1 Chiri̱j chic ruꞌ, xwilow wach jenaj acꞌ taxa̱j richꞌi̱l jenaj acꞌ laj acꞌal maj reꞌ pe̱t taxa̱j richꞌi̱l i pe̱t acꞌal maꞌ xilmijic ta chic quiwach, maꞌ woꞌ reꞌ rinimal haꞌ xilmijic chic wach. 2 Jeꞌ woꞌ, reꞌ hin Wa̱n xwilow wach i lokꞌ laj tinamit, reꞌ Acꞌ Jerusalen. Ar cꞌahchiꞌ rikajic cho pan taxa̱j ru̱cꞌ i Dios, xa holohic chic ritikꞌinjic bano̱j, xa jeꞌ chic ricab naritikꞌa̱ꞌ ri̱b jenoꞌ ixkꞌun nariban caxa̱ra. 3 Chi jeꞌ aj reꞌ nok cꞌahchiꞌ wilom reꞌreꞌ, reꞌ hin xnibiraj nok jenaj xkꞌoric cho chi cow chi jeꞌ wili:

«Jeꞌ ricab chi reꞌ ta nak i yeꞌa̱b lokꞌonbal wi̱ꞌ wach i Dios enwihꞌic cu̱cꞌ take ritinami̱t, yuꞌna johtok chi kawach reꞌ take cꞌacharel nyeꞌeric queh chi encꞌacharic i Dios chi quixilac. Ru̱cꞌ i naricꞌuluric reꞌreꞌ narehtꞌaljic woꞌ i wili: Reꞌ take cꞌacharel wilque̱b chi ritinami̱t i Dios eh narikꞌormojic woꞌ chi reꞌ woꞌ Dios ncꞌulbic reh i lokꞌonic ncaꞌn take reꞌ. 4 Jeꞌ reꞌ ajic, nok reꞌ Dios wilic chic chi cꞌacharic chi quixilac, maꞌxta chic riwihꞌic chi quina̱ i tiꞌcꞌaxic reꞌ riban chi quiꞌokꞌic. Ar maꞌ hab ta chic wach enquimic je, maꞌ woꞌ hab ta chic wach enjikꞌjitic i ra̱mna ruꞌum tiꞌcꞌaxic maj maꞌxta chic riwihꞌic tiꞌcꞌaxic eh maꞌxta woꞌ chic riwihꞌic ntzꞌiric ruꞌum nok reꞌ nicꞌ paꞌ nimal xbanic chi xwihꞌic i tiꞌcꞌaxic, xiqꞌuic chic lok, nqui xikꞌor.

5 Chiri̱j reꞌreꞌ, reꞌ tzꞌuklic chipam i tzꞌuka̱b reh kꞌatbal kꞌoric, xikꞌor woꞌ chic chi jeꞌ wili:

«Reꞌ hin xinacꞌsaj take chiꞌnchel chaj bih wilic, nqui xikꞌor.

Chiri̱j chic ruꞌ xikꞌor woꞌ wi̱n chi jeꞌ wili:

«Chatzꞌihmbaj take kꞌoric xnikꞌor lok wili maj til manlic coric wach eh ricꞌul chi enchꞌiquinjic cꞌuxlis chiri̱j, nqui wi̱n.

6 Chiri̱j chic ruꞌ jeꞌ woꞌ chic wili xikꞌor wi̱n:

«Chiꞌnchel reꞌ xnikꞌor lok, xo̱j chic elok wach. Jeꞌ ricab ncꞌuluric ru̱cꞌ ritusjic wach take tzꞌihm chi wilic jenaj pꞌutbal cho reh eh wilic woꞌ jenaj cohlsbal wach, jeꞌ woꞌ reꞌ wu̱cꞌ i hin, hin woꞌ xinpꞌutbic cho reh chiꞌnchel eh hin woꞌ chic nanicohlsonic wach. Jeꞌ woꞌ chic, reꞌ hin quinbanic chi reꞌ take cꞌacharel equicꞌacharic chi junelic eh jeꞌ reꞌ nanibanam xa chi si̱ jeꞌ ricab ncꞌuluric nok jenoꞌ cꞌacharel chiki̱j richi̱ꞌ, maꞌ ritoj ta i haꞌ ruqꞌuej reꞌ nelic cho cu pa rasbal. Reꞌ cꞌacharel reꞌreꞌ naruqꞌuej reh i haꞌ reꞌreꞌ, maꞌ ricꞌraj ta chic i chikchiꞌi̱l. 7 Jeꞌ woꞌ chic, xa hab wach eriyew pa ro̱k rajawric i cꞌahbilal naniyeb reh chi narikꞌormojic chiri̱j chi til racꞌu̱n rixkꞌu̱n i Dios chic eh chi reꞌ woꞌ Dios ncꞌulbic cho reh i lokꞌonic riban i cꞌacharel reꞌreꞌ. 8 Tzꞌa̱b ruꞌ take xa quiyoꞌjic chic chi riyeꞌeric quicꞌux chiwi̱j chꞌi̱l take quibanic chiꞌnchel yibel wach noꞌjbal, chꞌi̱l take aj cansanel, chꞌi̱l take cꞌoyo̱m, chꞌi̱l take aj war, chꞌi̱l take quilokꞌonic wach take tikꞌimaj tiyo̱x eh chꞌi̱l woꞌ take chiꞌnchel aj chucul kꞌoric, naquicuturic jok chipam i yeꞌa̱b reꞌ xa ntenic chic cho rikꞌakꞌil eh xa sute̱n chic pa̱m chi asu̱pra reꞌ xa nquihic chic richuhil. Reꞌ tiꞌcꞌaxic naricꞌulmujic ar ribihnej woꞌ chi “Ricab Quimic”, nqui xikꞌor.

9 Chiri̱j chic ruꞌ xchalic wu̱cꞌ jenaj queh wuku̱b chi raj tzꞌeꞌ wa̱ch i Dios reꞌ wilic juꞌjun chi chꞌihchꞌ culc pan quikꞌab nujunak pa̱m ru̱cꞌ haꞌ reꞌ quijalwachej take juꞌjun chi wuku̱b chi tiꞌcꞌaxic nariyeꞌeric cho nacuxꞌok wach chiꞌnchel i wach acꞌal. Reꞌreꞌ jeꞌ wili xikꞌor wi̱n:

«Quim ayuꞌ, nanicꞌuhtam aweh i quiyeꞌa̱b take aj niminel reꞌ naquiwihꞌic wi̱ꞌ chi jeꞌ ricab jenaj ehqꞌuenbe̱s cꞌaxo̱j ruꞌum ribahi̱l. Nicꞌ paꞌ wach riban i bahilbe̱s reꞌreꞌ, jeꞌ woꞌ reꞌ quicꞌaxmajic take aj niminel nariban i Cꞌacharel rijalwachem ri̱b chi jeꞌ jenaj Qꞌuijol Me̱ꞌ, nqui wi̱n.

10 Chiri̱j aj reꞌ, reꞌ aj tzꞌeꞌ wa̱ch xiricꞌam je chi rilmijic jenaj ilo̱j chi toꞌbomaj nicapew-bal ruꞌum i Lokꞌ laj Uxlabal. Ar xincꞌamaric je china̱ jenaj rinimal yu̱kꞌ naht na̱ eh nok wilqui̱n chic ar xcꞌuhtjic wi̱n i lokꞌ laj rinimal tinamit Jerusalen chi cꞌahchiꞌ rikajic cho pan taxa̱j ar ru̱cꞌ i Dios. 11 Reꞌ tinamit reꞌreꞌ xa nrepretic chic ruꞌum risakil ruꞌum chi reꞌ risakomil i Dios nsutbic woꞌ ri̱j. Ruꞌum aj reꞌ xa nworwotic chic ncꞌutunic xa jeꞌ chic ricab jenaj nworwotic laj abaj on xa jeꞌ chic ricab risakomil pa̱m i jenaj abaj “Ja̱spe” ribihnal. 12 Jeꞌ woꞌ chic, reꞌ tinamit Jerusalen sutumaj ri̱j chi nimak tak tzꞌak abaj naht na̱ eh til woꞌ naht na̱ i tzꞌak abaj kꞌetbal ri̱j i tinamit reꞌreꞌ. Wilic cablaj ritzꞌahpil eh chi chi̱ꞌ juꞌjun chi tzꞌahp wilic jenaj raj tzꞌeꞌ wa̱ch i Dios chi aj chaꞌjanel reh. Chi wach juꞌjun chi tzꞌahp tzꞌihmbimaj quibihnal take juꞌjun queh take cablaj chꞌuk chi tinamit ra̱ꞌ riꞌsil cho maꞌ Israhel. 13 Xib chi tzꞌahp wilic chi ricorquil reꞌ njohtic cho wi̱ꞌ i kꞌi̱j, xib wilic pa ritzꞌe̱t, xib chic wilic pa risecꞌa̱j eh xib chic wilic chi ricorquil reꞌ nkajic wi̱ꞌ i kꞌi̱j. 14 Reꞌ rinimal take nimak tak abaj sutumaj wi̱ꞌ ri̱j i tinamit reꞌreꞌ, ar chꞌiclic chi quina̱ take cablaj chi abaj reꞌ tzꞌihmbimaj wi̱ꞌ quibihnal take cablaj chi nahsil raj tahkanel i Cꞌacharel rijalwachem ri̱b chi jeꞌ jenaj Qꞌuijol Me̱ꞌ.

15 Nok cꞌahchiꞌ wilom i cꞌuhtumaj wi̱n chiri̱j i tinamit Jerusalen, reꞌ hin xwilow woꞌ chi reꞌ raj tzꞌeꞌ wa̱ch i Dios cꞌahchiꞌ chi kꞌoric wu̱cꞌ wilic jenaj ripajbal pa rikꞌab tikꞌimaj ru̱cꞌ kꞌan woric laj chꞌihchꞌ. Reꞌreꞌ naricamanic reh chi ripajaric i tinamit Jerusalen chꞌi̱l i ritzꞌahpil eh chꞌi̱l woꞌ maꞌ laj tzꞌak sutumaj wi̱ꞌ ri̱j i tinamit reꞌreꞌ. 16 Jeꞌ reꞌ ajic na xoquic chi ripajaric i tinamit Jerusalen, xelic junikꞌob lajcꞌahl (600) le̱wa rinimal ro̱k, jeꞌ woꞌ reꞌ nahtil na̱ eh jeꞌ woꞌ reꞌ rinimal wach maj reꞌ tinamit reꞌreꞌ cajtzꞌuꞌc chi jenaj wach quinimal bano̱j nok tikꞌimaj. 17 Chiri̱j i pe̱t pa̱j xiban reꞌreꞌ, reꞌ aj tzꞌeꞌ wa̱ch xipaj woꞌ i nimak tak abaj sutumaj wi̱ꞌ ri̱j i tinamit reꞌreꞌ eh jeꞌ na caꞌwinak (40) ja̱ xelic chiwach. Reꞌ pajbal xicoj i raj tzꞌeꞌ wa̱ch i Dios jenaj woꞌ wach chꞌi̱l i pajbal cojo̱j kuꞌum hoj cꞌacharel. Naxiban i reꞌreꞌ jeꞌ wili xwilow chiri̱j i Jerusalen: 18 Reꞌ tusuj abaj sutumaj wi̱ꞌ ri̱j i tinamit reꞌreꞌ jeꞌ ru̱cꞌ i holohic laj rex abaj “Ja̱spe” ribihnal eh reꞌ tikꞌimaj wi̱ꞌ take pa̱t chipam tinamit reꞌreꞌ jeꞌ ru̱cꞌ kꞌan woric laj chꞌihchꞌ maꞌ xilacamaj ta wach ru̱cꞌ toco̱m chic chꞌihchꞌ, xa nlemuhunic laꞌ chic. 19 Reꞌ take cablaj chi abaj chꞌiquimaj wi̱ꞌ i tusuj abaj sutumaj wi̱ꞌ ri̱j i tinamit, xoyomaj take ru̱cꞌ holohak laj abaj chi jeꞌ wili:

21 Reꞌ chic take i cablaj chi tzꞌahp wilic reh i tinamit reꞌreꞌ xa jeꞌ chic take holohic laj abaj “Pe̱rla” ribihnal eh jeꞌ reꞌ quitikꞌinjic bano̱j chi quijuꞌjunal.

Reꞌ rinimal wach i be̱h chipam tinamit reꞌreꞌ tikꞌimaj ru̱cꞌ kꞌan woric laj chꞌihchꞌ maꞌ xilacamaj ta ru̱cꞌ toco̱m chic chꞌihchꞌ, xa nlemuhunic laꞌ chic. 22 Chipam i tinamit reꞌreꞌ maꞌ xwilow ta chic wach i Lokꞌ laj Pa̱t reꞌ nlokꞌonjic wi̱ꞌ wach i Dios ruꞌum chi xa reꞌ woꞌ i kAja̱w Dios reꞌ kꞌe̱ꞌ woꞌ chic rinimal wach rajawric wilic, nariwihꞌic ar chi maꞌxta chic jenoꞌ pa̱t narilokꞌonjic wi̱ꞌ wach richꞌi̱l i Cꞌacharel rijalwachem ri̱b chi jeꞌ jenaj Qꞌuijol Me̱ꞌ. 23 Jeꞌ woꞌ chic, reꞌ tinamit Jerusalen xinwilow maꞌxta chic ricamanic reh i risakomal i kꞌi̱j maꞌ woꞌ reꞌ chic i risakomal poh maj reꞌ tinamit wili narisakomjic ruꞌum rinimal i sakom nsutunic ri̱j i kAja̱w Dios eh jeꞌ woꞌ ruꞌum i sakom nsutunic ri̱j Cꞌacharel rijalwachem ri̱b chi jeꞌ jenaj Qꞌuijol Me̱ꞌ. 24 Til kꞌe̱ꞌ woꞌ chic sakomal nariwihꞌic chipam i Jerusalen reꞌreꞌ, chi til narisakomem take tinamit coꞌlomaj take ruꞌum i Dios chiwach i tiꞌcꞌaxic. Jeꞌ woꞌ chic, reꞌ Jerusalen kꞌe̱ꞌ woꞌ rajawric nariwihꞌic chi reꞌ take kꞌatal kꞌoric ayuꞌ wach acꞌal, ar chic chipam naquicꞌamam cho quibihomal. 25 Jeꞌ woꞌ, chipam i tinamit maꞌxta chic roquic kꞌekom eh chi jeꞌ reꞌ maꞌ jaruj ta chic naritzꞌapjic ritzꞌahpil i ocbal maj maꞌxta woꞌ chic riwihꞌic jenoꞌ yohbal. 26 Chipam aj i Jerusalen reꞌ, reꞌ take juꞌjun chi tinamital naquicꞌamam cho rinimal wach quibihomal chi riyeꞌeric rilokꞌil i Dios, 27 reꞌ cok ruꞌ, xa reꞌ wach take tzꞌihmbimaj quibihnal chipam i hu̱j reꞌ tzꞌihmbimaj wi̱ꞌ quibihnal take yeꞌo̱j chiqui̱j chi naquicꞌacharic chi junelic kꞌi̱j sakom ruꞌum i Cꞌacharel rijalwachem ri̱b chi jeꞌ jenaj Qꞌuijol Me̱ꞌ, xa reꞌ wach take reꞌ nacoquic chipam take ritzꞌahpil i yeꞌa̱b reꞌreꞌ. Ruꞌum aj reꞌ maꞌ jenoꞌ queh take aj banol reh i yibel wach noꞌjbal nacoquic cok ar, jeꞌ ricab take aj chucul kꞌoric. Jeꞌ reꞌ nikꞌor maj reꞌ take reꞌ wilque̱b chi quixilac take ncaꞌn xa paꞌ jaric chic jenoꞌ cꞌahbilal eh chi jeꞌ reꞌ quiwi̱ꞌ maꞌ jaruj ta nacoquic chipam i yeꞌa̱b reꞌreꞌ.