1 Jesusa' na'wẽk kaapiya'j txãa yakh u'jusawe'sxtxi:

—Nasatx pkalte kweete'jsa yu' bagaçxtewa nes yuutxna. Nawa pkalte kweete'jsa' wala yuh nxus kastigo knayuuna. 2 Aça' txãa pkalte kweete'jsa's skuutxh ũ'khni kweta's txhikhte tudçxa ĩkh wala dxiikhẽ wãatãhwaç yuuçxáa wejx ewna, naa le'çxkwesatx pkalte kweete'khamen. 3 Txã'wẽ yũuya'mée jxpa'yakx me'juwe.

Meeçxawa idxa's wáa ãhmée yũuna iidx yakhthẽ'j aça' txã'sa' myu'kxpeh. Txajũ' ãhmée yũusa': Meen peltunaĩ jĩte', idxa' peltunãywa'j ji'phgu. 4 Makwe teenteçxáa sietepkaçx ãhmée yũuçxawa, kxaz usíi idxa's perdon pẽjxya' pa'the', idxa' peltunãywa'j ji'phgu jĩk.

5 Txajũ' Jesus yakh u'jusawe'sxa' na'wẽtx pẽjx:

—Dxusçxáana wejx çxhãçxha yajkxna fxi'zekahn kwe'sxtxi' meen pu'çx jĩte', 6 Jesus pasçxa':

—Dxusa' pu'çxhina sũhwa'ja's mostasa nxinx na'wẽkuẽçxáawa ji'phwaça', naa fxtũu tasxa's khubeteçxáa ĩkh walate me'j khẽeya' jĩte', txãa fxtũu tasxa' kxtey yuuna jĩk.

7 I'kwe'sxa' teeçx selpisáa ji'phte', txã' mjĩi ehsu u'juçxa kusuçte pa'the': Myuh ayte kaçxçxa ũ'ya' ¿jĩma'kwe? 8 Txã'jĩmée wejxwa na'wẽ kajane'kwe: Adx ũ'wa'j ĩiçe'jçxa mesate pheu'jçxa mtxah. Sa' adx ũ'na jxã'the, idxa' ũ'wene'ga jĩne'kwe. 9 Patrona' ¿selpisa's weçxama'k txã'wẽ kxtey yuupa'ga? Weçxameena. 10 Txã'wẽy i'kwe'sxa' Dxusa's selpiwa'jsai'kwe na' makwe txajx jxkaahni's jxuka kxtey yuuçxawa, weçxaa jxthãaswa'jsameei'kwe jĩk.

11 Txajũ' Jesusa' Jerusalenna u'jweççxa', Samaria vxite' Galilea kiwesuk skhẽwna u'j. 12 Aça' teeçx çxhabte' diez piçthẽ'j wã'jy wee kazx ji'phsatx Jesusa's puutx uyya' kaseh. Nawa jxu'theçxáa yujuçxa, 13 na'jĩnatx sus we'we:

—Kwe'sxtxi meen peeygãh jĩte', 14 Jesusa' txãawe'sxtxi' na'wẽk jxkaah:

—I'kwe'sx kakwetx sacerdotewe'sxtxi txwesya' me'jwe jĩna jxkaathe', txãawe'sxa' dxi'the u'jweçtxi yu', naapkaçxha' txãa wã'jy we' naa dudte jxuka wẽetku. 15 Aça' teeçxsa' katxhiyã'jçxa', dxi'juu sxawedku Dxusa's sus we'wena weçxana. 16 Sa' Jesus tasxte kũhçxa' peejxũkwek: Weçx ew yũug jĩna. Txãa piçthẽ'j yu' Samariajũwe'sxku yu'. 17 Aça' Jesusa' na'jĩk:

—¿Diezsaíi jxuka katxhimeewá'nta? Vxite nwewesa yu' ¿mteeta yuu? 18 ¿Naa piçthẽ'j vxite ajũwe'sxçxáa wá' Dxusna weçxaya' sxawed? jĩçxa', 19 txãa piçthẽ'ja's na'jĩk:

—Kiiteçxa me'j. Idxa' katxhinig neeyũu, txã'wẽ Dxusa' nuykatxhina sũhçxane'ga kxtey nwẽesẽ'j naa pa'ga jĩk.

20 Txajũ' fxariseowe'sxa' Jesusa's na'jĩnatx pẽjx:

—¿Bagaçx Dxusa' isa naa kiwete jxkaajakx? jĩte', Jesus pasçxa':

—Dxus naa kiwete jxkaahni's yafxju yu' ãate ya'uymeena. 21 Dxusa' jxkaajxa' pa'jçxa: Ãçxha' ayte ũsa' meeçxawa kxtee ũsa' jĩna ya'we'wemeena. Txãa pa'gatey i'kwe'sxa' Dxus jxkaahni enteyã'j ũsi'kwe.

22 Txajũ' txãa yakh u'jusawe'sxtxi na'jĩnak yu'kxpeh:

—I'kwe'sxa' Dxus Nçxi'k Nasa Yuusáa naa kiwete kĩini's dud uy wẽjẽne'kwe, nawa dud yu' uymeene'kwe. 23 I'kwe'sxtxi' nasa yu' na'jĩwáatxna: Ayte ũsa' meeçxa' kxtee ũsa' jĩtewa, u'jmeene'kwe sa' nwẽesẽ'jwameene'kwe. 24 Kpi'sx kwehnewaççxáa ma'wẽ naa dudte majũwa jxuka vxyaakx, txã'wẽyçxáa yuuna Dxus Nçxi'k Nasa Yuusáa pa'jwa'j en ãhte'. 25 Nawa txãa en ãhmeyna, Dxus Nçxi'k Nasa Yuusa' wala pa'ga yuuna naa ensu nasa yaaçeni. 26 Noé ensuwa ma'wẽga yuu, txã'wẽyçxáa yuuna Dxus Nçxi'k Nasa Yuusáa pa'jwa'j ensuwa. 27 Noé ensu nasa' kĩh yuhwa peejxmée ũ'na ptamuuna vxite' txãawe'sx niisatx kaaimi'a'jnatx ũsu'. Nawa Noé barkote u'kaçpkaçxha', nus wala pa'jçxa ĩkh utate' jxuka uutx. 28 Lot ensuwa txã'wẽytxi yũuna ũsu', kĩh yuhwa peejxmée ũ'na, uuthasx vxitna, txweyna, yatwa txã'wẽytxi wala txahna ũsu'. 29 Nawa Lot Sodomajũ kasejeçpkaçxha', cielujũ asufxre behna kĩhçxa jxukaysatx kabku. 30 Txã'wẽyçxáa yuuna Dxus Nçxi'k Nasa Yuusáa vxyaa entewa.

31 Txãa ente' ẽeyatte wáa u'psa yuuna, nawa sa'jçxa kĩhçxáanawa dxiiju kutxi'jwa'j ençxáa yuhwa ji'phumeena. Sa' maaíi yu' çxhab ekaju wáa u'ju yuuna, nawa yatna sxawedwa'j ençxáa yuhwa uymeena. 32 Lot nyuuwa ma'wẽga yuu txã'sna miiyajkxwe. 33 Txãa ente' maa nasawa naa kiwete ĩtxĩ fxi'zeniçxá's yaakxsa', Dxus yakh ĩtxĩ fxi'zewa'j yu'sa' ivxiituna. Nawa maawa naa kiwete ĩtxĩ fxi'zeni's yaakxsame', Dxus yakh ĩtxĩ fxi'zewa'ja's ji'phuna.

34 Na'jĩ'th na': Txãa kuste' teeçx kamaga e'z wáa dehna ũs yuutxna. Nawa teeçxsa's pehna u'jni yuuna, naapkaçxha' vxite yu' neeyũuna. 35 Txã'wẽy e'z u'y wáa kxteeçxah ũ'khna ũs yuutxna. Nawa teeçxsa's jxũna u'jni yuuna, naapkaçxha' vxite yu' neeyũuna. 36 Meeçxa' e'z piçthẽ'j wáa kxteeçxah mjĩina ũs yuutxna. Nawa teeçxsa's jxũna u'jni yuuna, naapkaçxha' vxite yu' neeyũuna jĩte', 37 Jesus yakh u'jusawe'sxa' na'wẽtx pẽjx:

—¿Mtee txã'wẽ yuukx? jĩtx. Aça' Jesus pasçxa':

—Kakwe kha'tx mkaa uuna ũstewa, mẽewẽjxa' ãate pkhaakhetxna jĩk.