Da 92. Psalm.
En Lohb-Leet
En Psalm. En leet fa da Sabbat-Dawk.
1 Es is goot fa dank gevva zumm Hah,
un fa lohb singa zu deim nohma, du Alli-Haychshtah,
2 fa dei grohsi leevi fakindicha meiyets,
un dei shtandhaftichkeit alli nacht,
3 mitt di zeyya-kshtringd harf,
un aw mitt di grohs harf.
4 Du machsht mich fraylich bei dei verka, oh Hah;
di verka funn dei hend macha mich singa mitt frayt.
5 Vi grohs sinn dei verka, oh Hah,
un vi deef dei gedanka!
6 En unksheidah mensh vayst dess nett,
un en dummah mensh fashtayt's nett,
7 es even vann di gottlohsa uf kumma vi graws,
un di evil-shaffah shteik vaxa,
zayla si endlich vekk gebutzt sei fa'immah.
8 Avvah du, oh Hah, bisht fa'immah da haychsht.
9 Fa gukk moll an dei feinda, oh Hah,
gukk moll, dei feinda zayla umkumma,
un awl di evil-shaffah vadda kshtroit.
10 Du hosht mich shteik gmacht vi da vild ox,
un hosht mich ksalbt mitt frish ayl.
11 Mei awwa henn mei feinda ksenna falla,
un mei oahra henn di gottlohsa keaht greisha es geyyich mich sinn.
12 Di gerechta zayla goot du vi en palma-bohm,
un zayla vaxa vi en cedar-bohm in Lebanon.
13 Si sinn geblanst im Hah sei haus,
un zayla goot du im tempel-hohf funn Gott.
14 Un vann si moll ald sinn,
zayla si noch bleeya, fruchtboah sei un gree sei,
15 un zayla sawwa, “Da Hah macht's recht;
eah is mei Felsa, un kenn ungerechtichkeit is in eem.”