Da 97. Psalm.
Gott Da Haychsht Im Land
1 Da Hah is kaynich, loss di eaht sich froiya,
un di islands froh sei.
2 Volka un's dunkla sinn um een rumm,
sei kaynich-shtool is gegrund uf gerechtichkeit un gericht.
3 Feiyah gayt fannich eem heah,
un brend sei feinda uf ivvahrawlich.
4 Sei gviddah gebt helling uf di veld,
di eaht saynd's un ziddaht.
5 Di berga fashmelsa vi wax fannich em Hah,
fannich em Hah funn di gans eaht.
6 Di himla sawwa veyyich sei gerechtichkeit,
un awl di leit sayna sei hallichkeit.
7 Awl selli es abgettah deena vadda fashohmd,
selli es braekka veyyich iahra abgettah;
baydet een oh, awl diah gettah!
8 Zion heaht dess un is froh,
un di shtett funn Juda froiya sich,
ivvah dei gerichtes, oh Hah.
9 Fa du, oh Hah, bisht da Alli-Haychsht ivvah di gans eaht,
du bisht uf kohva ovvich awl di gettah.
10 Diah es da Hah leeb hend, hasset evil;
eah heet di sayla funn sei heilichi,
eah hald si aus di kfoah funn di gottlohsa iahra hend.
11 Es licht sheind uf di gerechta,
un frayt sheind uf di ufrichticha im hatz.
12 Froiyet eich im Hah, diah gerechti,
un preiset sei heilichah nohma.