Da 52. Psalm.
Gott Sei Richtheit Un Gnawt
Zumm foah-singah. En lanning fumm Dawfit, vo da Doeg da Edomiddah zumm Saul kumma is un hott ksawt, “Da Dawfit is am Ahimelech sei haus ganga.”
1 Favass braeksht du veyyich evili sacha, du mechtichah mann?
Di grohs leevi funn Gott bleibt da gans dawk lang.
2 Dei zung macht shawda;
si is vi en shaufah raysah, du fafiahrah.
3 Du gleichsht evil may es goot,
un di falshheit may es di voahret sawwa.
(Sela)
4 Du gleichsht vadda es nunnah reisa,
du mitt en falshi zung.
5 Avvah Gott zayld dich nunnah brecha fa'immah:
Eah zayld dich uf nemma un dich vekk reisa funn deim tent;
eah nemd dei vatzla aus em land funn di levendicha.
(Sela)
6 Di gerechta zayla's sayna un zayla sich feicha;
si zayla lacha ivvah een un zayla sawwa,
7 “Gukket moll, dess is da mann
es sich nett falossa hott uf Gott fa fechta fa een,
avvah eah hott gedraut in sei grohsi reichheit,
un is shteik vadda deich anri nunnah reisa.”
8 Avvah ich binn vi en greenah ayl-bohm
im haus funn Gott;
ich drau im Gott sei shtandhaftichi-leevi,
fa'immah un immah.
9 Ich gebb ayvichlich dank zu diah fa vass du gedu hosht;
ich du mei hofning in dei nohma, fa dei nohma is goot.
Ich zayl dich preisa fannich dei saylichi leit.