacaycämushäta wiyaycamay.
Ruwacaycämushäta wiyaycuy ari.
Yanapaycamay ari.
Gamga allimi canqui.
Aunishayquitaga cumlinquimi.
2 Gampa ñaupayquichöga manami pipis juchaynäga canchu.
Chayno captin nogataga ama jusgaycamaychu ari.* Rom. 3.20; Gál. 2.16
3 Chiquimajcunaga gaticachaycäman.
Pampaman lagacajpämi ñitiramasha.
Wañojcuna pamparaycashanno chacaychönöna cawanätami munan.
4 Fiyupa llaquishami caycä.
Yarpachacuycaptillämi shongöpis aburrïru ricacusha.
5 Unaycunapaj yarpärëmi.
Milagrucunata rurashayquipäpis yarpärë.
6 Gam cajmanmi macyaraycämö.
Gamtaga shuyaraycä chaqui allpa yacunaycajnömi.* Sal. 42.1–2; 63.1
Selah
7 Tayta Dios, juclla yanapaycamay ari.
Jämaynëpis ushacaycannachaj.
Ama cachaycamaychu.
Cachaycamaptiquega wañojcunanönachari cashaj.
8 Nogaga gammanmi yäracamö.
Chaymi musyachimay tutapaga cuyamashayquita.
Nogaga imata yarpashätapis gamtami willapä.
Chaymi tantiyaycachimay imano goyänäpäpis.
9 Nogaga chapämänayquipaj gammanmi yäracamö.
Chiquimajcunapita salbaycamay ari Tayta Dios.
10 Tantiyachimay gam munashayquino cawanäpaj.
Gammi Tayta Diosnë canqui.
Espirituyqui yanapämächun ari allillata ruranäpaj.
11 Tayta Dios rispitasha canayqui-raycu cawachimay ari.
Allita ruraj cashpayqui fiyupa llaquicuycajta jorgaycamay ari.
12 Aunishayquita cumlej cashpayqui, llapan chiquimajcunata illgarachiy.
Noga sirbishojniqui caycaptëga llapan conträcunata ushacächiy ari.