17
Muohien ten keihoen onen Ahi vihil ka en Iesu✡ Mak 9:2-13; Luk 9:28-36
1 Avong ahetai (6) muli va, Iesu kur Pita, Tiemes ka tunali koa Sion telmusili ka mulamu en keitel telvina nesa en mari vatihou tai, en out koa keitel telro saseatel enges. 2 Ekonek, tellele telles aven Iesu viles. Veinan vihil suval meteiai, ka eisin omon vilahil muoh vis muoh suval laet.✡ 2Pit 1:16-18 3 Evus, telmali telles Mosis ka Ilaetsa lumul luselus ral min Iesu.
4 Navong Pita les keilu, viteni min Iesu vit, “!Asuv, tahos imok keke komaitel metro ekok! Munak keik em hehati, numon votevav hetel: tai onom, tai onen Mosis, ka tai onen Ilaetsa.”
5 Ka navong Pita mul veah selus, mahmah tai koa vihil mai mutaluh koe keil, ka along rea tai ka eni koa vit, “Koanik vi Natkuli kati ka envatien onak mul ien.✡ Sam 2:7; Mat 3:17; 12:18; Mak 1:11; Luk 3:22; 2Pit 1:17 Nasi nau houlu veni. !Mithelong kati!”✡ Dut 18:15; Umen 3:22
6 Navong Pita keitel tellong rea enek, telmetau houlu ramat, telmotmot, ka naeatel vita rokol atan. 7 Navong telmul veah netan, Iesu mai, rokol keitel, ka viteni vit, “Telmea. Mitnametautei.” 8 Ka navong tellele vina nesa, telroles etai mun meatin, Iesu enges ro ral min keitel.
9 Navong telmita ris netan ran vatihou enek, Iesu meng kat keitel vit, “Mitnahitentei tounah koa mitlesi min etai meatin hetokol avong koa inau, Natin Meatin, nimoul eris ran matien.”
10 Ka telmali telvisi telvit, “?Vensa tiser keil ten mengkatien onen Mosis aviteni keke Ilaetsa hemae helamu en Mesaea koa Ahi vat kati?”✡ Mal 4:5-6
11 Iesu vit kesi vit, “Anatin keke Ilaetsa hemae ka hesak mesein meatin keil ven amaien onen Mesaea. 12 Ka naviteni min kami keke Ilaetsa mai tuai✡ Mat 11:14; Luk 1:17 ka meatin keil arlei kileatei. Keil amum tisa mini suval koa e vati. Ka en vati sakien enek, inau, Natin Meatin, emun nikur mahien en hen meatin keil.” 13 Navong Iesu viteni mukok, keitel tellong kilea suk keke mul selus min keitel usil Sion Baptis.
Iesu sak revi ehon tai koa ninin tisa mul ien✡ Mak 9:14-29; Luk 9:37-43
14 Navong Iesu keitel telsuvul ran vatihou enek, telvisu en vangi meatin keil. Ka meatin tai mai ven Iesu, retengeiril mini 15 ka vit, “Asuv eli, em hemahis natkuli veni kei kur mesaien leimatmat ka mahien onen tisa mok. Avong houlu kei mot va en ahang vuo en oai. 16 Ka nakuri mai ven meatin keil onom ka asakras avasak revi.”
17 Navong longe mukok Iesu viteni vit, “!Ekovei! !Kami meatin keil ten avong kosa, mikalkali ka demkatien onami tovuol vareis!✡ Dut 32:5,20 ?Nito hetal kami hetokol nengeis? Avek mah en kami koa demkatien onami tovuol. Alkur ehon vamai venau ekok.” 18 Ka navong Iesu les ehon enek, vile lat ninin tisa koa mul ien ka va rani. Hatte tas, ehon enek mai ris tahos.
19 Katau, navong Iesu ro sasen meatin keil onen umai veni ka avisi avit, “?Vensa varei komai mesakras mevahile lat ninin tisa enek vaha?”
20 Ka Iesu vit kesi min keil vit, “Veni demkatien onami havivi ramat. Anatin eli naviteni min kami, munak mikur kat demkatien koa havivis suval titi uti mastard, mikilea mivahiteni min vatihou enek mivahit, ‘Kimea ran out ekok ka kiha ke va,’ ka kei heha. Munak demkatien onami mul, tounah tovuol vakeih mivoumoni.” 21 * Tei en tus keil onen Matiu aling selusien koanik mul ien koa vit, “Meatin kilea vasakin vati ninin tisa enek vamea ran meatin navong mul vis ka mul val ran anien.”
22 Amea ran out enek ka amual uva en provins ten out Kaleli. Ka navong amul amual, Iesu viteni min onen keil vit, “Hervitei tuetin, inau, Natin Meatin, isa lat nau niha en hen meatin keil ten out netan. 23 Keil uas nau nimat, ka en avong hetel teni, nimoul eris ran matien.”✡ Mat 16:21 Navong meatin keil onen alonge mukok, amundemko houlu.
Iesu vul takis ten Eim Votut ka en merikel tai
24 Avong tai, Iesu ka meatin keil onen amual ka akistal en taon ten out Kapaniam. Ekonek, meatin keil koa alah mani ten takis ten Eim Votut† Takis ten Eim Votut vi drakma elu ven amo keil vasi koa suval vatu taosen elu (2000). umai ven Pita ka avisi avit, “?Mukave? ?Tiser onom mul vul takis ten Eim Votut vuo rovultei?”✡ Eks 30:13; 38:26
25 Ka Pita vit kesi min keil vit, “Anatin, kei mul vuli.”
Ka navong Pita va neim en eim onen, roselustei veah ka Iesu visi vit, “?Mukave Saemon Pita? ?Komundem sa? ?Asuv houlu keil ten out netan alah takis ka duti‡ Duti suval takis ten vat koa aling kati en tounah vasi koa akuri ran out sav. ran isei? ?Alahi ran titae keil kati vuo alahi ran meatin sav keil?”
26 Ka Pita vit kesi mini vit, “Alahi ran meatin sav keil.”
Iesu viteni mini vit, “Hemukonek, titae keil kati arvultei takis. 27 Ka avaseini keke Ahi koa vi Asuv Houlu en tounah vasi vi Tata oralu, lehul takis ten Eim Votut onen veni rotahostei lovoumon meatin keil enek avalele vatisa en ialu. Sakini kiha en Mari Oai ten out Kaleli ka kison huk onom. Mesau koa kisare helamu, kikoh vas ongon ka kihotin mani tai koa hevinvin en takis oralu. Kikuri ka kiha kisani min keil.”
✡17:5: Sam 2:7; Mat 3:17; 12:18; Mak 1:11; Luk 3:22; 2Pit 1:17
✡17:10: Mal 4:5-6
✡17:13: Mak 9:14-29; Luk 9:37-43
✡17:17: Dut 32:5,20
*17:21: Tei en tus keil onen Matiu aling selusien koanik mul ien koa vit, “Meatin kilea vasakin vati ninin tisa enek vamea ran meatin navong mul vis ka mul val ran anien.”
†17:24: Takis ten Eim Votut vi drakma elu ven amo keil vasi koa suval vatu taosen elu (2000).
✡17:24: Eks 30:13; 38:26
‡17:25: Duti suval takis ten vat koa aling kati en tounah vasi koa akuri ran out sav.