19
Dxusa's cielute weçxana ũsni
1 Txãa e'su' cielujũ nasa wala kuhsa sus we'weni wẽse'th na'jĩna:
Kwe'sx Dxus çxhãçxhasa txãa yuuçxáa ewte nvxiit-sa',
Sa' txãa yuuçxáa jxtuhthesa',
Txãa pa'ga kwe'sx Dxusa's weçxaaga.
2 Txãasaíik çxhab txã'wẽ kazx yũuwa'ja'sçxáa kaapiya'jsa's kastigãy,
Naa kiwete kazx yũuna suwna ũssa's.
Sa' Dxusna selpisaatx ikhpa'ga ka'tuwa Dxusa' kastigãyku jĩ'tx.
3 Txajũ' ki'kin we'wetx na'jĩna:
—Kwe'sx Dxusa's weçxaaga. Txãa çxhab çxhavxyni aja' bagaçxte yuhwa pçumée sxi'tana nes yuuna jĩ'çpkaçxha', 4 weintikuatro jxkaahsawe'sx vxite' Dxus vxitni ĩtxĩsa pahzsawe'sxa' Dxus jxkaahna u'psa tasxte peejxũkweçxa weçxatx na'jĩna:
—Txã'wẽ yuh ew yuuk. Txãa pa'ga Dxusa's weçxaaga jĩ'tx.
5 Txãa e'su' Dxus jxkaahna u'pnijũ teeçx na'jĩna we'wenik pthũuse:
Kwe'sx Dxusa's mtuuthe'jwe, txã'sna selpisaawe'sx
Le'çxkwesa ma'k yuu meeçxawa walasa ma'k yuu nawa txã'sçxáana nwẽese'jna jxukaysa jĩ'k.
Cielute boda fxiesta ãani
6 Txajũ' nasa wala kuhsa we'weni na'wẽsa'sthu wẽse'j txãa yu' kuh yu' susni na'wẽk pthũuse', vxite' kpi'sx sus we'weni na'wẽ. Sa' na'jĩ'tx:
Dxusa's wala yuh weçxaaga, txãa pa'gatey kwe'sx Dxus kĩhtewa jxuka ãjãsa txã' jxkaajxa' takhyã'kh.
7 Aça' seena' wala weçxana txã'sa' tuuthe'jega, txãa pa'gatey Piisxakuẽ jĩnisa nyuu yuuwa'jsa' ya'pheu'kh,
Aça' boda fxiesta ena' ãjxã'kh.
8 Txãa nyuu yuuwa'jsa' ropa iiméh zhiçxkwe çxihmesa's kaathe'jnik yuu jĩ'tx.
(Txãa ropa ewsa yu', Dxus dxi'pte jxpubamée ew fxi'zeni jĩnisa'.)
9 Txajũ' Dxus angela' na'jĩnak fxi'khaah:
—Piisxakuẽ jĩnisa boda fxiestate pi'kxnisawe'sx yakha' wala yuh weçxa yuja' jĩna kfxi'ja'jçxa', na'jĩnak we'we:
—Na'wẽ we'wenisa' Dxus kwe'we'jnisa isasata' jĩte', 10 adxa' Dxus angel tasxte neewe'weya' peejxũkweth. Nawa txãa yu' na'jĩ'k:
—Adxa's peejxũkwenu. Adxa' Dxusna selpisáa idx na'wẽysaíiçxáath, iidx yakhthẽ'jwe'sxwa ma'wẽta Jesus kaapiya'jni isasa's jxpubamée pta'sxna pekũjũ' txã'wẽysath. Aça' Dxusçxáana mneewe'we. Na'wẽ kĩhwa yũuna jĩna kaavxya'ja'th txãa yu' Jesus ma'wẽsatewa kaajiyu'jsata' jĩ'k.
Jiba çxihmete a'jçxa kasehsa
11 Txãa e'su' cielu phateçxa ũsteth uy, aça' teeçx jiba çxihmesak vxyaa. Kxte a'jsa yu': Isasaçxá's Kxtey Yuusáa jĩnak kxsusni yu', txãa pa'gatey isasa yu'sa' jxuka kxtey yuuna puiiçxa knayku naa pa'ga. 12 Sa' txajx yafx yu' ipx beesa na'wẽk eena' kweethe'. Dxikthete yu' wala kuh korona ji'phu'k, sa' vxite yase fxi'jni ji'phu'k txãa yase's txãa yuuçxáak jiisa yu'. 13 Txajx athni ropa yu' eete akhnisa'sku jxaath yu'. Sa' txãa yu' Dxus ma'wẽsatewa txã'sna kaajiyu'jsa' jĩnisak yu'. 14 Aça' txãa yakh u'jsa yu' cielutewe'sx jxukaysa jiba çxihmesatetx a'jçxa u'jweç yu', ropa ewsa çxihme atesa's athçxa. 15 Sa' txajx yuwesu yu' espada seena' zeksak sẽhna ũsu', txãa yakh maa kiwetewe'sxtxiwa knaywa'jsa. Txã'wẽ yũuçxak maa kiwetewa jxuka juuna' yuuna txãaçxaçxáa juuna' jxkaahwa'jsa yu'. Sa' ewmeesa yuutxi's seena' kastigaĩna kxũusu'jna, uwatx ku'ssawa ma'wẽga seena' yũ' txã'wẽy yũuna Dxus kĩhtewa jxuka ãjãsa txã'wẽ seena' kastigaĩna. 16 Sa' txajx athni ropate vxite' jĩ'besu na'jĩna fxi'jnik ji'phu': Maa Jxkaahsatewa Jxthaakwe Jxtuhthesa', sa' Maatewa Jxthaakwe Çxhãçxhasa' jĩna.
17 Txãa e'su' Dxus angel sekte yujuçxa ũsteth uy, txã' na'jĩnak sus we'we uuniisa çxiçxtxi's ũ'sa vxiçxakuẽtx:
—Jxukaysa pkhaakheçxa myuhwe ũ'ya' i'kwe'sx ũ'wa'j Dxus ũsku txã's. 18 Sa' ũ'wene'kwe uusaawe'sx çxiçx, jxkaahsawe'sx ma'k yuu, npiiçthẽ'jwe'sx ma'k yuu, nasa iiméh jxtuhthesa ma'k yuu, jiba uuniisa ma'k yuu, jibate a'jsa uusaawe'sx ma'tx yuu, patron ji'phsa ma'k yuu meeçxa' patron ji'phmeesa ma'k yuu, le'çxkwesa ma'k yuu walasa ma'k yuu nawa txãatx jxuka pkhakhçxa mẽ'we jĩnak we'we.
19 Txajũ' uythu eçx seena' kazxsa vxite' naa kiwete jxkaahsawe'sx txajx nasa yã'jçxa jxukaysa pkhaakheçxa txãa jibate a'jsa yakh vxite' txajx nasa yã'jçxa pdxi'puçxa puiiya' ũste. 20 Nawa eçx seena' kazxsa Kristo's açewe'wesa vxite' eçx kazxsa Dxus yuwe pta'sxsa na'wẽ kĩhwa kaavxya'ja'jçxa kaypuba'jsa txãa yakh e'zíi tudnitx yuu, txã'wẽ Kristo's açewe'wesa iisawa'jni's kaaki'pu'jna eçx seena'sa piisani yuuk txã'snawa neewe'wekahn kaypuba'pha'ga. Txajũ' txãa e'zíitx ipx wala asufxre yakh behna ũsa' txkhẽe wãatãanitx yuu ĩtxĩtey. 21 Txajũ' jibate a'jsa yuwesu espada seena' zeksa sẽhna ũsu'k txãa espadaju ikhnitx yuu nasa ewmeesa yuutxi's, aça' uuniisa çxiçxtxi's vxiçxakwe' txikpkaçxtxi ũ'.