1 Txã'wẽ we'wena jxã'jçxa', Jesusa' Galileaju kasehna u'jçxa Judea kiwesu Jordan yu'kutetek pa'j. 2 Kxte ũste', nasa wala pa'jtx, aça' nuykatxhik ãça'satx.

3 Naapkaçxha' fxariseowe'sx maaíi yu' Jesus tasxte utxaana kũhçxa na'wẽtx pẽjx, pasya' sxiigte' ewmée vxit-ya' sũhçxa:

—Ptamsaçxawa, nyu kĩjkuẽçxáa ãhmée yũuteçxáa txãapa'ga wãatahte ¿ewmanx? jĩte', 4 Jesusa' na'wẽk pas:

—I'kwe'sxa' ¿Dxus librute iilẽeymeewá'kwe? Kxtee we'weçxa': Dxusa' nyafxiitey e'zíitx ja'daçxajk vxit piçthẽ'j petx u'y yã'jçxa. 5 Txãa pa'ga piçthẽ'ja' peekx neywe'sx tasxu txuteeçxa peekx nyu yuuwa'jsa yakh utxaawa'jsa', txã'wẽ e'zçxawa teeçxsaçxáa na'wẽ yuuna pa'jya' jĩ'k Dxus librute'. 6 Txã'wẽ yũunijũ', e'zmée teeçxçxáak yuuna pa'ja'. Txãa pa'ga Dxus pũpxçxa nvxiitniijũ' ptamsayã'ja' txuteewa'jsameeta'.

7 Txã'jĩte', na'wẽtx pẽjx:

—Txã'wẽte', Moisesa' ¿kĩjxa'ga peekx nyu yakh txuteeçxa eç vxitçxa nyu's ũsçxa txuteewa'ja' jĩna jxkaaja'? jĩte', 8 Jesusa' na'wẽk pas:

—I'kwe'sx txã'wẽ Dxus jxkaahni's nwẽese'jmeeçxa nyu yakh txuteena fxi'zepa'ga íiçxáak Moisesa' txã'wẽ yũuwa'ja's nvxiht. Nawa txã'wẽ yũuwa'ja's nyafxiitey Dxus nvxiitnisa yu'çme'. 9 Adxa' na'jĩ'th na': Nyu txã'wẽ vxite piçthẽ'j yakh pkal yuuna fxi'zesameete wáa nyu's wãatahçxa vxite u'y yakh ptamuuna na' txã'wẽ vxite yakh ptamuupa'ga pkal kazx yuusáa yuuna. Meeçxawa nmi' wãataanisa u'y yakh maawa ptamuuna na' txã'wẽ u'y wãataanisa yakh ptamuupa'ga pkal kazx yuusaaíiçxáa yuuna jĩte', 10 Jesus yakh u'jusawe'sxa' na'wẽtx we'we:

—Txã'wẽte', ptamumée fxi'zeni wejx ewna jĩtx. 11 Aça' Jesusa' na'wẽk pas:

—Txã'wẽ yuja', nawa jxukay yu' ptamumée fxi'zeya' ãja'çmeeta', naasáa kimnane' Dxusa' ptamumée fxi'zewa'ja's nvxiht txãaçxáa ptamumée fxi'zeya' ãjana, vxite' ptamumée Dxusçxáana selpiina fxi'zewa'jsata'. 12 Na'wẽsa yu' ptamumée fxi'zeya' ãja'tx: Maaíi yu' ptamumée fxi'zeya' upxsatxna, aça' vxitetxi's naa kiwete piçthẽ'jwe'sx íiçxáatx ptamumée fxi'zewa'ja's vxitu', aça' vxite' ptam yuumée Dxusçxáana selpiina fxi'zewa'jsata'. Ptamumée fxi'zeya' ãjasa', ptamumée fxi'zetxna jĩk.

13 Txajũ' Jesus tasxte luuçxkuẽ nuypa'jtx, luuçx dxikthesu peekizeçxa Dxus kusete neewe'wekahn. Nawa Jesus yakh u'jusawe'sxa' ũusçxa we'wetx nuypa'jsatx. 14 Aça' Jesusa' na'wẽk we'we:

—Luuçxkuẽ adx tasxte yuusaatxi' kuçx yupnuwe, txãa pa'gatey cielute Dxus jxkaahna ũsnisa' naa luuçxkuẽwe'sx na'wẽsa jĩi íiçxá'.

15 Txã'jĩçxa', luuçxkuẽwe'sx dxikthesu peekizeçxa Dxus kusete neewe'weçxa', txajũ u'kh.

16 Txãa e'su' teeçx piçtakx Jesus tasxte pa'jçxa na'wẽk pẽjx:

—Kaapiya'jsa wala ewsa, mpeeta'sx. ¿Kĩh ew yũuçxa pçumée ĩtxi fxi'zewa'ja's ji'phuki'th? jĩte', 17 Jesus pasçxa':

—¿Kĩh yuupa'gaga adxa's ewsa jĩ'? Ew yũusa' teeçx yuuçxáa ũsa' txã' Dxusa'. Aça' pçumée ĩtxi fxi'zewa'ja's ji'phu wẽeçxa', Dxus jxkaahnitxi' kxtey myuu jĩte', 18 piçtakxa':

—¿Maatxna? jĩna pẽjxte', Jesusa' pta'sxku:

—Dxusa' na'wẽk jxkaaja': Nasa ikhwa'jme', ptamsayã'ja' vxite yakh pkal yuuwa'jme'. Pesweewa'jme'. Vxitetx ĩsxiina nuywe'wewa'jme'. 19 Neywe'sxtxi peeygãhna ewçxáa yũuna fxi'zewa'ja'. Peekíi ma'wẽga ya'peeygãja' txã'wẽy mpeeygãh vxite nasatxwa jĩte', 20 piçtakx pasçxa':

—Txãatxi' le'çxkuẽjũjx kxtey yuunath waláa, aça' ¿kĩh wejx peejxna? jĩte', 21 Jesus pasçxa':

—Dxus jxkaahnitxi' jxuka kxtey nwẽese'jsa yuu wẽeçxa', u'jçxa iidx ji'phunitxi' jxuka txweyçxa ji'phmeekuẽsatx mes. Sa' txã'wẽ yũuçxa' cielute ji'phsa yuune'ga. Txã'wẽ yũuçxa adx yakh myuh jĩte', 22 txãa piçtakxa' txã'wẽ wẽse'jçxa' nxusnak u'j, wala ji'phsa yu'k txãa pa'ga.

23 Txajũ' Jesusa' na'wẽk we'we txãa yakh u'jusawe'sxtxi:

—Isath we'we', ji'phsa yakha' wala yuh thẽya' Dxus jxkaahna ũsnite u'kawa'j. 24 Na'jĩ'th na': kamelxo txakwesa' ¿ma'wẽ yũz kafxga khẽwya' ãjakx? Aça' ji'phsa yakha' txãate jxthaakwe thẽya' Dxus jxkaahna ũsnite u'kawa'j.

25 Txã'jĩni's wẽse'jçxa', Jesus yakh u'jusawe'sxa' wala kuh yajkxtxi, sa' txãawe'sx pwe'sx na'wẽtx puutx ya'paapẽyi':

—Txã'wẽte', ¿kimçxá' ewte neeyũuya' ãjama'k? jĩte', 26 Jesus thegçxa' na'wẽk we'we:

—Nasa' Dxus yakhmée yu', ewte neeyũuya' ãjameeyuhtxna. Nawa Dxus yakh yu', kĩh yuhwa thẽysa meea'.

27 Txã'jĩte', Pedro' na'wẽk pẽjx:

—Kwe'sxa' idx yakh yujxa' kwe'sx ji'phuni's jxuka nvxihttha'w, sa' ¿kĩh jxpa'gakxtha'w? jĩte', 28 Jesusa' na'jĩnak pta'sx:

—Isath we'we', naa kiwete pkalsa's jxuka yu'pthehçxa ewsaçxaçxáa yuuwa'j en ãhte', Dxus Nçxi'k Nasa Yuusá' pa'jçxa jxkaajxa' takheçpkaçxha', adx yakh yuusáa i'kwe'sx docesawa adx yakh jxkaahsa yuune'kwe Israel ji'j docesatx. 29 Maawa jxukaysa txã'wẽ adx yakh yujxa'çxáa txãawe'sx yat, kiwe, nyakhwe'sx, npe'sxwe'sx, neywe'sx, nyu, nçxi'kwe'sx, niisawe'sx txãatx jxuka nvxiit-sa' txãa nvxiitnisate jxthaakwe wala jxpa'gatxna, sa' pçumée ĩtxi fxi'zewa'ja'swa jxpa'gatxna. 30 Nawa jxpa'yakxmeete', makwe yaçtewe'sxçxawa, nmehtewe'sx yuutxna; naapkaçxha' nmehtewe'sx yu', yaçtewe'sx yuutxna jĩk.