Da 83. Psalm.
En Gebayt Geyyich Di Feinda Funn Israel
En Psaltah-Leet fumm Asaph.
1 Oh Gott, hald nett oh ruich sei;
bleib nett shtill un ruich, oh Gott.
2 Gukk moll, dei feinda macha en ufruah,
un selli es dich hassa hayva iahra kebb uf.
3 Si henn shlichtichi sacha im sinn geyyich dei leit,
si shkeema geyyich dei keshtlichi.
4 Si sawwa, “Kummet, vella si ausreiva es en folk,
so es da nohma funn Israel gans fagessa vatt.”
5 Si shaffa zammah geyyich dich mitt ay meind,
un macha en bund geyyich dich—
6 di tents funn Edom un Ismael,
un funn Moab un di Hagariddah,
7 selli funn Gebal, Ammon un Amalek,
di Philishtah, mitt selli funn Tyrus.
8 Un Assur is aw zammah ganga mitt eena,
fa em Lot sei nohch-kummashaft shteik macha.
(Sela)
9 Du zu eena vass du hosht mitt Midian,
vass du gedu hosht mitt em Sisera un em Jabin am Kison Revvah.
10 Si voahra umgebrocht an Endor,
un sinn vadda vi misht uf em grund.
11 Du zu iahra foah-gengah vass du hosht zumm Oreb un em Seeb,
un zu iahra roolahs vi da Sebah un da Zalmuna,
12 es ksawt henn, “Miah nemma fa uns selvaht,
es land es zu Gott heaht.”
13 Mei Gott, mach si vi en shtawvichah vind-veahvel,
vi shprau fannich em vind.
14 Vi feiyah da bush fabrend,
un vi flamm di hivla ohshtekt,
15 so gay eena nohch mitt dei shtoahm,
un fagelshtah si mitt shteikah vind.
16 Dekk iahra ksichtah zu mitt shohm,
so es si dei nohma bekenna missa, oh Hah.
17 Loss si sich ayvichlich shemma un angsht havva;
loss si umkumma in shohm.
18 Loss si vissa es du laynich sellah bisht vo da nohma Hah hott—
du laynich bisht da Alli-Haychsht ivvah di gans veld.