Da 8. Psalm.
Em Mensh Sei Eah Geyyich Gott Sei Hallichkeit
En Psalm fumm Dawfit. Zumm foah-singah. Fa kshpeeld sei uf di Gitteth.
1 Oh Hah, unsah Hah,
vi hallich is dei nohma in di gans eaht.
Du hosht dei hallichkeit ovvich awl di himla ksetzt.
2 Aus di meilah funn kinnah un glenni boblen,
hosht du macht zugricht geyyich selli es geyyich dich sinn,
so es dei feinda un selli es ayva kumma vella shtill sei missa.
3 Vann ich ivvah di sacha denk funn dei himla,
di eahvet funn dei fingah,
da moon un di shtanna
es du kshaffa hosht,
4 vass is da mensh es du an een denksht,
un da sohn fumm mensh es du acht hosht fa een?
5 Du hosht een vennichah un niddahrah gmacht es di engel,
un hosht een gekrohnd mitt hallichkeit un kaynich-eah.
6 Du hosht een da roolah gmacht ivvah di eahvet funn dei hend;
du hosht alles unnich sei fees gedu:
7 awl di shohf un oxa,
un awl di vilda diahra fumm feld,
8 di fekkel im himmel,
di fish im say,
un alles es shvimd im say.
9 Oh Hah, unsah Hah,
vi hallich is dei nohma in di gans eaht!