1 Txãa entey nasa iiméh wala kuh pkhaakheçxa kĩh yuhwa ũ'wa'j ji'phmeete', Jesusa' txãa yakh u'jusawe'sxtxi pa'yaçxa na'jĩk:

2 —Naa nasa' tekh en yã'j adx yakh ũsta', nawa kĩh yuhwa ũ'wa'j ji'phmeeta' aça' adxa' peeygãja'th. 3 Kĩh yuhwa puuçmée yatna kaathe', maaíi yu' jxu'juwe'sxta' na' wẽeçxa dxi'the çxhãçxhameetxna jĩte', 4 txãa yakh u'jusawe'sx pasçxa':

—¿Ma'wẽ puuçya' ya'ãjãkx, aysũ' nasaa yatçxáa yuhwa meeta' aça'? jĩte', 5 Jesus pẽjxçxa':

—I'kwe'sxa' ¿maz pan ji'phkwe? jĩte':

—Sieteçxáa ji'ptha'w jĩnatx pas.

6 Txajũ' Jesusa' nasatx kiwesu kaçxkaahçxa', siete pantxi jxpa'gaçxa Dxusna weçxana'wa, pe'ltedeçxa txãa yakh u'jusawe'sxtxi ũsu'sku, nasa txazkuẽesatx puuçkahn. Aça' txãawe'sxa' kxtey yuutx. 7 Sa' wedxwa ji'phu'tx kuhmeekwe, aça' Jesusa' Dxusna weçxana'wa, txãa wedxtxi txudeedekaakh. 8 Aça' jxukaysa txiktxi ũ'. Txãa ũ' kijxaate' siete kanastate utatx pkhakh. 9 Txãa ente txã'wẽ ũ'sa' kuatro mil ãhtx yu'. Txajũ' Jesusa' nasatx kaahna'wa, 10 txãa yu' barkote khẽek txãa yakh u'jusawe'sx yakh Dalmanuta kiwen u'jya'.

11 Kxtee pa'the', fxariseowe'sxwa pa'jçxa Jesus yakh puutx we'wetx. Sa' ma'wẽ yũutewa jiyuya' Jesusa's pẽjxtxi:

—Cieluju kĩhçxáawa mkaavxya'ja'j jĩna.

12 Txã'jĩte', Jesusa' wala nxus yajkxna na'jĩk:

—Naa nasa' ¿kĩjxa'ki'tx txã'wẽ cieluju kaavxya'ja'j jxthãasu'? Isa yu' txãa nasatxi' kĩhwa kaavxya'ja'jnimée wejx ewna jĩk. 13 Txã'jĩçxa', nasatx nvxihtna' ki'kin barkote khẽena'wa ĩkh kuten u'kh.

14 Sa' peçxkanaçxa ũ'wa'j yu' ji'phmée barkote u'jweççxatx yajkx. Naasáa teeçx pançxáatx ji'ph yu'. 15 Txajũ' Jesusa' na'wẽk jxpa'yakx kaah:

—Mpa'yajkxwe, Herodes vxite' fxariseowe'sx lewadura ewmeesa's jĩte', 16 Jesus yakh u'jusawe'sxa' txãawe'sx pwe'sx na'jĩnatx puutx we'we:

—Pan ji'phmeetha'w, txãa pa'gane' txã'jĩ' jĩtx. 17 Aça' Jesus wẽsẽ'jçxa na'jĩk:

—¿Maa sũhçxakwe txã'wẽ pan ji'phmeetha'w jĩna we'wé'? ¿Ãçxpkaçx jiyu'çmeewá'kwe, pan ji'phmeetewa thẽymée sã'jĩni's yaaki'çmeewá'kwe? ¿I'kwe'sx ũuste khẽje'çmeewá'? 18 I'kwe'sxa' yafxju yu' uyçxawa, jiyuya' yu' ãjã'çmeewá'kwe, sa' adxa' kĩhnawa thẽymée ãjãni's yaaki'çmeewá'kwe. 19 Miiyajkxwe wakx: Tahç pantxi txudeedeçxa cinko mil nasatx puuçte', ¿maz kanastakwe pkhakh kijxasaatxi'? jĩte', txãawe'sx pasçxa':

—Doce kanastatha'w pkhakh jĩtx.

20 —Aça' siete pantxi txudeedeçxa kuatro mil nasatx puuçte', ¿maz kanastakwe pkhakh kijxasaatxi'? jĩte', txãawe'sx pasçxa':

—Siete kanastate utatha'w pkhakh jĩtx.

21 Aça' Jesus we'weçxa':

—Txã'wẽ thẽymée yũunisatxi' yaaki'çmeewá'kwe sane'kwe txã'wẽ ũ'wa'j pan ji'phmeetha'w jĩna we'we'.

22 Txajũ' Jesusa' Beçaida çxhabte pa'the', kxteea' teeçx piçthẽ'j uyya' ãjãsame'stxi nuypa'j, nuykatxhikahn pxthaa we'wena. 23 Aça' Jesusa' txãa uyya' ãjãsamée kusete pu'kisçxa, çxhab eka pe'jna u'jçxa', yafxte fxne'sx sxũsxna'wa yafxte jxa'dxku. Txã'wẽ yũuçxa pẽjxku:

—¿Ma'wẽçxá' uyu'gá'? jĩte', thegu'gçxa':

24 —Nasa' fxtũu tasx na'wẽçxáatx vxya', nawa ẽsẽ'se'tx jĩk.

25 Txajũ' Jesusa' ki'kin txajx kuseju yafxte jxa'dxku, aça' yafxa' phaatete' ew uyya' ãjãk.

26 Txajũ' Jesusa' neewe'wek:

—Çxhabsu u'kameene'ga, sa' maa yuhtxwa pta'sxmeene'ga iidx yafxtxi kim phaadetewa jĩnak yatna kaah.

27 Jesusa' txãajũ ki' u'kh txãa yakh u'jusawe'sx yakh kasehçxa. Sa' Fxilipo vxitni çxhab Cesarea ja'dasuk pekũjxa' u'jweç yu'. Txajũ' dxi'the u'jweçíi txãawe'sxtxi pẽjxku na'jĩna:

—Adxa's ¿kimna jĩ'ta nasa'? jĩte', 28 txãawe'sx pasçxa':

—Maaíi yu': Juan Bautistana jĩ'tx. Aça' vxite we'weçxa': Eliasna jĩ'tx. Aça' vxite we'wesa': Txãniiteywa ma'wẽta Dxus yuwe pta'sxsa kaseje' txã'wẽysana jĩ'tx jĩte', 29 Jesusa' na'jĩnak pẽjx:

—Aça' i'kwe'sxa' ¿kimna sũju'kwe?

Txã'wẽ pẽjxte', Pedro pasçxa':

—Idxa' Kristo, Dxus tasxu yuusag jĩte', 30 Jesusa' maa yuhtxwa pta'sxkaahme'.

31 Txajũ' Jesusa' pta'sxku:

—Dxus Nçxi'k Nasa Yuusa' wala pkxuuni pa'ga yuuna, sa' judiu nthẽ'jsawe'sx vxite' sacerdote npiiçthẽ'jwe'sx vxite' Dxus leya's kaapiya'jsawe'sx ahçeçxa kiikhe'jetxna. Aça' uuçxawa tekh ente' ki' ĩtxĩ yuuna jĩk.

32 Jesusa' txã'wẽk ew ãate pta'sx. Aça' Pedro' Jesusa's fxiite pe'jna u'jçxa, yu'kxpejk. 33 Txã'wẽ yu'kxpehte', Jesusa' vxitetx yu'thegçxa', Pedro's na'jĩnak pas:

—Eçxthẽ'j, adx tasxu mtxutée. Idxa' Dxus jxthãasni yu'sa' kxtey yuumée, naa kiwete nasaa yaakxniçxá'sgu kxtey yuu wẽjẽ' jĩçxa', 34 Jesusa' txãa yakh yuusawe'sxtxi pa'yaçxa na'jĩk:

—Maa nasawa adx yakh yuu wẽeçxa', peekx kakwe jxthãasni's kĩhnawa jxuka nvxihtçxa yuuçxáa adx yakh yujxa' ãjãne'kwe, makwe thẽysa uuwa'j ma'k pa'j nawa txã'sa' yajkxmée. 35 Nawa naa kiwete ĩtxĩ fxi'zewa'jçxá's ya'nwe'wesa', Dxus yakh fxi'zewa'j yu'sa' ivxiituna. Naapkaçxha' Dxus yuwe's nwẽesẽ'jçxa adx yakh fxi'zepa'ga naa kiwete ĩtxĩ fxi'zeni's yajkxmée ivxiitusa', Dxus yakh fxi'zewa'j yu'sa' ivxiitumeena. 36 Makwe naa kiwetewe'sx yu'sa' jxuka knayçxawa peekx ũus yu's ivxiitute', ¿kĩhteçxá' selpiima'k? 37 Peekx ũusa's ivxiituyã'the', ¿kimçxa' nwe'wema'k? 38 Maa nasawa adxa's jxpa'gaya' wa'lna adx pta'sxnitxwa wa'lutxna nasa ewmeesa açewe'wete aça' txã'wẽ yũusa's Dxus Nçxi'k Nasa Yuusaawa Dxus angeleswe'sx yakh eena' kweethna kĩhçxa' jxpa'gaya' wa'luna jĩk.