1 Tjumeꞌe ndo Jesús kuachrjexin ndo tjajna Capernaum, sakjui ndo nunte Judea nangoxin ndajitinga Jordán. Ko kueya na̱ xraꞌo na̱ ti jii ndo ko jeꞌe ndo juinchekuenꞌen ndo na̱ ixi meꞌe kuancheꞌe ndo. 2 Ko kaxin xi fariseo konchjiñeꞌe xa ngajin ndo ko juanchangiꞌe xa ndo ixi tjaun xa ndakoꞌa xrojuatingíexin ndo. Ko juanchangi xa á chao tsintuꞌeni janchriꞌeni.

3 Ko ndo Jesús juatingíexin ndo, ko ndachro ndo:

―¿Ngeꞌe kuetuanꞌan ndo Moisés?

4  Mt. 5:31.*Ko ndachro xa:

―Ndo Moisés kuajon ndo juachaxin ixi tsoña̱ naa xroon tsayéꞌe nchri ixi chao tsintuꞌe xa nchra.

5 Ko ndo Jesús ndachro ndo:

―Jaña kuetuanꞌan ndo Moisés ixi jaꞌanta ícha asáanta ko titikaonꞌanta. 6 Ko ti xraxrangíxixión juinchéña ndo Dio kain ngeꞌe, juinchéña ndo naa xi ko naa nchri 7 ixi xi tsintuꞌe xa ndotée xa ko janée xa ko tsekao xa janchriꞌe xa. 8 Ko tjumeꞌe yui sen tsoña̱ sen xranchi naakua naa chujni. Méxin, í jeꞌa yuu sen, ó naakua sen jai. 9 Ko jaña siá juachaxien ndo Dio ikjan sen naakua chujni, méxin inaa chujni juaꞌi xrondachro ixi xrochjeya sen.

10 Ko hora ste sen nchia, sen teyuu chrikao ndo íjngo juanchangiꞌe sen ndo ngeꞌe xrondachro jiꞌi. 11  Mt. 5:32; 1Co. 7:10, 11.*Ko ndo Jesús ndachro ndo:

―Siá naa xi tsintuꞌe xa janchriꞌe xa ko xrochónda xa inaa nchri, xi meꞌe ndakoꞌa jincheꞌe xa ixi ó tsikuteꞌe xa nchrinchriꞌe xa. 12 Ko kaxon siá naa nchri tsintuꞌe nchra ndoxiꞌe nchra ko xrochónda nchra inaa xi, kaxon jeꞌe nchra índakoꞌa jincheꞌe nchra.

13 Kaxin na̱ bikaꞌo na̱ ichjan nchínchín ixi tsakeꞌe ndo Jesús itja ndo ngataꞌa jaa xjan. Ko sen chrikao ndo Jesús kuyakutee sen ni bikaꞌo ichjan meꞌe. 14 Ko bikon ndo Jesús jaña stencheꞌe sen, méxin, koñao ndo ko ndachro ndo:

―Tintuꞌenta ichjan tsi̱i̱ xjan ngaji̱n ko tingakuenꞌanta xjan, ixi ti no tetuanꞌan ndo Dio tsikinixinꞌen sen ncheꞌe xranchi ichjan. 15  Mt. 18:3.*Ko xrontatjunta ixi ngisen xrokjanꞌi xranchi naa ichjan nchíín juaꞌi tixinꞌin sen ti tetuanꞌan ndo Dio.

16 Ko tjumeꞌe joa ndo kain ichjan ko bakeꞌe itja ndo ngataꞌa jaa xjan ko juinchenchaon ndo xjan.

17 Ko hora sakjui ndo Jesús, jitinga naa xi kui̱i̱ xa ko bakeꞌexin xa ntatuchiꞌin xa ngajin ndo Jesús, ko juanchangi xa:

―Maestro jian jaꞌa, ¿ngeꞌe sintaꞌa janꞌan ixi tsarichónna kain nchakon?

18 Ko tjumeꞌe ndo Jesús ndachro ndo:

―¿Sonda ndachrua ixi jianna janꞌan? Naakua ngisen jian, jeꞌo ndo Dio jian ndo. 19 Jaꞌa ó noꞌa kain ti kuetuanꞌan ndo Dio: “Ncheyeꞌa nchrinchriꞌa, tóñaiꞌa chujni, te̱maꞌia, tjangíeꞌa chujni siá jincheꞌe ti jian, ncheyeꞌa na̱ ko tájuan juasiaa ngajin ndotáa ko janáa.”

20 Ko jeꞌe xi meꞌe ndachro xa:

―Maestro, kain jiꞌi ó juintaꞌa xranchiona.

21 Ko ndo Jesús tsjeꞌe ndo xa ko tsango tjueꞌe ndo xa. Ko ndachro ndo:

―Xra titjáña naakua ngeꞌe sincheꞌe. Satjia ko nchekjia kain ngeꞌe chonda ko tonchjeyeꞌe ni nóa tomi meꞌe. Jaña xrochonda ngeꞌe ícha tjintee ngajní. Ko tjumeꞌe tsjiꞌia ko ruaꞌna̱na.

22 Ko kuinꞌen xa jaña ko tsango kuechíín xa ko sakjui xa, ixi tsango kueya ngeꞌe kuachónda xa.

23 Ko ndo Jesús tsjeꞌe ndo ni ste ntiꞌa, ko ndache ndo sen teyuu chrikao ndo:

―Tsango tangi tixinꞌin ni chónda itsjé ngeꞌe ti tetuanꞌan ndo Dio.

24 Ko xronka sen chrikao ndo Jesús ixi jaña ndachro ndo. Ko ndachro ndo íjngo:

―Ni chuntia ti ngeꞌe chónda, tsango tangi tixinꞌin na̱ ti tetuanꞌan ndo Dio. 25 Ícha tangiꞌa ixi tsatsingatuxin naa ko camello ikon ntachika ixi naa ni chónda kueya ngeꞌe xrokuixinꞌin na̱ ti tetuanꞌan ndo Dio.

26 Ko jeꞌe sen kuinꞌen sen jaña ko tsango xronka sen. Ko juanchangiꞌe kichuu sen:

―¿Ngisen chao tixinꞌin ti tetuanꞌan ndo Dio?

27 Ko ndo Jesús tsjeꞌe ndo sen, ko ndachro ndo:

―Ti ngeꞌe juaꞌi sincheꞌe chujni, ndo Dio chao sincheꞌe ndo kain ngeꞌe.

28 Ko ndo Pedro ndachro ndo:

―Kainna kuintuꞌana kain ngeꞌe chondana ixi ruaꞌananta.

29 Ko ndo Jesús ndachro ndo:

―Nduaxin ntatjunta ixi xrojan ngisen tintuꞌe ndoꞌa o̱ xi kichuu, o̱ nchri kichuu, o̱ ndotée, o̱ janée, o̱ janchriꞌe, o̱ chjenꞌen, o̱ nunteꞌe, ixi kuitikaonna sen janꞌan ko titikaon sen chijni ndachrja̱n, 30 sen meꞌe ícha itsjé ngeꞌe tsayéꞌe sen ntiꞌi ko xrochónda sen inaa ciento ícha itsjé ngeꞌe. Kueya nchia xrochónda sen ko tsikon sen itsjé chujni xranchi ni kichuu sen ko xranchi janée sen ko xranchi chjenꞌen sen ko tsayéꞌe sen itsjé nunte. Ko maski tangi tsonꞌen sen ngataꞌa nche ntiꞌi, tjumeꞌe ngajní tsechón sen kain nchakon. 31  Mt. 20:16; Lc. 13:30.*Ko kueya ni tituanꞌan jai, nchakon tsjexin kain ngeꞌe ítsituanꞌi na̱. Ko itsjé ni tjinteꞌa jai, nchakon meꞌe ícha tsetuanꞌan na̱.

32 Tjumeꞌe yaa sen chaꞌo satji sen tjajna Jerusalén ko ndo Jesús kuitaon ndo ntiꞌa. Ko sen chrikao ndo stexronka sen steruéꞌe sen. Ko ndo Jesús kuiyeꞌe ndo jeꞌo sen teyuu, ko kuaxi ndo ndache ndo sen xranchi tsonꞌen ndo. 33 Ko jaꞌin ndachro ndo:

―Jai satsjina tjajna Jerusalén. Ko tjumeꞌe janꞌan, chjenꞌen ndo Dio, xjan jongíꞌe xranchi chujni, xrotséna na̱ tsikaanna na̱ ngajin xitaana tetuanꞌan ko xi tjako ley. Ko ni tetuanꞌan tsajon na̱ juachaxin ixi tsikaon na̱. Tjumeꞌe tsikaanna na̱ ngajin ni jeꞌa judío 34 ko jeꞌe na̱ tsjanoana na̱, tsandeꞌena itja na̱ ikon, tsikitéena na̱ ndatée na̱ ko naatsóñaxónna na̱. Ko nchakon nínxin xroxechónna íjngo.

35 Ko tjumeꞌe ndo Jacobo ko ndo Juan, chjenꞌen ndo Zebedeo, konchjiñeꞌe sen ngajin ndo Jesús ko ndachro sen:

―Maestro, tjanchaꞌananta naa ngeꞌe.

36 Ko juanchangi ndo Jesús:

―¿Ngeꞌe tjaunnta?

37 Ko ndachro sen:

―Nchakon tsakeꞌenta ti tetuanꞌan, tájonnta juachaxin ixi naa janꞌanna tsakeꞌena ndatsjonxin jian ti tsakeꞌenta jaꞌanta ko inaa janꞌanna tsakeꞌena ndatsjonxin ikjon.

38  Lc. 12:50.*Ko tjumeꞌe ndo Jesús ndache ndo sen:

―Jaꞌanta noaꞌinta ngeꞌe tjanchianta. ¿Á chao tsikixinꞌannta ti tangi tsónna janꞌan?

39 Ko jeꞌe sen juatingíexin sen:

―Jaán chao tsikixinna̱na.

Ko ndo Jesús ndache ndo sen:

―Nduaxin tangi tsonꞌan jaꞌanta xranchi tangi sinchena na̱ janꞌan. 40 Ko janꞌan juaꞌi xrontatjunta ixi naa jaꞌanta tsakeꞌenta ti ndatsjonxin jian ko inaanta tsakeꞌenta ti ndatsjonxin ikjon ti tsakeꞌe janꞌan ixi ó saꞌó jitaxin ngisen tsakeꞌe ntiꞌa.

41 Ko ikaxin sen ite,* ite diez sen chrikao ndo Jesús, kuinꞌen sen ixi jaña tjanchia ndo Jacobo ko ndo Juan ko kuaxi sen koñao sen ngajin sen yuu. 42  Lc. 22:25, 26.*Ko tjumeꞌe kuiyeꞌe ndo Jesús kain sen ko ndache ndo sen:

―Ó noꞌanta ixi ni tetuanꞌan xasintajni† xasintajni mundo tsango tetuenꞌen na̱ kain chujni ko kain ni tsango tetuanꞌan, ni meꞌe tsango nchejié aséen na̱ ko chjinga nchekao na̱ chujni. 43  Mt. 23:11; Mr. 9:35; Lc. 22:26.*Ko jaꞌanta sincheꞌanta jaña. Naꞌi. Siá xrojannta tjaunnta tsituanꞌannta xrokonda tsingijnanta ni kichuunta. 44 Ko xrojannta tjaunnta ícha xrochondanta juachaxin, meꞌe xrokonda tsitikaonnta ngeꞌe tsituanꞌannta ikaxin chujni. 45 Ixi chjenꞌen ndo Dio, xjan jongíꞌe xranchi chujni, kuiꞌa xjan ixi chujni sincheꞌe xra ngajin xjan. Naꞌi. Jeꞌe xjan kui̱i̱ xjan ixi sincheꞌe xjan ixra̱ ngajin chujni ko tsenꞌen xjan ixi kain chujni tsechón sen.

46 Ko tjumeꞌe kuiji sen tjajna Jericó. Ko ndo Jesús ko sen chrikao ndo ko kueya na̱ kuachrjexin na̱ tjajna ntiꞌa. Ko ntiꞌa jii naa xi juaꞌi tikon ndatinꞌin xa Bartimeo ko ndotée xa ndatinꞌin Timeo. Takeꞌe xa ngandeꞌe chaꞌo ko tjanchiakaꞌa xa. 47 Ko jeꞌe xa kuinꞌen xa ixi ó jitonchjiñeꞌe ndo Jesús tjajna Nazaret, ko kuaxi xa kuyako xa ko ndachro xa:

―Jesús, ndo kuachrjenixin ndo David, tikonóaꞌnanta.

48 Ko kueya na̱ kuyakutee na̱ xa ko ndache na̱ xa xrotenko xa. Ko jeꞌe xa ícha séen kuyako xa ko ndachro xa:

―Jaꞌanta, ndo kuachrjenixinnta ndo David, tikonóaꞌnanta.

49 Ko chónꞌen ndo Jesús ko kuetuenꞌen ndo na̱:

―Tiyeꞌenta xi meꞌe.

Ko tjumeꞌe kuiyeꞌe na̱ jeꞌe xi tikonꞌa ko ndache na̱ xa:

―Xrakonꞌa, tingatjen ixi jitiyaꞌa ndo Jesús.

50 Ko nango kuintuꞌe xa ti jitsáa xa ko chrinka xa bingatjen xa ko konchjiñeꞌe xa ti jii ndo Jesús. 51 Ko ndo Jesús juanchangiꞌe ndo xa:

―¿Ngeꞌe tjauan sintaꞌa ixi jaꞌa?

Ko xi tikonꞌa ndachro xa:

―Maestro, tjaꞌon tsikon.

52 Ko ndo Jesús ndache ndo xa:

―Jai chao satjia. Ó koxruanꞌan ixi chuntiana.

Ko jeꞌe xi tikonꞌa tuinxin chao bikon xa ko ruéꞌe xa ndo Jesús.