Da 131. Psalm.
En Daymeedich Gebayt
Fumm Dawfit. En leet fa ksunga sei uf em vayk nuff an Jerusalem.
1 Mei hatz is nett shtols, oh Hah,
un ich hayb mei awwa nett hohch uf.
Ich hald mich nett uf mitt grohsi sacha,
adda sacha es zu vundahboah sinn fa mich.
2 Avvah ich habb mei sayl shtill un ruich gmacht,
vi en glay kind is bei sei maemm.
Vi en glay kind bei sei muddah,
so is mei sayl shtill in miah.
3 Oh Israel, du dei hofning in da Hah,
funn nau on un fa'immah.