21
Siob sa kes selusien onen Sofar
Siob 21:1-2,5-7,13-15,17,23-26,34
1 Evus, Siob vit kesi min keitel vit,
2 “Mithelong revi asa mahiteni.
Munak emi vat mivoumon nau malonge vatahos, mithesan ralingomitel enges.
5 “!Mithelele ka mitheles inau!
!Hesakin mithetimanin ka emitel hevon!
6 Navong namundem usil tounah koa sut nau,
alok maleilei ka namundemko houlu.
7 ?Vensa varei meatin tisa keil aro tahos?
?Vensa amatu ka ales amas en moulien one?
13 “Keil arokol keite ten moulien one en tomat,
ka umat en merauen.
14 Meatin tisa keil aviteni min Ahi avit, ‘!Kiling komai mehel sasomai enges!
Emai rovattei mevailea sise keil onom.
15 ?Ahi vi isei keke meheha netan mini?
?Mehekur sa munak mehehis mini?’
17 “?Nengeis roles Ahi muh vini laet ten moulien onen meatin keil koa amukonek?
?Nengeis avisu en avong takeih?
?Nengeis Ahi vuroh kat keil ka san mahien min keil?
!Vuo, rolestei varei!
23 “Meatin tai, en moulien vasi onen, mul les amas ka tomat.
24 Kei longe tahos rokol avong mat.
25 Meatin tamun, sien tovuol varei en kei.
En avong vasi onen, kei mul les mahien rokol matien.
26 Keite ten moulien onealu vatte tas.
Lumat, arahin keilu, ka oul kan vasi teiai onealu.
34 “?Ka kamitel, mitvit mitvoumon nau malonge vatahos en selusien keil koa vi heisav enges? !Vuo!
!Selusien vasi koa mitsani minau vi luvosien!”