1 Co conchienhe canxion xifariseo ngain Jesús conixin icanxin ximaestroe ley Israel que joixin de ngain ciudad de Jerusalén. 2 Chojni mé vicon ixin canxion chojni que vacao Jesús vaconttiha na jinda rá na tsje nttiha are vane na inchin ttetonha costumbré na. Mexinxin xifariseo co ximaestroe ley feo nichja xa de ixin chojni que vacao Jesús. 3 (Jamé ixin cain xifariseo co icha chojni Israel anto vaguitticaon na co vanchehe na costumbré cain ndogoelitoe na ẍanc̈hjen are icha saho. Rroc̈ho que cainxin tiempo vacontti na jinda rá na tsje nttiha saho de vane na. 4 Co are vaquixin na ndásin co si vaconttiha na jinda rá na tsje nttiha saho, vajineha na. Cai vechonda na tsje costumbre icha, inchin queẍén vacjén na taza co chi co traste de chia co saoen na.) 5 Cottimeja joanchiangui na ngain Jesús co ndac̈ho na:

―¿Quedonda chojni que c̈hjiho ditticaonha na costumbré ndogoelitoa na ẍanchjen? Ixin jehe na tonttiha na jinda tsje nttiha saho que jine na.

6 Cottimeja Jesús ndac̈ho ngain na:

―¡Jaha ra chojni que ncheha inchin ndac̈ho! Mexinxin nchao diquentaxin Isaías janhi de ixin jaha ra:

9 Co Jesús ndac̈ho ngain na cai:

―Jaha ra coín ra ná lado tti ttetonha Dios para nchao nchehe ra inchin ndac̈ho costumbrea ra. 10 Ixin ley que vayé Moisés ndac̈ho: “Ttjiho ra respeto ngain ndodá ra co ngain janná ra”, co “Tti rronichja jianha ngain ndodé o ngain janné, chojni mé jiquininxin ndasenhe.” 11 Pero jaha ra ndac̈ho ra ixin ná chojni nchao rrondache ndodé o janné: “Janha c̈hoha tsjenguijna soixin ixin cain tti janha chonda, mé Corbán” (co jihi rroc̈ho ixin jehe ojoanjo cain mé ngain Dios). 12 Co si ná chojni ndac̈ho jañá, jaha ra itanc̈hjandaha ra para tsjenguijna ndodé o janné. 13 Co jañá jaha ra incheha ra caso tti ttetonha Dios, sino que jeho nchehe ra inchin costumbre que vayehe ra de ngain ndogoelitoa ra co tti jaha ra nchecoenhe ra xanha ra jai. Co nchehe ra icha cosa jianha inchin jihi cai.

14 Cottimeja Jesús nichjé cainxin chojni iná co ndac̈ho ngain na:

―Ttinhi ra jian cainxin tti janha rrondac̈hjan co ttinxin ra. 15 Jeha tti jine chojni nchejianha na. Tti ttixin ansén chojni, mé tti nchejianha chojni. 16 Jaha ra que ttinxin ra, ttinhi ra jian.

17 Cottimeja Jesús cjan sajoixinhi nchia, co are Jesús ngaxinhi nchia, chojni que vacao Jesús joanchiangui na ngain jehe ixin quehe rroc̈ho ejemplo mé. 18 Co Jesús ndac̈ho ngain na:

―¿Acai jaha ra ttinxinha ra? ¿Attinxinha ra que jeha tti jine chojni nchejianha na? 19 Tti jine chojni ttjiha ngaxinhi ansén. Cain mé sattji ngaxinhi tsehe, cottimeja chonda que dac̈hje.

Jañá rroc̈ho que chojni nchao jine cain cosa. 20 Co ndac̈ho Jesús cai:

―Tti ttixin de ngain ansén chojni, mé tti nchejianha na. 21 Ixin de ngaxinhi ansén na dac̈hjexin cosa jianha que jehe na ẍaxaon na: jehe na ẍaxaon na para sincheyehe na c̈hihi iná tattíta, co para nasoenxon na chojni, 22 co para tsé na cosé iná chojni. Co ixin jianha ẍaxaon na, cai jehe na rinao na rrochonda na cosé icha chojni, co nchehe na cosa jianha, co ncheyehe na icha chojni, co tosoeha na para nchehe na tti jianha, co chjoehe na, co nichja na ndoaha de icha chojni, co anto orgulloso na, co ncheha na jian ngain icha chojni. 23 Cainxin cosa jianha yá ttixin de ngaxinhi ansén na co nchejianha na.

24 Cottimeja sacjoixin Jesús de nttiha co sacjoi ngain region tti te ciudad de Tiro co Sidón. Co are Jesús joiji nttiha vittja ná nchia para vittohe. Pero joinaoha ixin rroconohe chojni ttinó vehe jehe. Pero masqui jamé, chojni conohe na ttinó vehe Jesús. 25 Co ngain región mé vehe ná xannc̈hí que vechonda xan espíritu jianha. Co anto daca conohe janné xan ixin nttiha vehe Jesús. Co cjoi naníta mé tti vehe Jesús co vettoxin nttajochjihi ngain Jesús. 26 Naníta mé jeha judía, jehe joixin iná nación dinhi Sirofenicia. Pero joinchetsenhe ñao Jesús ixin Jesús santsjexin espíritu jianha de ngain xenhe naníta mé. 27 Pero Jesús ndac̈ho ngain naníta mé:

―Tajanda que saho tsjenguijna chojni judío que mé chojní Dios. Ixin nchaoha jí si ná ndodaha santsjehe ndo xenhe ndo niottja para rrochjé ndo conia nio.

28 Cottimeja naníta mé ndac̈ho ngain Jesús:

―Ján, ndoa, pero conia que te ngangui mesa nchao jine va tti nchoe niottja que ttinttjingui chjan.

29 Cottimeja ndac̈ho Jesús:

―Ján, nchao ndac̈ho jaha. Onchao sattji jaxon ixin espíritu jianha osacjoixin de ngain xanha.

30 Co are naníta mé joiji nchiandoha, vittja xenhe ngataha saon tají xan co espíritu jianha que vechonda xan icoha; osadicjixin de ngain xan.

31 Cottimeja Jesús sacjoixin de ngain región tti jí ciudad de Tiro co vatto ngain ciudad de Sidón co tti rajna que te regioen Decápolis, hasta que joiji ngain lago de Galilea. 32 Co nttiha joiaohe na Jesús ná xí que c̈hoha vaquinhi co c̈hoha vanichja. Co joinchetsenhe na ñao Jesús ixin tsín rá ngataha xí mé, para rroxingamehe. 33 Cottimeja Jesús vac̈hjendacaho xí mé de ngayehe chojni, co ẍandoho dedoe ngadoho ndatsjoen xa co chjé nttatté dedoe co cattehe neje xa. 34 Cottimeja tsjehe Jesús para ngajni, co váva soji co ndache xa:

―¡Efata! ―que rroc̈ho: ¡Xirehe!

35 Co xiré ndatsjoen xa co onchao coinhi xa co onchao nichja xa jian. 36 Co Jesús coetonhe cain chojni nttiha ixin rrondac̈hoha na quehe joinchehe Jesús. Pero masqui Jesús anto vaquetonhe na ixin rrondac̈hoha na, jehe na icha vaquequin na. 37 Co chojni mé anto vagoan na admirado co vandac̈ho na:

―¡Cainxin nchao nchehe! Ixin hasta chojni que ttinha, jehe nchao nchequinhi co chojni que c̈hoha nichja, jehe nchao nchenichja.