1  Hch. 17:1.*Janꞌan, Pablo, ndo Silvano ko ndo Timoteo xruanꞌanna xroon ngajinnta jaꞌanta kichuuna niꞌngo tjajna Tesalónica ti steniinta Ndotáina Dio ko Ncháina Jesucristo. 2 Ndotáina Dio ko Ncháina Jesucristo, sintanchaonnta ndo ko xrotjáanta ndo juaxruxin.

3 Kichuuna, kain nchakon xrokonda tsajonna juasiai̱na ixi jaꞌanta ngajin ndo Dio. Meꞌe tikinixin sintaꞌana, ixi jaꞌanta kain nchakon ícha chuntianta Ncháina ko ícha tjueꞌe kichuunta. 4 Méxin janꞌanna jian nichjana ixi jaꞌanta ngajin sen kichuuna, sen ningue ndo Dio, ixi juaxruxin stena ixi jaꞌanta ícha soji chuntianta Ncháina Jesús, maski stetatsinganta juachjaon ixi jii chujni ningakonꞌannta. 5 Jiꞌi tjako ixi nduaxin ndo Dio jian nchéña ndo ijie̱ ngajinnta ixi juachjaon stetatsinganta, meꞌe xrondachro ixi tikinixin tsixinꞌinnta ti tetuanꞌan ndo Dio.

6 Kaxon ndo Dio sinchéña ndo ijie̱ ngajin ni ndakoꞌa juintaꞌanta; jeꞌe na̱ tsayéꞌe na̱ ijié juachjaon. 7 Ko jaꞌanta ti xrastechondanta juachjaon, tsjokaꞌanta xranchi janꞌanna. Jaña tsonꞌen nchakon tsi̱ꞌxi̱n Ncháina Jesús ngajní ko ngusine xroꞌi tsonoxin ndo ko tsikaꞌo ndo kain sen ángel, sen chónda juachaxin. 8 Tsi̱i̱ ndo Jesucristo ixi sinchéña ndo ijie̱ ngajin kain chujni kuitikaonꞌa ndo Dio ni ko kuitikaonꞌa chijni jian nichja Ncháina Jesucristo. 9 Chujni jiꞌi ijié juachjaon ko tangi tsikon na̱ kain nchakon ko naiꞌa tsjexin ti tsikaon na̱, ko jeꞌe ndo tsengi ndo na̱ satsji na̱ ntáꞌa ko ítsikonꞌa na̱ ti ijié juachaxin chónda ndo. 10 Jaña tsonꞌen nchakon tsi̱i̱ Ncháina Jesús ixi kain sen tjúá aséen ko kain sen kuitikaon chijnie ndo, sen meꞌe tsajon sen juasaya* juasaya respeto, honor ngajin ndo ko kao jaꞌanta ixi kuitikaonnta ti nichjana.

11 Méxin, kain nchakon tjanchaꞌana ndo Dio ixi jian tsakeꞌenta xranchi tikinixin tsakeꞌe sen kuincheꞌe ndo; ko tsingijnanta ndo ixi nduaxin tsjachanta sincheꞌenta kain ixra̱ jian tjaunnta sincheꞌenta ixi chuntianta ndo. 12 Jaña jaꞌanta tsajonnta kain juasaya ngajin Ncháina Jesucristo ko kaxon jeꞌe ndo jian xronichja ndo ixi jaꞌanta ixi titikaonnta ndo. Jaña tsonꞌen ixi juachaxien ndo Dio ko Ncháina Jesucristo ixi tsango jian ndo.