9
Kaun-o ketin Kaloke Antaiokus
(Tehk 1 Makapi 6.1-7; 2 Makapi 1.11-17)
1 Ni ahnsowo Antaiokus ketin pwurasang Persia ni pingiping laud en sapwellime karis kan, 2 e ahpw ketilahng nan kahnimw en Persepolis oh song en pirapa tehnpas sarawi ehu oh kaunda kahnimwo. Tohn kahnimwo eri ale neirail tehtehn mahwen kan oh mahweniong Antaiokus, re pwakihala oh kasarowehdi ih oh sapwellime karis. 3 Ni eh lel Ekpatana, e ahpw karongehda dahme wiawihong nein Nikanor oh Timoty sounpei ko. 4 Ih eri engiengda kowahlap oh kupwurehda en dupukohng mehn Suhs kan ar kalowehdi oh kasarowehdi. E ketin ruwese sapwellime sountangahki tehnwaro en dehpa uhdi lao re lel Serusalem. Nan eh aklapalap e ahpw mahsanih, “I pahn wiahkihla Serusalem sousou ehu me diren mehn Suhs seridi ie.”
Ahpw e sasairki me sapwellimen Koht kadeik ieiang ih. 5 Pwe ni mehlel, mwurin eh wia mahsen pwukat, Kaun-o, Koht en 2Israel, me kin ketin mahsanih mehkoaros, ahpw mwadangete ketikihong soumwahu laud ehu. Medek ehu lel kapehde me sohla kak maiauda— 6 kalokolok ehu me konehng aramas emen me kin kaloke aramas teikan ni soangen mwomwen kalokolok suwed tohto! 7 Ahpw met sohte mwahn katokihedi eh aklapalap; eh aklapalap ukla mwowe, oh inenen engiengda oh wiewia mahsen en kamasak mehn Suhs kan, e pil ketin ruwese sapwellime sountangahki tehnwaro en tang marahra. Met kahrehda eh pwupwsang nan tehnwaro oh tih koaros medekla. 8 Nan eh aklapalap e kupwukupwure me e sapwellimaniki manaman me laud sang en aramas me kak kahrehda iloak en nan madau pahn peikiong oh e kak teneki nahna laud kan pohn mehn tenek ehu. Ahpw e mwadangete pwupwudiong nanpwel oh wisikda nan mehn ro ehu, met kasaledahr ni sansal ong aramas koaros duwen sapwellimen Koht manaman. 9 Mwahs pil mihla ni kahlepen ohl suwed menet oh erein eh ieias e kin weirek laud oh lokolok. Kahlepe pwohsuwedla kahrehda sapwellime kariso sohla kakohng, 10 sohla me kak keila mpe pwe re en waseli. Eri, ih duwen ohl me ahpwtehn kupwukupwure me e pil kak leldalahng pahnlahng.
11 Antaiokus eri kupwur toutoula mehlel oh weiweirek poatopoat pwehki lokolok me Koht ketikihong, e ahpw pehmada eh aklapalap oh katokihedi. 12 Eri, ni eh solahr kakohng pwohn kahlepe, e ahpw mahsanih, “Me uhdahn pwung aramas koaros en uhpah Koht, oh dehr medemedewe me re pahrekiong Koht.” 13 Ahnsoun sapwellimen Kaun-o kalahngan ong Antaiokus imwiseklahr, ahpw ohl suwed menet wiahiong Koht inou ehu. 14 E nda: “Ahnsou ehu I lemehda I en kamwomwala Serusalem oh wiahkihla kahnimw sarawio sousou ehu me diren mehn Suhs pahn seridi ie. Eri, met I koasoanedier me e pahn wiahla kahnimw saledek ehu. 15 I lemehda I en kesehla paliweren mehn Suhs oh nair seri me mehla kan ong mahn lawalo kan pwe re en kangala, pwehki ei medemedewe me irail aramas mwahl ekei me sohte katepen ar seridi. Ahpw met I koasoanedier re en iang ahneki soangen pwung kan me mehn Adens kan kin ahneki. 16 I kihsangehr dipwisou sarawi kan nan Tehnpas Sarawio mahs, ahpw met I pahn kadirehkihla kisakis kaselel, oh dipwisou me mwahu sang mehn mahs ako, oh I pil pahn pwainkihla pein nei mwohni mehn meirong kan. 17 Likin mepwukat, I pahn pil wiahla mehn Suhs men, oh kohseli wasa koaros me aramas akan kin kousoan ie, oh kalohkihong irail duwen sapwellimen Koht manaman.”
Sapwellimen Antaiokus Kisinlikou ong mehn Suhs kan
(Tehk 1 Makapi 6.8-17)
18 Antaiokus inenen kupwur toutou oh eh weirek sohte kak meleileidi, pwehki i3Koht eh ketin kalokaloke nin duwen me konehng, ih eri wiahda kisinlikou kiset ong mehn Suhs kan:
19 “Sang Nanmwarki Antaiokus ong mehn Suhs kan, tohn ei wehi waun. Ei rahnmwahu oh kupwuramwahu en popohl ong kumwail koaros.
20 “I koapworopworki me kumwail oh amwail tungoal peneinei kan me kehlail oh nsenamwahu. Ei koapworopwor mihmi rehn Koht, 21 oh I tamatamante ni peren mehlel wahu oh kadek me kumwail kasalehiongieier.
“Ni ei pwurodo sang Persia, soumwahu laud ehu lel ie, I ahpw lemehda I en wiahda koasoandi kei ong kamwahupen aramas akan. 22 Kaidehn pwehki eh solahr ei koapworopwor en mwahula; pwe I uhdahn koapworopworki me I pahn mwahula. 23 Ahpw I tamanda me semeio kin ketin epwehnki idihada wiliepe ni eh kin ketila mahwen ni palimese en Iupreitis. 24 E kin ketin wia met pwe ma mehkot karuaru de rohng suwed pahn lelohng wehi, eri, aramas akan sohte pahn masepwehkada, pwehki ar ese ihs me wiewia wiliepen nanmwarki. 25 Oh pil ehu, I ese duwen kaunen wehi kan me mi limwahn ei wehi ar kin mwasamwasahn ar ahnsou mwahu. Iei me I idihadahr ei tungoal pwutak Antaiokus en wilianiehdi wiahla nanmwarki. Pak tohto I kin likiong en wia wiliepei rehmwail ni ei kin patohla nan kisin wehi kan ni palimese en Iupreitis. (I pahn pil kadaralahng kepin kisinlikou kiset.) 26 Eri met, I koangngoangehkin kumwail ni kehlail kumwail en tamataman soahng mwahu kan me I wiahiongkumwailehr, ong emenemen aramas oh pil ong wehi pokon, oh kumwail usehla amwail kupwuramwahu ong ngehi oh ei tungoal pwutak. 27 I koapworopworki me e pahn kupwur mwahu ong kumwail oh kadek, duwehte me I kin wiahiong kumwail.”
28 Eri, sounkam aramas menet, me lahlahwe Koht, ahpw lokolongki soangen kalokolokohte me e wiahiong aramas teikan, e ahpw mehkihla mehla suwed nin nahna kan en wehin liki ehu. 29 Emen kompoakepah ko, me adaneki Pilip, walahng kahlepe nan uhdahn sapwellime wasa; eri, pwehki eh masak sapwellimen Antaiokus pwutako, e ahpw douluhllahng rehn Tolemi Pilometor, nanmwarkien Isip.