1  Lc. 10:38, 39.*Bakeꞌe naa xi niꞌe ndatinꞌin Lázaro, tjajnée xa Betania, tjajnée nchri María ko nchri Marta, nchri kichuu xa. 2  Jn. 12:3.*Nchri María, nchri kichuu xi Lázaro xi niꞌe, nchri meꞌe nchri bikitée nda chaxro xraxe tutée ndo Jesús ko juinchexemaxin nchra tutée ndo ixi xrajaa nchra. 3 Ko kayui nchra, kichuu nchra, xruanꞌan nchra naa ngisen ndache ndo Jesús:

―Ncháina, xi tjentúa niꞌe xa.

4 Ko kuinꞌen ndo Jesús ko ndachro ndo:

―Ichin chónda xa jeꞌa tsenxin xa ichin meꞌe. Naꞌi. Jiꞌi tsjako juachaxin ijié chónda Chjenꞌen ndo Dio.

5 Ko maski ndo Jesús tsango tjueꞌe ndo nchri Marta, ko kao nchri kichuu nchra ko xi Lázaro, 6 hora ndache na̱ ndo niꞌe xi Lázaro, xrakuituꞌe ndo yuu nchakon ti no jii ndo. 7 Ko tjumeꞌe ndache ndo sen chrikao ndo:

―Ichjina íjngo nunte Judea.

8 Ko juatingíexin sen chrikao ndo:

―Maestro, xrachóndaꞌi itsjé nchakon, ni judío tjaun na̱ xrokóñaxinna na̱ ixro. ¿Á íjngo tjaunnta itsjinta ntiꞌa?

9 Ko ndachro ndo Jesús:

―¿Á jeꞌa nchakon chónda teyuu hora? Siá tanchakon ichrjini tontengixinꞌani ixro ixi jii xroꞌi tingasáñaxin nunte xasintajni. 10 Ko siá ichrjini tiie tontengixinni ixi koꞌa xroꞌi.

11 Tjumeꞌe ndachro ndo Jesús:

―Xi Lázaro, xi tjentona, jijua xa ko itsji sintaxingamaꞌa xa.

12 Ko ndachro sen chrikao ndo:

―Ncháina, siá jijua xa, chao xroxruenꞌen xa.

13 Ko ti ndachro ndo Jesús xrondachro ixi tsikenꞌen xi Lázaro. Ko sen teyuu chrikao ndo xraxaon sen ixi jeꞌo ndachro ndo jijua xa. 14 Tjumeꞌe ndako chronga ndo Jesús:

―Xi Lázaro tsikenꞌen xa. 15 Ko juaxruxin ritjén ixi koꞌana ntiꞌa ixi jaꞌanta tsikonnta ko tsitikaonnta. Ko jai ichjina tsitsjeꞌena xa.

16 Tjumeꞌe ndo Tomás, ndo nchekinꞌin sen xjan kuatsi, ndache ndo sen kaxin:

―Kao jai̱na ichjina ko tsenꞌen na̱ xranchi ndo Jesús.

17 Nchakon kuiji ndo Jesús ntiꞌa, konoꞌe ndo ixi xi Lázaro ó chónda noó nchakon tsixrabaa xa. 18 Tjajna Betania ko tjajna Jerusalén tjenka ste yui tjajna, xranchi yuu kilómetro kutuꞌo kjínxin ste tjajna. 19 Ko itsjé ni judío ikjui na̱ kuitsjeꞌe na̱ nchri Marta ko nchri María, kuinichjeꞌe na̱ nchra ixi jitoniꞌe aséen nchra ixi kuenꞌen xi kichuu nchra. 20 Hora kuinꞌen nchri Marta ixi ó jiti̱i̱ ndo Jesús, kuachrje nchra biketan nchra ndo. Ko nchri María kuituꞌe nchra nchia. 21 Ko nchri Marta ndache nchra ndo Jesús:

―Ncháina, siá jaꞌa xrobakeꞌe ntiꞌi, xrokuenꞌa xi saona. 22 Ko nóna ixi ndo Dio xrotjáa ndo kain ngeꞌe tsjancheꞌe ndo.

23 Ko ndache ndo Jesús nchra:

―Xisaua xroxechón xa íjngo.

24 Nchri Marta ndachro nchra:

―Janꞌan nóna xroxechón xa íjngo nchakon xroxechón kain ni tsikenꞌen, nchakon tsjexixin kain ngeꞌe.

25 Ko ndachro ndo Jesús:

―Janꞌan ntaxechón chujni ko tajon juachaxin tsechón chujni. Ngisen titikaonna, maski tsenꞌen sen, xroxechón sen íjngo. 26 Ko kain sen xra jichón ko titikaon sen, naiꞌa tsenꞌen sen. ¿Á titikáoan jiꞌi?

27 Jeꞌe nchra ndachro nchra:

―Jaán, Ncháina, janꞌan titikaꞌon ixi jaꞌa ndo Cristo, Chjenꞌen ndo Dio, ndo xrokui̱i̱ nunte xasintajni.

28 Ó juexin ndachro nchri Marta jaña, ko sakjui nchra kuiyeꞌe nchri kichuu nchra, nchri María, ko imao ndache kichuu nchra:

―Ndo Maestro jii ndo ntiꞌi ko tiyaꞌa ndo.

29 Ko kuinꞌen nchri María, tuinxin bingatjen nchra sakuitsjeꞌe nchra ndo Jesús. 30 Ko ndo Jesús xratsikixinꞌa ndo tjajna, xra jii ndo ti no kuetanxin ndo nchri Marta. 31 Ko ni judío, ni jinichjeꞌe nchri María stenchecháxin na̱ nchra, bikon na̱ ixi taka kuachrjexin nchra nchia, ko ruéꞌe na̱ nchra ixi xraxaon na̱ ixi satsji nchra ti no tsixrabaa xisaoe nchra, ko ntiꞌa xrotsjangaxin nchra xa.

32 Tjumeꞌe nchri María kuiji nchra ti jii ndo Jesús, bakeꞌexin ntatuchiꞌin nchra tutée ndo, ko ndachro nchra:

―Ncháina, siá xrobakeꞌe ntiꞌi xrokuenꞌa xisaona.

33 Ko bikon ndo Jesús jitsjanga nchri María ko ni judío kuijikao nchra, meꞌe tsango juincheniꞌe ndo. 34 Ko juanchangi ndo:

―¿No juabaanta xa?

Ko ndachro na̱:

―Ncháina, xrokuia tsjeꞌé.

35 Ko tsjanga ndo Jesús. 36 Ko ndachro ni judío:

―Tsjeꞌenta tsango tjueꞌe ndo xi tsikenꞌen.

37 Ko ikaxin na̱ ndachro na̱:

―Jeꞌe xa juincheꞌe xa ixi chao bikon xi batikonꞌa. ¿Á juaꞌi xrokuajon xa juachaxin ixi xrokuenꞌa xi Lázaro?

38 Ko tsango koniꞌe aséen ndo Jesús ko konchjiñeꞌe ndo ti no tsixrabaa xi Lázaro. No tsixrabaa xa naa itjao̱* itjao̱ cueva meꞌe ko nduja tsikijee̱xin na̱ naa ixro. 39 Ko kuetuanꞌan ndo Jesús:

―Tintjiannta ixro.

Ko nchri Marta, nchrikichuu xi tsikenꞌen, ndachro nchra:

―Ncháina, já ó bakaxra ndo ixi chónda xa noó nchakon kuenꞌen xa.

40 Ko ndachro ndo Jesús:

―Á ntatjuꞌia ixi siá tsitikaoan tsikuan naa ixra̱ ijié sincheꞌe ndo Dio ixi juachaxien ndo.

41 Tjumeꞌe kuintjian na̱ ixro. Ko ndo Jesús tsjeꞌe ndo ngajní, ko ndachro ndo:

―Ndotána, tajon juasiana ngajinnta ixi ó kuinꞌennta ngeꞌe ndachrja̱n. 42 Janꞌan nóna ixi kain nchakon tinꞌennta ngeꞌe ntatjunta ko jai jaña ntatjunta ixi tsinꞌen ni ste ntiꞌi ko tsitikaon na̱ ixi jaꞌanta xruanꞌanntana juiꞌi.

43 Ko juexin ndachro ndo jiꞌi, séen kuyako ndo:

―¡Lázaro, tachrjexian ña̱!

44 Ko xi tsikenꞌen tuinxin kuachrje xa, ko itja xa ko tutée xa jixritexin ixi manta ko ikon xa jisiamá inaa manta. Ko ndachro ndo Jesús:

―Tonxindangeꞌenta xa ko tintuꞌenta satsji xa.

45 Ko kueya ni judío, ni kuijikao nchri María bikon na̱ ngeꞌe juincheꞌe ndo Jesús ko kuitikaon na̱ ndo. 46 Ko ikaxin na̱ kuitsjeꞌe na̱ ni fariseo, ko beki na̱ ngeꞌe tsijincheꞌe ndo Jesús. 47 Tjumeꞌe xi fariseo ko xitaana tetuanꞌan xraꞌo na̱ ngajin chujni ícha tetuanꞌan, ko ndachro xa:

―¿Ngeꞌe sintuꞌuna ixi xi jiꞌi jincheꞌe xa itsjé ngeꞌe ijié? 48 Siá tsintuꞌena xa, tjumeꞌe kain na̱ tsitikaon na̱ xa, ko tsi̱i̱ ni tetuanꞌan Roma ko tsonchjejin na̱ ningoina ko sinchetjáña na̱ tjajnai̱na.

49 Ko naa xi tinꞌin Caifás, xitaana ícha tetuanꞌan nano meꞌe, ndache xa na̱:

―Jaꞌanta xroꞌan ngeꞌe noꞌanta 50 ko xraxaonꞌanta ixi ícha jian naakua chujni tsenꞌen ixi tjajnai̱na ko jeꞌa kain ni tjajnai̱na tsitjáña na̱.

51 Ko xi Caifás jeꞌa jeꞌe xi tsixraxaon xa jaꞌin, Espíritue ndo Dio juinchenoꞌe xa ixi ndo Jesús tsenxin ndo tjajnée ni judío ixi jeꞌe xa tetuenꞌen xa xitaana nano meꞌe. 52 Ko jeꞌa jeꞌo tjajna meꞌe xrokuenxin ndo. Naꞌi. Kaxon xrokuenxin ndo ixi xroxraꞌo kain chjenꞌen ndo Dio, xjan tsichjekeꞌe nchijíi nunte xasintajni. 53 Ko hora meꞌe ni tetuenꞌen ni judío juangíxin na̱ xraxaon na̱ xranchi naatsóñaxón na̱ ndo Jesús.

54 Méxin, nchakon meꞌe ndo Jesús í bakonoxinꞌa ndo ngakjenꞌen ni judío, ko kuachrjexin ndo nunte Judea, sakjui ndo tjenka ijna̱, ti jii naa tjajna ndatinꞌin Efraín. Ntiꞌa kuituekao ndo sen teyuu chrikao ndo.

55 Xratitjáña xrokui kia Pascua, kiée ni judío ko kueya na̱ kuachrjexin na̱ tjajnée na̱ sakjui na̱ tjajna Jerusalén ixi ntiꞌa sintakji na̱ ixi tsontjúá na̱ ti xratiꞌa kia Pascua. 56 Ntiꞌa stetjée na̱ ndo Jesús ko kuiji na̱ ngaxinꞌin niꞌngo ijié ko ndache kichuu na̱:

―¿Jaꞌanta ngeꞌe chronta? ¿Á tsi̱i̱ xa kia o̱ naꞌi?

57 Ko xi fariseo ko xi tetuenꞌen xitaana kuetuanꞌan xa ixi siá xrojan ngisen noꞌe no jii ndo Jesús xrochronga na̱ ko jaña xrotsé xa ndo ko xroxraxinꞌin xa ndo ndoꞌachjiso.