1 Jesusa' txã'wẽ pta'sxna jxã'jçxa', txãa yakh u'jusawe'sxtxi na'jĩnak we'we:

2 —I'kwe'sxa' jii i'kwe Paskua fxiesta ãjxa' e'z ençxáa yã'j peejxa', aça' txãa ente' Dxus Nçxi'k Nasa Yuusa's uweçxa dukhni yuuna kluuskhẽ a'kxçxa ikhkahn jĩk.

3 Txãa entey sacerdote npiiçthẽ'jwe'sx, ley kaapiya'jsawe'sx, judiu nthẽ'jsawe'sxa' pkhaakhetx sacerdote npiiçthẽ'j Kaifxas yat patxute, 4 sa' txãawe'sx pwe'sx puutx we'wetx nasa jiyunimeete paaçte Jesusa's uweçxa ikhya'. 5 Txãasatx fxiesta ente yu' txã'wẽ ikhya'mée puutx we'we nasa wala suskahmen.

6 Txãa ensu' Jesusa' Betania çxhabte Simon wã'jy weeju katxhisa yattek ũsu'. 7 Aça' teeçx u'y utxaana kũjk aceite wẽt putasa's fxraskote uta awniisa wala pa'gasa's atçxa. Sa' Jesus kaçxçxa u'pte', txajx dxikthekhẽk jxuka aw. 8 Txã'wẽ yũuni's Jesus yakh u'jusawe'sx uyçxa', na'jĩnatx ũusçxa we'we:

—¿Txakwe yuja' wala psuwmanx? 9 Txã'wẽ yũupkaçxte wejxwa pa'gate txweyçxa txãa vxyu's puuplesatx peeswaçne' wejx ew yu' jĩte', 10 Jesus wẽse'jçxa' na'wẽk we'we:

—¿Kĩjkwe kuçx susu' naa u'ya's? Na'wẽ yũunisa' psuwnisame'. 11 Puuplesa' bagaçxtewa i'kwe'sx yakh nes yuutxna. Nawa adxa' i'kwe'sx yakh nes yuuwa'jsameeth. 12 Naa u'y adx kakwekhẽ aceite wẽt putasa's awku, nawa adx uute pedaawa'ja's pheu'jnaçxáak txã'wẽ yũu. 13 Isath we'we': Naa kiwete mtee mteewa Dxus yuwe's pta'sxna pekũhsa' naa u'y txã'wẽ yũuni'swa ja'da pta'sxni yuuna peçxkanamée jĩk.

14 Txajũ' Jesus yakh u'jusa docesatewe'sx Judas Iskariote yaasesa' sacerdote npiiçthẽ'jwe'sx yakh puutx we'weya' u'jçxa 15 txãawe'sxtxi na'jĩk:

—Jesusna uweçxa dukhte' ¿maz deweeki'kwe? jĩte', txãawe'sxa' treinta vxyutx deweya' neeyũu. 16 Txajũ' Jesusa's ma'wẽ yũuçxa txãawe'sx kusete dukhya' ãjawa'ja's wala pakwek.

17 Pan lewadura ji'phmée ũ'ni fxiesta en ãjaçte', Jesus yakh u'jusawe'sxa' txajx tasxte utxaaçxa na'wẽtx pẽjx:

—Paskuate ũ'wa'ja's ¿mteega pheu'j jxthãasu'? jĩte', 18 na'wẽk jxkaah:

—Jerusalenna me'jwe, kxtee teeçx piçthẽ'ja's jii i'kwe txã'sna na'jĩne'kwe: Kwe'sxtxi kaapiya'jsa' na'jĩnak yuwe kaah: Adx uuwa'j en utxaak, aça' iidx yatte Paskua's yu'skhẽwya'wath adx yakh u'jusawe'sx yakh jĩne'kwe jĩte', 19 txãa yakh u'jusawe'sxa' Jesus jxkaahni's kxtey yuutx, sa' ũ'wa'ja's pheu'jtx.

20 Txajũ' jxuka çxhi'dxiçte', Jesusa' docesawe'sx yakh kaçxku mesate ũ'ya'. 21 Sa' ũ'na u'pçxa', na'wẽk we'we:

—Isath we'we', i'kwe'sx yakh u'jusa teeçxsa' adxa's açesawe'sx kusete dukhya'wa' jĩte', 22 txãawe'sxa' wala nxusçxa paapẽjxtxi teeçx teeçxçxah:

—¿Adx ma'th? jĩna. 23 Aça' Jesusa' pta'sxku:

—Maa txã'wẽ adx yakh ja'daçxah kuse's akhena plaatukhẽ txãa txã'wẽ adxa's açesawe'sx kusete dukhwa'jsa'. 24 Dxus Nçxi'k Nasa Yuusa' ma'wẽ uuwa'jsatewa Dxus librute pta'sxi'k txã'sa' kxtey yuuya'wa'. Nawa adxa's açesawe'sx kusete dukhsa' ¡seena' yuh nxuste khẽjena! Txãa piçthẽ'ja' naa kiwete wejx yuuwa upxmeewaçne' wejx ew yu' jĩte', 25 Judasa' pẽjxku:

—Meeçxa' ¿adxwá'ntkakx? jĩte', Jesus pasçxa':

—Idxíig jĩk.

26 Ũ'na u'pçxa', Jesusa' pana's jxpa'gana'wa Dxusa's weçxaçxa pe'ltedek, sa' txãa yakh u'jusawe'sxtxi ũsu'sku na'jĩna:

—Mẽ'we, naa pana' adx kakwe na'wẽsa' jĩçxa', 27 waso'swa jxpa'gana'wa Dxusa's weçxaçxa txãawe'sxtxi ũsku na'jĩna:

—Jxukaysa mtudxwe naa wasotewe'sxa's. 28 Naa wasotewe'sxa' adx ee na'wẽsa'. Dxusa' maazkuẽesa pkaltxiwa khũkhçxa nwe'wewa'ja's vxitku, nawa adx eea's pkawçxa yuuçxáak txã'wẽ nwe'wewa'ja's vxit. 29 Nawa na'jĩ'th na': ãçxhũyã'ja' peena yu' tudxme'nja naa uwa yu'a's, naasáa adx Tata jxkaahwa'j enteçxáa yã'j ki' i'kwe'sx yakh pkhaakheçxa tudxi'nja jĩk.

30 Txajũ' Dxusna weçxana memna jxã'jçxa', u'jtx Oliwos thã'j vxiçna. 31 Aça' kxtee pa'jçxa', Jesusa' na'jĩnak we'we:

—Naa kuste' i'kwe'sx jxukaysa adxçxáana nvxihtçxa txuteene'kwe. Txãa pa'gatey txã'wẽ yũuwa'ja's Dxus librute na'jĩ'k: Piisxáa-thegsa's ikhte', piisxá' jxuka ũphuutxna jĩ'k. 32 Nawa adxa' uuçxawa ki' ĩtxi yuuçxa' i'kwe'sx yaçte u'jwe'nja Galilean jĩte', 33 Pedro' na'wẽk pas:

—Makwe vxite yu' idxçxáana nvxihtçxa txuteetewa, adx yu' txã'wẽ yũume'nja jĩte', 34 Jesus pasçxa':

—Isath we'we', naa kuste atalx we'wemeyna idxa' Jesusa's jiimeeth jĩna tekh us ĩsxiijane'ga jĩte', 35 Pedro' na'wẽk we'we:

—Makwe idx yakh ja'datey uuwa'jma'k kaseh, nawa idxa's jiimeeth jĩna yu' ĩsxiime'nja.

Aça' txãa yakh u'jusawe'sx jxukaysa txã'wẽçxaçxáatx we'we.

36 Txajũ' Jesusa' txãa yakh u'jusawe'sx yakh Geçemaní yaasesate pa'jçxa', na'wẽk we'we:

—Ayte mkaaçxwe, naapkaçxha' adxa' Tata yakh puutx we'weya' u'jweçthu jĩçxa', 37 Pedro vxite' Zebedeo nçxi'k e'zsatx pe'jçxak u'j. Sa' ũuste wala nxus ũusuthete', na'jĩk:

38 —Txakwe wala pxthaa yuuçxa uuwa'ja's yajkxte', wala nxus yuja'. Aça' i'kwe'sxa' aytee neeyũuçxa dehmée jxpa'yakx me'pwe adx na'wẽy jĩçxa', 39 Jesusa' jxu'jmée u'jçxaçxáa txkaa pkipha weteçxa Dxus yakh puutx we'wek na'jĩna:

—Tata, idxa's ewuweçxte', adxa's meen nwe'we txakwe wala pxthaa yuuwa'ja's jxpa'gakahmen. Nawa adx jxthãasni yu'sa' kxtey yuumeeçxawa, iidx jxthãasniçxá's kxtey meen yũu.

40 Txajũ' Jesusa' ki' sxawedku Pedrowe'sx tasxtey, sa' dehna ũste uyçxa' na'wẽk we'we Pedro's:

—Adx yakh jxpa'yakx dehmée ũsya' ãjameewá'kwe teeçx oraçxáawa. 41 Ewmeete weteya'mée jxpa'yakx dehmée me'pwe Dxus yakh puutx we'wena. I'kwe'sxa' ũusuh yu' çxhãçxhai'kwe yaaki', nawa i'kwe'sx kakwe yu' çxhãçxhaçme' kxtey yuuya'.

42 Txajũ' Jesusa' ki'kin u'jçxa', na'jĩnak Dxus yakh puutx we'we:

—Tata, txakwe wala pxthaa yuuwa'ja's yu'pthejxa' ewuweçxmeete', iidx jxthãasni kxtey yuuwaççxáa ewna jĩçxa', 43 Pedrowe'sx tasxte ki' sxawedçxa', txãawe'sx yafx çxhãçxhameete ki' dehna ũstek uy. 44 Sa' nyafxíi na'wẽyçxáa we'weçxa tekh uswa ki' u'kh, Dxus yakh puutx we'weya'. 45 Txã'wẽ yũuçxak Pedrowe'sx tasxna sxawedna kũhçxa', na'wẽ we'we:

—Ãçxh yuuçxá' mdejxujíiwe jxkaaseya'. Dxus Nçxi'k Nasa Yuusa's pkalsawe'sx kusete dukhwa'j en ãjk. 46 Aça' kiiteçxa u'jwega. Adxa's açesawe'sx kusete dukhwa'jsa' yujxã'ja' jĩk.

47 Jesus kxtee we'wena nee ũsiyna, Judasa' pa'kh. Txã' docesatewe'sxíiçxáak yu'. Aça' txãa yakh nasa wala kuh pa'jtx kçxilx vxite' fxtũ atçxa. Txãawe'sxa' sacerdote npiiçthẽ'jwe'sx vxite' judiu nthẽ'jsawe'sx jxkaahnisatx yu'. 48 Judasa' na'jĩnaga yu'kxwe'weçxa pe'jna yuwé' Jesusa's tudkahn:

—Ma'sna dxi'pte adx weçxa'nja txã'sna tudçxa jxũna u'jwene'kwe jĩnaga we'we.

49 Txãasak Jesus tasxte utxaaçxa na'wẽ we'we:

—Kwe'sxtxi jxpe'jsa jĩna'wa weçxak.

50 Aça' Jesusa' na'jĩk:

—Namiku, ¿kĩjxa' yuhga? jĩçpkaçxha', tudtxi jxũna u'jya'.

51 Txã'wẽ tuduçpkaçxha', Jesus yakh pi'kxna u'jusa teeçxsa' kçxilxa's jxkuutxi'jçxa sacerdote npiiçthẽ'ja's selpisáa thũ'wẽ's spẽ'thku. 52 Aça' Jesusa' we'wek:

—Iidx kçxilxa's mjxaaw. Txã'wẽme', jxukay maawa kçxilxuh puiisa', kçxilxteyçxáa uuwa'jsata'. 53 Adx Tata's maazkuẽe angeleswe'sxwa adxna nwe'wewa'jsa pẽjxte', kxtey yuuna sũju'çmeewá'ga. 54 Txã'wẽ pẽjxte', kxtey yuuyujuna, nawa Dxus librute' nyafxiitey pta'sxni yã'kh yu' ãçxh na'wẽ tuduçta' txã' kxtey yuukahn, aça' nwe'wewa'jsa pẽjxme'nja.

55 Txã'jĩçxa' tudsatxku we'we:

—Adxa' pesweethas i'kwe adxa's tudxa' kçxilx petx fxtũ atçxa pa'j. Adxa' kaapiya'jya' een isath dxuus yatte i'kwe'sx ksxavxyte nes yu'. Nawa txagaçxhíi yu' tudmeei'kwe. 56 Nawa Dxus yuwe pta'sxsawe'sx fxi'jçxa nvxiitni kxtey yuukahnçxáa txã'wẽ yuuça' jĩk. Naapkaçxha' Jesus yakh u'jusawe'sxa' txã'sçxáana nvxihtçxa jxuka ũphna u'jtx.

57 Aça' Jesusa's tudçxa jxũna u'jtx sacerdote npiiçthẽ'j Kaifxas tasxte. Kxteea' ley kaapiya'jsa vxite' judiu nthẽ'jsawe'sx txãawe'sxtxi pkhaakheçxa ũs yu'. 58 Aça' Pedro' e'ste jxu'j neeyũuçxak yuhna ũsu', sacerdote npiiçthẽ'j yat patxute u'kapkaçx, sa' kxtee policiawe'sx yakh kaçxçxa neeyũuk kĩh yũutewa uyya'.

59 Naapkaçxha' sacerdotewe'sx, judiu nthẽ'jsawe'sx vxite' jxukay kxtee pkhaakheçxa ũssawe'sxa' Jesusa's kiikhe'jya' sũhçxa kĩhçxáawa ĩsxiiwa'jsa pakwe'tx. 60 Makwe nasa maazkuẽesa kĩhçxáawa pta'sxna kũhtewa, ĩsxiiniçxáak kaseje'. Nawa nmehte' e'z nasa ĩsxiisa kũhçxa na'wẽtx pta'sx:

61 —Naa piçthẽ'ja' na'jĩ'k: Adxa' naa dxuus yata's pẽtxçxa tekh ente' ki' txaja'nja jĩ'k jĩna pta'sxte', 62 sacerdote npiiçthẽ'ja' kiiteçxa Jesusa's na'wẽk we'we:

—¿Kĩh yũuçxaga ma'wẽçxáawa pasu'çmée? Meeçxa' ¿isa yuh txã'jĩwá'nta? jĩtewa, 63 Jesusa' pasme'. Aça' sacerdote npiiçthẽ'ja' na'wẽk we'we:

—Dxus ĩtxisa dxi'pte jurãyçxa isasaçxá's mpeeta'sx. Idxa' ¿Kristo Dxus Nçxi'k dxihgá'? jĩte', 64 Jesus pasçxa':

—Idxa' isag we'we'. Adxa' i'kwe'sxtxi na'jĩ'th na': Dxus Nçxi'k Nasa Yuusa's uyuune'kwe Dxus pukate kaçxçxa u'pte sa' cieluju tãaph pxãhte kĩjaçtewa uyuune'kwe jĩte', 65 sacerdote npiiçthẽ'ja' ũusaçxaçxa peekx athni ropa's sudek na'jĩna:

—Naa piçthẽ'ja' txajx yuweju yuu açewe'wek Dxusa's, aça' ¿kĩjxa'çxáa testigo jwee pejiikxtha'w? Txajx açewe'weni's i'kwe'sxíiwa wẽse'ji'kwe. 66 Sa' ãçxha' ¿maa sũju'kwe? jĩte', txãawe'sxa' na'wẽtx pas:

—Txã' yuuwesa', txãa pa'ga ikhwa'j yuuna jĩtx.

67 Txajũ' Jesus dxi'pte fxne'sx avxythethçxa uyiitx, aça' vxite' dxi'ptetx uka'ka na'jĩna:

68 —Idxa' Kristo dxihçxa', mjiyu kimga dxi'pte ujka.

69 Txã'wẽ yuuçpkaçxha', Pedro' ekaju patxutek kaçxçxa u'pu'. Aça' teeçx kna'sa selpisáa utxaana kũhçxa na'wẽk we'we:

—Idxwa Jesus Galileajuwe'sx yakh u'jusag jĩte', 70 Pedro' jxukaysa dxi'pte:

—I'kwe we'weni's jiimeeth jĩnak ĩsxii.

71 Txajũ' Pedro' vxitxte kasehna u'jweçpkaçxha', vxite kna'sa selpisaawa uyçxa' kxtee ũssatx na'wẽk pta'sx:

—Naa piçthẽ'jwa Nasarettewe'sx Jesus yakh u'jute uythu jĩte', 72 Pedro' ki' ĩsxiik jurãyna:

—Txãa piçthẽ'ja's adxa' jiimeeth jĩk.

73 Txaçxmeynaçxáa kxtee ũssawe'sx Pedro tasxte utxaaçxa na'wẽtx we'we:

—Isa, ĩsxiimée idxwa txãawe'sx yakh u'jusag. Txã'wẽçxaíi iidx we'weni' peedame' jĩte', 74 ki' jurãyçxa na'wẽk we'we:

—Txãa piçthẽ'ja's jiimeeth, isa Dxus uyte.

Txã'jĩna ũspkaçxha', atalx we'wek. 75 Aça' Pedro' yajkxku Jesus na'jĩna we'weni's: Atalx we'wemeyna, idxa' tekh us ĩsxiijane'ga jiimeeth jĩni's. Txã's yajkxçxa', Pedro' eka kasehçxa seena' wala nxusna ũ'nek.