1 'Dɩayɩnʋ ‑na, ti ‑mʋ', Kʋkɔnyɔ ‑Yusu di ya, ‑a 'mʋ lɛ 'kukue ‑nɩ, 'kɩ 'ʋ꞊ʋ ye', ɛ nɔ‑ kɔ ‑tɩ 'nɩ yɩ 'a mʋ ‑lee ‑nɩ. ‑A ‑nyɛɛ nɛ 'a mʋ lɛ: 2 Nyibli ‑bɩ 'bʋ yɩ꞊ɩ nɩ hlɛ, ‑ɛ mɔ, ‑nyrɔwɔ ‑mʋ', ‑aan Kʋkɔnyɔ di ya, ɛ nyre 'ʋ nɩ, ɛ 'nɩ 'gbugbloo 'lɩ 'a mʋ, ɛ kɔ, ɛ 'nɩ 'nuo 'lɩ 'a mʋ hʋannʋ. A 'nɩ 'pʋʋ 'lɩ꞊ɩ ꞊han‑tɩ, 'ye ꞊bɩɩ ʋ pʋ lɛ, ‑ɛ mɔ, Nyɩsʋa, nɔ‑ tɔɔ ꞊nʋ꞊ʋ, mɔ, 'ye ꞊bɩɩ a 'wɩɩn 'ʋ꞊ʋ nyibli ‑mʋ', ‑ʋ hlɛ Nyɩsʋa a ‑tɩ wien, mɔ, 'ye ꞊bɩɩ ʋ lee nɛ 'a mʋ, ‑ɛ mɔ, 'mɔ ꞊crɩ꞊ɩ. 3 A 'nɩ 'wɛɛn 'lɩ, 'kɩ nyibli bʋ kaa nɛ 'a mʋ. Ba yi꞊e, ‑ɛ mɔ, 'tɩ‑ ‑nyrɔwɔ a 'mʋ, ɛ 'mʋ 'ʋ nyre, nyibli ‑hʋɔhʋɩ di hie 'ʋ Nyɩsʋa a 'hru bʋ, kɔ 'crɛkɔnyɔ gbagbʋ ‑mʋ', Nyɩsʋa di ‑hʋan꞊a 'lɩ na 'nyɩ pʋ, nɔ‑ di 'a ‑kʋan ‑wlu ꞊tu. 4 'Crɛkɔnyɔ a 'mʋ, ɛ di nyibli 'nɩ ‑lee ‑nɩ, bʋ 'kee nɛ 'a ‑nɛ ꞊dedede a dɩda, mɔ 'ye ꞊bɩɩ ɛ mɔ Nyɩsʋa. Ɛ di꞊e 'nɩ hla ‑wɛ, ‑ɛ mɔ, ɛ nɔ‑ nɩ 'ʋ 'a ‑nɛ ꞊dedede 'lu yɩ, ɛ 'mʋ 'lɩ Nyɩsʋa a 'kagbaʋ bʋ pa, ɛ 'mʋ 'lɩ gbata ‑mʋ' 'kwli bʋ nɩ, ɛ 'mʋ꞊ʋ hla, ‑ɛ mɔ, ɛ nɔ‑ mɔ Nyɩsʋa.

5 ‑Tɛ 'n nɩ la 'lɩ 'a mʋ 'nyɩ, ‑tɩ a 'mʋ, 'n lee la 'a mɔ꞊ɔ nɩ. ꞊Bɩ ɛ 'nɩ ‑bi꞊e 'lɩ 'a mʋ 'kwli? 6 ‑Tɛ ti nɛ ‑bʋ, ꞊dedede ka 'crɛkɔnyɔ a 'mʋ yɩ, 'kɩ bʋ di. Dɛ a 'mʋ, a yi꞊e nɩ. Ti ‑mʋ', Nyɩsʋa wa 'nyrɛ, 'bʋ nyre 'ʋ, 'crɛkɔnyɔ a 'mʋ, ɛ di bi pepe'. 7 Ɛ mɔ ꞊han‑tɩ ꞊nɩɔ, ‑tɛ ti nɛ ‑bʋ, nyibli ‑hʋɔhʋɩ, ʋ nʋ‑ ‑wɛn Nyɩsʋa yɩ. ‑A yi 'klɩ ‑hʋɩn a 'mʋ nɩ, ‑kɔtɩ Nyɩsʋa tɔɔ nɛ ‑a mɔ꞊ɔ nɩ. ‑Tɩ ‑bʋ, 'n hlɛ, ɛ di 'ʋ 'nɩ nyre, kɛɛ, ɛ 'yɛɛ 'ʋ nɩ nyre. Ɛ blɛɛ yɩ, nyiblo ‑mʋ', ‑ɛ ka 'Crɛkɔnyɔ a 'mʋ yɩ, bʋ ‑ha 'ʋ꞊ʋ 'hru wlɔn, 8 'tɩ‑ 'crɛkɔnyɔ a 'mʋ, ɛ 'mʋ pepe' bi. ‑Aan Kʋkɔnyɔ ‑Yusu 'bʋ ‑di, 'kɩ 'lɩ 'a ‑tɩ a 'yi'bʋalɛ 'kwli, ɛ di ꞊hloon 'ʋ 'crɛkɔnyɔ a 'mʋ pepe 'lu, ɛ 'mʋ bʋ ‑wɛ. 9 'Crɛkɔnyɔ a 'mʋ, 'bʋ bi pepe', ɛ di 'nɩ di, 'kɩ 'lɩ Satan a 'klɩ 'kwli, ɛ 'mʋ ꞊wlɩlɛkɛɛ‑tɛblɩ ‑hʋɔhʋɩ nu. ꞊Wlɩlɛkɛɛ‑tɛblɩ a 'mʋ, ɛ nɔ‑ ɛ di nu, ɛ 'mʋ nyibli ‑kaa ‑nɩ. 10 Ɛ di nu yɩnyre‑tɛblɩ a gblegble, ɛ 'mʋ nyibli ‑mʋ' ‑kaa ‑nɩ, ʋ di 'lɩ na ‑mʋ' 'nyɩ pʋ, ‑ɛ 'yɛ nɩ jre, ‑tɛ 'klɔ tɛ yɩ bʋ. Nyibli a 'mʋ, ʋ di 'ye ꞊hɩʋɛn, ‑kɔtɩ ʋ 'nɩ ‑hʋa꞊a lɩ ‑tɩ a ‑tɛɛ, 'ʋ 'yɩ꞊ɩ ‑nʋɛ ‑nɩ. 'Bʋ mɔ, 'bʋ wɛn wɛn ‑tɩ a ‑tɛɛ kɩ, Nyɩsʋa di wɛn ꞊nʋ 'nɩ wa. 11 ‑Tɛ ʋ 'yɛ nɩ ‑hʋa Nyɩsʋa, 'a ‑tɩ, Nyɩsʋa ni꞊e nɩ, 'waa 'lulɛ‑hihie 'ɛ mii ke', kɔ, 'ʋ kuo hɩ ꞊wlʋ yɩ. 12 'A ‑tɩ, Nyɩsʋa a ‑bati di nyibli a pɛpɛ a 'mʋ 'nɩ klɔ, ‑ʋ 'yɛ nɩ ‑hʋa ‑tɩ a ‑tɛɛ, kɔ, ‑ʋ nʋɛ ‑bʋ nu ‑tɛblɩ ‑hʋɩn.

13 'Dɩayɩnʋ ‑na, 'a mʋ ‑mʋ', Nyɩsʋa nʋɛ ‑nɩ, ɛ nɔɔ 'ʋ lɛ, 'kɩ ‑ba ‑nyi꞊e 'wio 'a ‑nɛ ti, 'kɩ 'ʋ 'aan ‑ta', ‑kɔtɩ ‑tɛ Nyɩsʋa 'mʋ la 'klɔ ‑wlu ꞊tu, ɛ ‑ha la 'lɩ 'a mʋ nɩ, ‑ɛ di꞊e nu, ɛ 'mʋ la 'a mʋ wa, 'kɩ 'lɩ 'a ‑Hihiu* a 'klɩ 'kwli. 'A ‑Hihiu a 'mʋ, nɔ‑ nu꞊o, 'a ‑hɛ Nyɩsʋa a nyibli. Ɛ wɛ 'a mʋ nɩ, ‑ɛ nu꞊o, a kuo ‑tɩ a ‑tɛɛ ꞊wlʋ yɩ. 14 Ɛ 'mʋ 'a mʋ wa a ‑tɩ, 'ɛ da la 'a mʋ, 'kɩ ba kuo la꞊a ꞊wlʋ yɩ, ti ‑mʋ' ‑kɔ 'yri ‑a pʋ la 'a mʋ ‑Yusu a ꞊haantitie. Ɛ ‑hʋɛ la꞊a nɩ, 'kɩ ba nu dɔdʋ, 'kɩ 'ʋ ‑aan Kʋkɔnyɔ ‑Yusu 'Klɩsʋ a ‑tɩ a 'yi'bʋalɛ a ‑ta'. 15 'A ‑tɩ, 'na 'dɩayɩnʋ ‑na, ba 'tɩɛ kuo ‑Yusu 'Klɩsʋ ꞊wlʋ yɩ, kɔ, ba naa ‑tɛblɩ ‑mʋ', ‑a tɔɔ nɛ 'a mʋ ꞊wlɩ kɩ lɛ, 'ye ꞊bɩɩ 'kɩ 'ʋ wuntɔ 'yri, kɔ, 'ye ꞊bɩɩ 'kɩ 'ʋ 'crɩɛn kɩ.

16-17 ‑Aan Kʋkɔnyɔ ‑Yusu 'Klɩsʋ a 'mʋ, ɛ kɔ ‑aan 'Baɩ Nyɩsʋa, ‑ɛ nʋɛ nɛ ‑a mʋ, bʋ ꞊tu 'lɩ 'a mʋ ꞊wlʋ 'kwli bʋ, ɛ kɔ, bʋ ‑nyi 'a mʋ 'klɩ, 'kɩ ba nu ꞊haan‑tɛblɩ, ɛ kɔ, 'kɩ ba hla ꞊haan‑tɩ 'a ‑nɛ ti. ‑Tɛ Nyɩsʋa ni ‑a mʋ ꞊haandɛ ‑mɔ, ɛ yɩ ‑nyi ‑a mʋ 'klɩ 'a ‑nɛ ti, ɛ kɔ, ɛ yɩ ‑a mʋ 'nɩ ‑hɛɛ ‑nɩ, 'kɩ ‑ba ‑ple ꞊haandɛ ‑mʋ', ‑a yi, ɛ di ‑a mʋ ‑nyi.