1 Jxkaase en skhẽwniijũ kuskuskhẽ mjĩiwa'j en ãanite wala kusíitey Maria Magdalena vxite Maria yakh txãawe'sxa' u'jtx pedaní kafxte thegya'. 2 Naapkaçxha' ehd seena' çxhãçxha u'kh, txã'wẽ Dxus angel cieluju kĩhçxa pedaní kafxte aphni kweta's kiispa'ga. Sa' txãa yu' txãa kwet kajkwete kaçxçxa 3 kpi'sx kweneni na'wẽk khikhyna u'p yu', aça' txajx athni ropa' seena' zhiçxkwe çxihme yu'tx. 4 Aça' soldauwe'sxa' txã'wẽsa's uyçxa', ũukhnite jxuka yayaçxa uuníi na'wẽtx wete. 5 Aça' txãa u'ywe'sxtxi' Dxus angela' na'wẽk we'we:

—Ũukhnuwe, adxa' jiith, Jesusna kluuste fxuçtxi txã'sna i'kwe'sxa' thegya' yuji'kwe. 6 Nawa ayte' meeyã'ja'. Uuniijũ ki' ĩtxi yuuçxa u'kh ma'wẽga pta'sx txã' kxtey yuuk. Mkaane'ta khikh txkaa myuhwe thegya'. 7 Sa' wala dud me'jwe, txãa yakh u'jusawe'sxtxi na'wẽ pta'sxya': Uuçxawa ki' ĩtxi yuuçxa Galilea kiwen u'jweça' i'kwe'sx yaçte. Kxtee puutx uyuune'kwe jĩna pta'sxine'kwe. Txã'wẽ pta'sxwa'th ji'phu i'kwe'sxtxi jĩk Dxus angela'.

8 Txajũ' u'ywe'sxa' wala dud wuwuuna u'jtx Jesus yakh u'jusawe'sxtxi pta'sxya' ũukhnawa ũuste wẽt wẽt yajkxna. 9 Naapkaçxha' Jesusa' txãawe'sx u'jweçte dxi'the vxyaaçxa weçxana kũjk. Aça' txãawe'sxa' Jesus tasxte peejxũkweçxa txajx çxidatx psxa'dçxa weçxatx. 10 Aça' Jesusa' na'jĩk:

—Ũukhmée me'jwe, sa' adx yakhthẽ'jwe'sxtxi pta'sxine'kwe Galilea kiwen u'jçxa kxtee adxa's puutx uyuune'kwe jĩnak pta'sxkaah.

11 U'ywe'sx txã'wẽ u'jweçpkaçxha', pedaniite thegna ũssa soldauwe'sx maaíi yu' u'jtx Jerusalente sacerdotewe'sxtxi pta'sxya' kĩh yũuni'swa jxuka. 12 Txajũ' sacerdotewe'sxa' judiu nthẽ'jsawe'sx tasxte u'jçxa puutx we'wetx. Txã'wẽ yũuçxa soldauwe'sxtxi' wala vxyu dukhtxi. 13 Sa' na'wẽtx we'wekaah: Kuspxãh kwe'sx deenite Jesus yakh u'jusawe'sx pa'jçxa uuníi kakwe's pesweeta jĩne'kwe i'kwe'sxa'. 14 Aça' txã'wẽ yuh dehne'ta sũhçxa ne'jwe'sxa' i'kwe'sxtxi ewmeete nvxiit wẽjewáana, nawa kwe'sx u'jçxa txãa yakh puutx we'we'nja'w i'kwe'sx ju'gu txã'wẽ yũukahmén.

15 Txã'wẽ kwe'we'the', soldauwe'sxa' vxyu's jxpa'gaçxa kxtey yuutx. Aça' txãasatx judiuwe'sxa' ãçxpkaçx txã'wẽçxáa pta'sxi'.

16 Txã'wẽ yũuyã'the', Jesus yakh u'jusa oncesawe'sxa' Galilean u'jtx, thã'j vxiçte mteene' Jesus pta'sx kxtee. 17 Sa' Jesusa's uyçxa', peejxũkweçxa weçxatx, nawa vxiteíi yu' txãamée wáana sũhna kuhtx yaaki'. 18 Txajũ' Jesusa' txãawe'sx tasxte utxaaçxa na'wẽk we'we:

—Cielute vxite' naa kiwetewa adxnaçxaçxáak neewe'weni yuu jxkaahwa'ja's. 19 Txãasath i'kwe'sxtxi jxkaaja': Me'jwe Dxus yuwe's pta'sxya' maa kiwetewa nasa jxukaysatx. Txã'wẽ yũuçxa' yu'te bautisaĩne'kwe, Dxus vxite' Dxus Nçxi'k vxite' Dxus Espiritu txãawe'sxtxi neewe'weçxa. 20 Sa' Dxusa's nwẽese'jwa'ja's kaapiya'jane'kwe kĩhtewa jxuka, adx ma'wẽtka i'kwe'sxtxi jxkaah txã'wẽy. Mjiyuwe, ãçxhũyã'ja' een isa bagaçxtewa i'kwe'sx yakh nes yuuya'wath naa kiwe pçuupkaçx jĩk.