1 Juexin nichja ndo Jesús kain jiꞌi, tjumeꞌe sakjui ndo nunte Galilea ko kuiji ndo tjajna Judea, nunte jii chjuya ti jii indajitinga ndatinꞌin Jordán. 2 Ntiꞌa kueya chujni ruéꞌe ndo ko itsjé ni niꞌe juinchexruenꞌen ndo.

3 Ko tjumeꞌe kaxin xi fariseo konchjiñeꞌe xa ngajin ndo Jesús ko juanchangiꞌe xa ndo ixi tjaun xa ndakoꞌa xrojuatingíexin ndo, ko jaꞌin ndachro xa:

―¿Á chao jañao naa xi tsintuꞌe xa nchrinchriꞌe xa maski nchrinchriꞌe xa xroꞌan ngeꞌe ti ndakoꞌa juincheꞌe nchra?

4 Ko ndo Jesús jaꞌin juatingíexin ndo:

―¿Á kuangiꞌanta ngeꞌe ndachro xroon chijnie ndo Dio?, ixi “jeꞌe ndo juinchéña ndo kain chujni, xi ko nchri juinchéña ndo.” 5 Ko kaxon ndachro ndo: “Méxin chujni xi tsintuꞌe xa ndotée xa ko janée xa ko tsuteꞌe xa nchrinchriꞌe xa ko yui jeꞌe na̱ í jeꞌa yuu na̱, ixi ó xranchi xrokjui naakua naa chujni.” 6 Méxin í jeꞌa yuu na̱. Naꞌi. Jai ó xranchi naakua naa chujni, méxin xroꞌan chujni tsonchjeya ni kuteꞌe, ni chjée ndo Dio juachaxin tsekao kichuu na̱.

7  Mt. 5:31.*Ko xi fariseo juanchangiꞌe xa ndo:

―¿Sonda tjumeꞌe ndo Moisés kuajon ndo juachaxin tsoña̱ naa xroon ko xroon meꞌe xronichja ixi chao tsintuꞌe kichuu na̱?

8 Ko ndo Jesús ndachro ndo:

―Ndo Moisés kuajon ndo juachaxin tsonchjian xroon xrochjeyaxin xi ko nchri, ni stekao kichuu, ixi chujni tsango icha aséen na̱ko tjaunꞌa na̱ tsitikaon na̱ chijnie ndo Dio. Ko ti nchakon xrangíxixión kain ngeꞌe, kuancheꞌa na̱ jaña. 9  Mt. 5:32; 1Co. 7:10, 11.*Méxin, janꞌan ndachrja̱n siá xrojan jaꞌanta tjaunnta tsintuꞌenta janchriꞌanta ko siá janchriꞌanta juitéxinꞌa jan inaa xi, jaꞌanta juaꞌi tsintuꞌenta jan ko chondaꞌinta juachaxin ixi tsutaꞌanta inaa nchri. Ko siá sincheꞌenta jaña, jaꞌanta tsamanta ijie̱. Kaxon ngixeꞌi naa xi tsuteꞌe naa nchri, nchri kuayéꞌe xroon chjeyaxin chujni, xi meꞌe tsama xa ijie̱ kaxon.

10 Tjumeꞌe sen teyuu chrikao ndo Jesús ndachro sen:

―Siá ni tintekuteꞌe jaña ncheꞌe na̱, cháña tsuteꞌani.

11 Méxin ndo Jesús ndachro ndo:

―Chijni jiꞌi kainꞌa sen tienxin sen chijni. Jeꞌo tienxin sen chjée ndo Dio juachaxin ixi tsuteꞌa sen. 12 Nduaxin jiꞌi, kaxin xi juaꞌi tsuteꞌe xa, ixi ti xratsijongíexión xa juaꞌi tsuteꞌe xa. Ikaxin xa juincheniꞌe na̱ xa, méxin juaꞌi tsuteꞌe xa, ko jii ikaxin sen tjaunꞌa sen tsuteꞌe sen ixi tjaun sen sincheꞌe sen ixra̱ ngajin ndo Dio, méxin ti rintakuanꞌannta jai jeꞌo tsienxin sen tjaun sincheꞌe jaña.

13 Tjumeꞌe bikaꞌo na̱ kaxin ichjan ixi tjaun na̱ tsakeꞌe itja ndo Jesús ngataꞌa xjan ko xronichjeꞌe ndo ndo Dio ixi jeꞌe xjan. Ko sen teyuu chrikao ndo Jesús kuyakutee sen ni bikaꞌo xjan. 14 Ko jeꞌe ndo Jesús ndachro ndo:

―Tintuꞌenta ichjan tsi̱i̱ xjan ngajin ko tingakuenꞌanta xjan ixi sen sincheꞌe xranchi ncheꞌe naa ichjan, sen meꞌe tikinixinꞌen sen tixinꞌin sen ngajní ti tetuanꞌan ndo Dio.

15 Juexin bakeꞌe itja ndo ngataꞌa xjan, sakjuixin ndo ntiꞌa.

16 Naa chajan kui̱i̱ chán kuitsjeꞌe chán ndo Jesús ko juanchangiꞌe chán ndo:

―Jaꞌanta ti nchekuenꞌennta chujni tsango jiannta, ¿ngeꞌe xrokonda sintaꞌa ixi tsayáꞌa̱ juachaxin tsarichón kain nchakon?

17 Ko jeꞌe ndo jaꞌin juatingíexin ndo:

―¿Sonda ndachrua ixi janꞌan jianna? Jeꞌo ndo Dio, jeꞌe ndo jian ndo. Ko siá tjauan nduaxin tsarichuan, xrokonda tsitikaoan chijnie ndo Dio.

18 Ko jeꞌe chán ndachro chán:

―¿Ngixeꞌe chijni meꞌe?

Ko ndo Jesús ndachro ndo:

―Koꞌa juachaxin naatsóñaxuan naa chujni, koꞌa juachaxin tsixintexian naa nchri chónda xixiꞌe, koꞌa juachaxin ixi tse̱ꞌe̱, juaꞌi sincheya ixi sincheniꞌe inaa chujni. 19 Chóndeꞌe juasaya ndotáa ko janáa, kaxon tjueꞌé chujni xranchi tjueꞌe asáan.

20 Ko jeꞌe chán ndachro chán:

―Kain chijni jiꞌin kuitikaꞌon xrachiona. ¿Ngeꞌe ícha titjáña sintaꞌa?

21 Ko ndo Jesús juatingíexin ndo:

―Siá nduaxin tjauan sinchetjúá asáan, nchekjia kain ngeꞌe tjintee chonda, ko tonchjiyeꞌe sen nóa kain tomia. Ko meꞌe xrochónda ti tjintee jii ngajní. Tjumeꞌe tsjiꞌia ko xrokjan jaꞌa naa sen ruaꞌna.

22 Ko kuinꞌen chán jaña, tsango koniꞌe aséen chán, sakjui chán ixi tsango itsjé ngeꞌe ti tjintee chónda chán.

23 Tjumeꞌe ndo Jesús ndache ndo sen teyuu chrikao ndo:

―Nduaxin xrontatjunta ixi tsango tangi tsixinꞌin ngajní ti tetuanꞌan ndo Dio, naa chujni chónda itsjé tomi. 24 Ko nduaxin ntatjunta ixi ícha tangiꞌa tsixinꞌin naa kucamello ikon naa ntachika, ixi naa chujni chónda itsjé tomi tixinꞌin ti tetuanꞌan ndo Dio.

25 Ko sen teyuu chrikao ndo kuinꞌen sen ngeꞌe nichja ndo, tsango kuiyeꞌe ñao sen, ko juanchangiꞌe kichuu sen:

―¿Ngisen tsjacha tsechón kain nchakon tjumeꞌe?

26 Ko ndo Jesús jitsjeꞌe ndo sen, meꞌe ndachro ndo:

―Chujni juaꞌi tsechón na̱ kain nchakon. Jeꞌo ndo Dio tajon ndo juachaxin tsechón chujni.

27 Tjumeꞌe ndo Pedro ndachro ndo:

―Nchána, janꞌanna kuintuꞌana kain ti kuachondana ko ruaꞌananta. ¿Janꞌanna ngeꞌe tsjachana?

28  Mt. 25:31; Lc. 22:30.*Ko ndo Jesús juatingíexin ndo:

―Nduaxin ntatjunta nchakon tsi̱i̱ tsoña̱ natjúá kain ngeꞌe, nchakon Chjenꞌen ndo Dio, xjan tsijongíꞌe xranchi chujni, tsakeꞌe xjan nunte ngataꞌa ntaxitaon ti tsetuanxin xjan ko tsjako xjan ti ijié juachaxin chonda xjan, tjumeꞌe kaxon jaꞌanta ti rueꞌénta xjan xrochondanta teyuu ntaxitaon tsituanxinnta ko sinchéñaxinnta ijie̱ ngajin ti teyuu tjajna neꞌe Israel. 29 Ko kain sen kuintuꞌe ndoꞌa, ko sen kuintuꞌe ndo kichuu ko jan kichuu, ndotée o̱ janée, janchriꞌe o̱ chjenꞌen o̱ nunteꞌe ixi kuitikaonna sen ko ruaꞌna sen janꞌan, sen meꞌe tsango itsjé ngeꞌe tsayéꞌe sen ko kaxon tsechón sen kain nchakon. 30  Mt. 20:16; Lc. 13:30.*Ko kueya sen jai tsango tetuanꞌan sen, nchakon meꞌe ítsetuanꞌi sen. Ko kueya sen tjinteꞌa jai, nchakon meꞌe jeꞌe sen ícha tsetuanꞌan sen.