Da 94. Psalm.
Gott Da Richtah Funn Alli-Ebbah
1 Oh Hah, da Gott es zrikk betzawla dutt,
du Gott es sacha recht machsht, veis dich.
2 Shtay uf, du Richtah funn di veld,
betzawl di shtolsa zrikk fa vass si fadeend henn.
3 Vi lang sella di gottlohsa, oh Hah,
vi lang sella di gottlohsa sich froiya?
4 Si shvetza mitt frechi vadda,
awl di evil-shaffah blohsa sich uf.
5 Si fadrikka dei leit, oh Hah,
un dredda dei eahbshaft nunnah.
6 Si bringa di vitt-fraw un da fremd mann um,
un shlauwa doht di kinnah unni eldra.
7 Si sawwa, “Da Hah saynd uns nett;
da Gott fumm Jakob bekimmaht sich nix drumm.”
8 Gevvet acht, diah unksheidi unnich di leit,
vann zaylet diah moll ksheit vadda, diah dummi leit?
9 Dutt sellah vo's oah gmacht hott nett heahra?
Dutt sellah vo's awk gmacht hott nett sayna?
10 Dutt sellah es di heida shtrohft nett shtrohfa,
sellah es mensha veisheit land?
11 Da Hah vayst di gedanka fumm mensh,
si sinn yusht vi en ohften.
12 Ksaykend is da mann es du shtrohfsht, oh Hah,
un es du lansht fumm deim Ksetz.
13 Du gebsht eem roo funn di dawwa mitt druvvel,
biss en grawb gegrawva is fa di gottlohsa.
14 Da Hah lost sei leit nett hokka,
un falost aw nett selli es sei eahbshaft sinn.
15 Gerichtes zayld viddah uf gerechtichkeit gebaut vadda,
un awl di ufrichticha im hatz gevva sich ivvah ditzu.
16 Veah shtayt uf fa mich geyyich di gottlohsa?
Veah shtayt miah bei geyyich di evil-shaffah?
17 Vann da Hah miah nett hilf gevva hett,
dann veah ich glei in di veld funn di dohda gvest.
18 Vo ich ksawt habb, “Mei foos is am shlibba,”
dann hott dei shtandhaftichi-leevi mich uf kohva, oh Hah.
19 Vo mei angsht grohs voah in miah,
dann hott dei drohsht frayt gevva zu mei sayl.
20 Du kansht nett aynich sei mitt en uneahlichah richtah-shtool—
aynah es letzi ksetza aus shprecht.
21 Si gayn zammah geyyich's layva funn di gerechta,
un fadamma unshuldich bloot.
22 Avvah da Hah is mei feshtah Roo-Blatz,
eah is da Felsa es ich mich falossa kann druff.
23 Eah betzawld si zrikk fa iahra ungerechtichkeit,
eah bringd si um fa iahra sinda,
da Hah, unsah Gott bringd si zu nix.