Xroon kuayéꞌe sen Hebreo
1
Ndo Dio nichjaꞌina ndo ixi Chjenꞌen ndo
1 Ó seno ndo Dio nanaó nichjeꞌe ndo sen tachríꞌina xranchrjen ixi sen kuanichjaxin chijnie ndo Dio ko itsjé ngeꞌe juako ndo. 2 Ko nchakon tsaxi tsjexixin kain ngeꞌe ndo Dio nichjaxin ndo Chjenꞌen ndo, xjan Jesucristo. Ndo Dio chjée ndo Jesucristo juachaxin juinchekonchjian ndo kain ngeꞌe jii xasintajni ko ngajní, ko jeꞌe ndo Jesucristo kuayéꞌe ndo juachaxin ixi tsetuanꞌan ndo kain ngeꞌe. 3 Ko ndo Jesucristo xrajeꞌo chjiixro chónda ndo xranchi chjiixro chónda ndo Dio, ko jeꞌe ndo naxrajeꞌo ndo xranchi ndotée ndo ko ixi juachaxin chonda ndo meꞌe jichón kain ngeꞌe. Ko ixi ndo Jesucristo kuenꞌen ndo, méxin juincheméꞌe ndo kain jíei̱na, ko tjumeꞌe bakeꞌe ndo ndatsjonxin jian ti jitetuanꞌan Ndotée ndo.
Chjenꞌen ndo Dio ícha tetuanꞌan ixi sen ángel
4 Chjenꞌen ndo Dio, kuayéꞌe juachaxin ixi ícha tsetuanꞌan ndo ixi sen ángel ixi jeꞌe ndo tikinixinꞌen ndo xrochónda ndo ícha juachaxin. 5 Méxin, ndo Dio ndacheꞌa ndo ninaa sen ángel:
Jaꞌa Chjanꞌna,
ko janꞌan ndachrja̱n ixi janꞌan Ndotáa.
Ko kaxon ndachro ndo:
Janꞌan xrokjanna Ndotáa,
ko jaꞌa chjanꞌna.
6 Ko nchakon xruanꞌan ndo Dio chjenꞌen ndo, xjan naakuaxon, ngataꞌa nunte xasintajni, ndachro ndo Dio:
Kain sen ángel naꞌna tsajon sen juasaya ngajin chjanꞌna.
7 Ko ndachro ndo Dio ixi sen ángel:
Sen ángel juntáña janꞌan xranchi chrinto, jeꞌe sen,
ko sen ncheꞌe xra̱na xranchi xroꞌi tjama, meꞌe jeꞌe sen.
8 Ko ndo Dio ndache ndo Chjenꞌen ndo:
Jaꞌa ndo Dio tsetuanꞌan kain nchakon
ko jaꞌa jian tsetuanꞌan.
9 Jaꞌa tjueꞌe kain ti jian,
ko ningakonꞌen ti ndakoꞌa jii.
Méxin, ndo Dio kuinchaꞌa ndo jaꞌa, ndo Dio naꞌa.
Ícha ijié juaxruxin tjáa ndo
ixi ikaxin sen kuajikuꞌa.
10 Kaxon ndachro ndo:
Jaꞌa Ncháina, juinchekonchjian nunte xasintajni* xasintajni mundo ti xraxrangíxixión konchjian kain ngeꞌe,
ko kaxon juinchekonchjian ngajní,
kain meꞌe tjáa juincheñaxian.
11 Kain jiꞌin tsjexin ko tsontaxi xranchi manta tetsáani,
jeꞌo jaꞌa tsarichuan kain nchakon.
12 Kain jiꞌin xranchi naa manta tetsáani ó tjokéꞌe ko ndáꞌa tjankani,
xranchi chujni tindoxinꞌen manta jiá,
kain meꞌe tsjexin.
Jeꞌo jaꞌa kain nchakon tsarichuan
ixi jaꞌa tsjexinꞌa.
13 Ndo Dio ndacheꞌa ndo ninaa sen ángel jaꞌin:
Takeꞌé ndatsjonxin jian ti ritjén janꞌan, tsakeja janꞌan ni ningakonꞌan ngangi tutáa.
14 Kain sen ángel meꞌe espíritu tikonꞌani ncheꞌe ixra̱ ngajin ndo Dio ixi jeꞌe sen kuituenꞌen sen tsingijna sen chujni tsitjáñaꞌi aséen ko tsechón kain nchakon.