46
Ahi ten keihoen mul ven ir
1 Ahi vi keihoen ka vi out tatosuaien orer,
sak mesei lises vakataun ir en avong takeih keil.
2 Sakini, rehermetautei,
avaseini munak alu houlul ka vatihou keil imaru iha en huinev ten atas.
3 Rehermetautei munak atas hevuvu, helohloh ka hemavul,
ka sakin atan ka vatihou keil akulul.
4 En taon onen Ahi, oaisal tai mue luhu eni.
Taon enek vi out votut koa Ahi ten out nesa mul ien, ka oaisal enek mul sakin meatin keil en out enek asi keil.
5 Ahi varei mul en meteimal enek,
sakini asakras avou rasilini.
Anatin, en visokon semau, hemai hesan kataunien min koakeil aro ien.
6 Ahi hesel hesuval voulul,
ka ren hesakin atan hemasil.
Hesakini, meatin keil ten out netan isil,
ka keihoen onen asuv houlu keil hemerangle.
7 Iahova, asuv houlu ten out nesa, mul ven ir.
Ahi onen Siekob vi out tatosuaien orer.
8 Mihemai, miheles asa koa Ahi Asuv mumoni.
Miheles marmari tounah keil koa mumoni en out netan.
9 Huhuen keil ten out netan, kei mumoni evus varei.
Kum vulvul hisuput keil ka ai takan keil emun.
Ka ai keil tatosuaien, Ahi munit lini.
10 Ahi viteni min keil vit, “!Miheha netan ka miheilea keke inau navi Ahi!
!Keihoen onen asuv keil ten out netan mules en hek!
Ka moulien onen tounah vasi keil ten out netan emun mules en hek.”
11 Iahova, asuv houlu ten out nesa, mul ven ir.
Ahi onen Siekob vi out tatosuaien orer.