146
Rehehati lat isen Iahova koa mutut moulien orer
1 !Rehehati lat isen Iahova!
!Inau nihou lat isen!
2 Nisan masmasien mini en avong vasi koa namul veah namoul.
Anatin, nihati lati hetal min souen keil onak.
3 Minalingtei desien onami en avat keil ten out netan,
veni meatin keil enges asakras avoutut moulien onami.
4 Navong keil umat, ave va ris vi atan,
ka tounah keil koa aling kati keke avoumoni mai rokol keite teni.
5 Ka sien mul en koakeil Ahi onen Siekob mul kataun keil,
mul en koakeil aling desien one en Iahova, Ahi one.
6 Veni kei varei mumon out nesa, out netan, atas, ka tounah vasi keil emun koa amul en keitel.✡ Umen 4:24; 14:15
Kei mul mum vasin hatkatien keil onen.
7 Kei varei mul sakin asa koa mal mai kistal en moulien onen koakeil mesav keil amul apurun keil.
Kei mul san anien min koakeil amai kat keil.
Iahova mul maen koakeil amul en hen mesav keil
uva amaluv.
8 Koakeil mete var,
mumon keil alele ris.
Iahova mul rali lat koakeil umot uva netan,
ka en vat koakeil sakien keil one mal.
9 Iahova vi eikokoe onen heou keil,
ka mul kataun vatina ka timaru keil.
Ka koakeil akalkali,
kei mul purun keil.
10 Kami koa miro en Hou Saeon, Iahova helosil kat kami lisenges.
Anatin, helosil kat revi kami hetal min vatiamal keil onami koa imai ikatau en kami.
!Sakini, rehehati lat isen Iahova!