1 Txajũ' Jesusa' txãa yakh u'jusa docesatx pa'yaçxa na'wẽ yũuya' ãjawa'ja'sku ũs: eçxtxi nasa ũusuh kutxi'jna kĩh weete ãça'satxwa nuykatxhina, kĩh aka ji'phtewa jxuka yu'çe'jya' ãjawa'ja'sku ũs.

2 Txãa docesawe'sxa' na'wẽtx yaase yu': Nyafxtewe'sxa' Simonku yu', txã'sa' Pedro jĩ'tx. Vxite' txajx nyakh Adres. Vxite' Zebedeo nçxi'ktxi yu', Jakobo Juan pxakhsa. 3 Vxite' Fxelipe, Bartolomé, Tomás, vxite' Mateo gobierno jĩi vxyu pkhakhsa. Vxite' Alfxeo nçxi'k Jakobo, vxite' Lebeo txã'snaíiçxáa Tadeo jĩ'tx. 4 Vxite' Simonku yu', kananista nasa. Vxite' Judas Iskariote, Jesusa's açesawe'sx kusete dukhwa'jsa.

5 Txãa yakh u'jusa docesatx Jesusa' na'wẽk neewe'weçxa kaah:

—Judiu ji'jmée vxite nasa kiwesu' u'jnuwe, sa' Samaria kiwesu çxhab ũstxna kxsũwa u'jnuwe, 6 wejxwa Israel ji'j piisxakuẽ na'wẽ jxpubana ũsta' kxsũçxáa me'jwe. 7 Sa' pta'sxine'kwe Dxus jxkaahwa'j ena' ãjxã'kh jĩna. 8 Ãça'satxwa nuykatxhine'kwe, uusaatxwa ki' ĩtxi vxitune'kwe, wã'jy wee kazx ji'phsatxwa nuykatxhine'kwe. Eçxtxiwa nasaa ũusuh kutxi'jine'kwe. I'kwe'sx txã'wẽ ãjawa'ja's vxyupa'gamée i'kwe jxpa'ga na', nuykatxhipa'ga vxyu pẽjxmeene'kwe.

9 Kĩh vxyu yuhwa jxũmée me'jwe. 10 Ya'ja, spaatu, khãabu txãaçxáa yuhtxwa jxũmée me'jwe, naasáa teeçx kmiisaçxáa jxũçxa me'jwe, txãa pa'gatey mjĩisa' puuçni fxi'zewa'jsa'.

11 I'kwe'sxa' çxhab wala meeçxa' çxhab le'çxkwesu mtee pa'jçxawa, kxtee paadejene'kwe nasa ewsa tasxsu, vxite ahte u'jwa'j en ãhpkaçx. 12 Yatte pa'jçxa, ewçxáa we'wena weçxana pa'jane'kwe. 13 Txãa yatte nasa ew jxpa'gate', Dxus yakh weçxana fxi'zewa'ja's pta'sxine'kwe. Nawa txã'wẽ yũumeete', pta'sxmeene'kwe. 14 Sa' i'kwe'sxtxi jxpa'gamée, pta'sxni'swa wẽse'jya' wa'lte', yatte ma'k yuu meeçxa' çxhabte ma'k yuu nawa txajũ kasejeççxa', i'kwe'sx çxidate kiwe tuhda's sakweekweçxa kasejene'kwe kxah yuuwesa yuutxna. 15 Isath we'we', Dxus kastigãywa'j en ãhte', txã'wẽ yũusa nasa' seena' yuh ya'kastigaĩtxna, Sodoma Gomoçxa çxhabsu nasate jxthaakwe.

16 Mwẽese'jwe, adxa' i'kwe'sxtxi piisxakuẽ na'wẽ kajaçthu yu'kh eçx ksxavxysu. Aça' i'kwe'sxa' ikhwe'sxte ul na'wẽ jxpa'yakx mfxi'zewe, nawa iideewewa'j yu'sa' ji'phmée tub çxihme na'wẽ myuuwe. 17 Mpa'yajkxwe, txã'wẽme' nasa' i'kwe'sxtxi uweçxa khuẽswe'sx tasxte dukhetxna, sa' judiuwe'sx pkhaakheni yat-suwa pãpatxna. 18 Kxsũçxáa kuutxa'jmée ne'jwe'sx tasxsu vxite' jxkaahsa tasxte yuhwa pe'jna u'jni yuune'kwe, adx yuwe's pta'sxpa'ga. Txã'wẽ yũutewa, kxsũwa txãawe'sx dxi'pte tuuthe'jeíiçxáa ne'kwe adxa's vxite' judiu ji'jmeesa dxi'ptewa. 19 Txã'wẽ khuẽswe'sx tasxsu kuutxa'the', kuh yaakxnuwe, ãçxha' ¿ma'wẽ pasukxtha'w? sũhna. Txãa pa'gatey txã'wẽ yũuçpkaçxha', Dxusa' i'kwe'sxtxi kaaũusuthe'jena ma'wẽ paswa'ja'swa. 20 I'kwe'sx ũus yaakxniju we'wemeene'kwe; Dxus Espiritu i'kwe'sxtxi kwe'we'jena.

21 Peekx nwe'sxíiçxáa txãawe'sx nyakhtxi ahçeçxa kiikhe'jetxna. Aça' neywe'sxa' peekx nçxi'ktxi ahçeçxa kiikhe'jetxna, naapkaçxha' nçxi'kwe'sxa' neywe'sxtxi ahçeçxa kiikhe'jetxna. 22 Adxna nwẽese'pha'ga naa kiwete nasa jxukay i'kwe'sxtxi açetxna. Txã'wẽtewa, ũukhmée çxhãçxha uu entepkaçx fxi'zesa' txãawe'sx ũusa' Dxus nwe'weni yuutxna. 23 Txã'wẽ ahçeçxa ikhya' pakweeçpkaçxha', txãa çxhabuh kasehçxa vxite ahte me'jwe. Isath we'we', i'kwe'sx txã'wẽ Israelwe'sx çxhabsu jxuka pekũhmeyna, Dxus Nçxi'k Nasa Yuusa' kĩijana.

24 Piyasa' maa yuhwa kaapiya'jsate jxthaakwemeeta'. Txã'wẽ selpisa' patronte jxthaakwesame'. 25 Kaapiya'jsa ma'wẽ pkxuuni yuute', piyasaawa txã'wẽy nxuswa'ja's jxpa'gawa'jsata'. Aça' selpisaawa patron ma'wẽ pkxuuni yuute', txãawa txã'wẽy nxuswa'ja's jxpa'gawa'jsa'. Yat namu's Eçxthẽ'j jĩna kxsusçxa', txajx jxpe'jnisa yuutxi' wejx txã'jĩna we'wetxna.

26 Txã'wẽ yũutewa, nasatxi' ũukhnuwe. Adx we'weni' kĩh yuhwa txã'wẽ paaçte yu' neeyũuwa'jsame', sa' kĩh yuhwa txã'wẽ sũthçxa jiyunimée yu' neeyũumeena. 27 Adxa' i'kwe'sxçxáatxthu we'we', nawa txãa we'weni's nasa ma'wẽsatxwa jxuka ãate mwe'wewe. Sa' naa ja'date ayteçxáa we'weni's msuuwa jxuka mwe'wewe. 28 Kakweçxá's ikhsa's ũukhwa'jme'. Txãawe'sxa' ũus yu'sa' ikhya' ãjameetxna. Wejxwa kakwe petx ũus yã'jçxa infxiernote kaajxa' ãjawa'jsa's wejx ũukhwa'ja'.

29 E'z vxiçxakwetx teeçx centawote ¿txweyu'çyuhmeetxna' wakx? Txã'wẽ pa'gameekwesaçxawa, maa yuhwa kiwekhẽ wete'çmeeta', i'kwe'sx Tata' txã'wẽ jxthãasmeete yu'. 30 I'kwe'sx dxikthete dxkhas yuhwa jxuka isani ũsta'. 31 Ũukhnuwe, i'kwe'sxa' txãa vxiçxakwete jxthaakwe pa'gasai'kwe.

32 Maawa ũukhmée adx ju'gu we'wesatxi', adxwa adx Tata cielute ũsa' txajx tasxte txãawe'sx ju'gu we'we'nja. 33 Nawa maawa nasatx ũukhçxa adxa's jiimeeth jĩna ĩsxiijana txã'sa' adxwa txã'wẽyçxáa jiimeeth jĩna we'we'nja adx Tata cielute ũsa' txajx tasxte.

34 Naa kiwete yahçemée fxi'zewa'ja's nvxiht-ya' kĩhmeeth, nxuste yahçena fxi'zewa'ja's nvxiht-ya'th kĩh. 35 Adxna nwẽese'pha'gaçxáa neya' nçxi'ka's açena, naapkaçxha' njĩ'ja' niisa's açena, aça' swegra' nkuẽmyu's açena. 36 Txã'wẽ adxna nwẽese'pha'ga peekx yattewe'sxíiçxáa yaaçeni fxi'zetxna.

37 Maawa adx yu's yajkxmée naasáa ney vxite' njĩ'j txãawe'sxçxáatx jxthaakwe yaakxsa', adxa's selpiiya' ãjameetxna. Txã'wẽy maawa adx yu's yajkxmée naasáa nçxi'k vxite' niisa txãawe'sxçxáatx jxthaakwe yaakxsa' adxa's selpiiya' ãjameetxna. 38 Makwe thẽysa uuwa'jma'k pa'j nawa txãatxi' yajkxmée fxi'zesame' adx tasxte selpiiya' ãjameena. 39 Naa kiwete peekx ĩtxi fxi'zewa'jçxá's ya'nwe'wesa', cielute fxi'zewa'j thaakwe ewsa yu'sa' ivxiituna. Naapkaçxha' adxna nwẽese'pha'ga naa kiwete ĩtxi fxi'zeni's yajkxmée ivxiitusa' cielute ĩtxi fxi'zewa'j yu'sa' ivxiitumeena.

40 Maawa i'kwe'sxtxi wa'lmée jxpa'gasa', adxnawa jxpa'gasaçxa txã'wẽ yuuna. Sa' adxna jxpa'gaçxa', adxna jxkaahsanawa jxpa'gasa yuuna. 41 Dxus yuwe pta'sxsa txãawe'sxa' Dxus jxkaahnisata', aça' maawa txãawe'sxtxi wa'lmée ew jxpa'gasa', Dxus peesni's jxpa'gawa'jsata', Dxus yuwe pta'sxsatx peesni's íiçxáa. Sa' nasa ewsatx jxpa'gasa' ewsaçxa txã'wẽ yuuna, sa' nasa ewsatx dewenisa's íiçxáa jxpa'gana. 42 Isath we'we': Adxna nwẽese'jsa makwe wala ãhmeekwesatewa txã'sna yu'fxizeçxáawa yussa' dewenisa yuuna.