Da 69. Psalm.
En Roof Fa Hilf
Zumm foah-singah. Fa ksunga sei zu di veis “Lilya”. En Psalm fumm Dawfit.
1 Helf miah, oh Gott,
fa's vassah is ruff kumma biss an mei hals.
2 Ich binn am unnah gay in deefah drekk,
un's is kenn haddah grund fa mei fees.
Ich binn in deef vassah,
un di vella sinn am ivvah mich kumma.
3 Ich binn ausgvoahra funn roofa fa hilf,
mei hals is oahrich drukka.
Mei awwa sinn am dunkel vadda,
am voahra uf mei Gott.
4 Selli es mich hassa unni uahsach,
sinn may es di hoah uf meim kobb.
Selli es mich umbringa vella sinn mechtich,
un sinn mei feinda unni uahsach.
Vass ich nett kshtohla habb muss ich nau zrikk gevva.
5 Mei shuld is nett fashtekkeld funn diah, oh Gott,
du vaysht vi unksheit es ich voah.
6 Loss selli es in dich hoffa nett in da shohm gebrocht sei deich mich,
oh Hah, Awlmechtichah Gott.
Loss selli es dich sucha nett fashand vadda deich mich,
oh Gott funn Israel.
7 Fa dich binn ich am fashpott vadda,
mei ksicht is zu gedekt mitt shohm.
8 Ich binn en fremdah zu mei breedah,
un unbekand zu mei maemm iahra kinnah.
9 Di leevi fa dei haus hott mich innahlich fazeaht,
un di evila kshvetzah veyyich diah sinn nau uf mich kfalla.
10 Vann ich heil un fasht,
vatt ich fashpott.
11 Vann ich sekk-glaydah ohdu,
dann lacha di leit ivvah mich.
12 Ich binn's kshvetz funn selli es am doah hokka,
un di siffah singa veyya miah.
13 Avvah fa mich, oh Hah, mei gebayt is zu diah,
an di zeit vann's diah shiklich is.
In dei grohsi leevi,
gebb miah andvat mitt dei grohsi saylichkeit.
14 Zeek mich aus em drekk;
loss mich nett deefah unnah gay.
Mach mich frei funn mei feinda;
hald mich aus em deef vassah.
15 Loss nett dess grohs vassah ivvah mich kumma;
un loss mich nett fasaufa im deefa,
un loss aw nett's loch sei maul zu macha ivvah mich.
16 Gebb miah andvat, oh Hah, fa dei grohsi leevi is goot;
dray dich zu miah in dei grohsi bamhatzichkeit.
17 Fashtekkel dei ksicht nett funn deim gnecht;
gebb miah kshvind andvat, fa ich binn in druvvel.
18 Kumm nayksht zu mei sayl un mach mich frei;
mach mich frei funn mei feinda.
19 Du vaysht vi ich falacht, fashohmd un nunnah gedu binn;
awl mei feinda sinn fannich diah.
20 Kshvetzah es em grikt henn mei hatz fabrocha,
un's is miah falayt.
Ich habb gegukt fa drohsht, avvah's voah kennah,
un fa mitt-leidah, avvah ich habb kenni kfunna.
21 Si henn miah gall gevva zu essa,
un essich fa mei dasht.
22 Loss iahra grohsah essa dish en fall sei zu eena,
un iahra opfah-feshta en fang-shtrikk.
23 Loss iahra awwa dunkel vadda es si nett sayna kenna,
un iahra bikkel ivvah-gebikt sei fa'immah.
24 Leah dei zann aus ivvah si,
un loss dei brennichah zann si ivvah-kumma.
25 Loss iahra voon-blatz leah gmacht sei;
mach iahra tents gans leah.
26 Du dess veil si selli fafolka es du kshlauwa hosht;
si shvetza veyyich em shmatz funn selli es du vay gedu hosht.
27 Loss iahra sinda kumma, ayni uf di annah,
un loss si nett en dayl havva in dei gerechtichkeit.
28 Mach es si ausgrivva sinn im buch funn layva,
un loss si nett ufkshrivva sei mitt di gerechta.
29 Avvah ich habb angsht un binn in shmatza;
loss dei saylichkeit mich uf hayva, oh Gott.
30 Ich zayl Gott sei nohma preisa mitt en leet singa,
un gebb eem grohsi eah mitt dank.
31 Dess zayld em Hah may kfellich sei es en ox,
adda en yungah bull mitt hanna un hoofs.
32 Di aylendicha sayna dess un sinn froh;
diah es Gott suchet, losset eiyah hatza moot havva.
33 Da Hah heaht selli es noht henn,
un fa'acht nett selli es kfanga sinn.
34 Loss da himmel un di eaht een preisa,
un aw di say un alles es sich faraykt datt drinn.
35 Fa Gott zayld Zion helfa,
un zayld di shtett in Juda ivvah bauwa;
sei leit zayla datt voona un's ivvah-nemma.
36 Di kinnah funn sei gnechta zayla's eahva,
un selli es sei nohma leeva, zayla datt voona.