12
Kapakap en Peki Sawas l TITLE NI MAHSEN EN IPRU: En Depit melkahka.
1 Maing KAUN, komw ketin sewesei kiht!
Sohte aramas mwahu men me luhwehdi;
solahr me kak diar aramas mehlel kan.
2 Irail koaros kin wiewie likamwpene nanpwungarail;
re kin widiwidingpene nanpwungarail ni liksansalamwahu.
3 Maing KAUN, komw ketin katokehdi loh widingan pwuko!
Komw ketin perehla au lemei pwuko me kin kakahski,
4 “Se kin alehki mehkoaros me se anahne at koasoi kan.
Se pahn kin koasoia dahme se kin inengieng,
oh sohte me kak katokeikitedi.”
5 KAUN-O ketin mahsanih, “Ahpw met I pahn pwarodo,
pwe me semwehmwe kan toutoulahr
oh me wie lokolok kan weiweirengki ar medek.
I pahn kihong irail meleilei oh nsenamwahu me re kin ngoangki.”
6 Kitail kak likih sapwellimen KAUN-O inou kan;
pwe me mehlel rasehng silper
me kamwakeldahr pak isuh nan kisiniei mwehl.
7-8 Aramas suwed kan kin mi wasa koaros,
oh irail koaros kin kapinga dahme suwed.
Maing KAUN, komw ketin doarei kiht ahnsou koaros,
oh ketin sileikitasang soangen aramas pwukat.