1 Nyafxte' peeygãawa'ja's khuẽ'y wejx thaakwe mpa'pçxuwe. Txãa e'su mpaakwewe ma'wẽ selpiwa'ja'swa Dxus Espiritu ũsu'k txãatx. Nawa i'kwe'sxtxi Dxus we'weni's pta'sxya' ãjanisaçxáa wejx seelpisa'. 2 Txã'wẽme', maawa yuwe fxiysaju we'wesa' nasa yakhmée, Dxus yakhçxáa ne' we'we' jiyuwa'jmeesa's Dxus Espiritu kwe'we'jni, aça' kim yuhwa jiyu'çmeeta'. 3 Naapkaçxha' i'kwe'sxtxi Dxus we'weni's pta'sxsa', naa kiwete nasatx kaajiyu'ju'k Dxus yakh çxhãçxha fxi'zewa'ja's vxite' nxuste fxi'zeçtewa kvxiisxa'jna. 4 Yuwe fxiysaju we'wesa' peekíiçxáak Dxus yakh çxhãçxha fxi'zewa'ja's ya'jypa'ga'. Nawa Dxus we'weni's vxitetx pta'sxsa', Dxus luuçxtxi kçxhãaçxha'jsa'.

5 Yuwe fxiysaju we'weya' jxukaysa ãjawaça', wala yuh ewna sũju'th adxa'. Nawa Dxus we'weni's vxitetx ãate pta'sxya' ãjani'sthu wejx thaakwe jxthãasu'. Txã'wẽ yũunisaçxáa thaakwe ewsa'. Meeçxa' txã'wẽ yuwe fxiysaju we'wesa ũste', pukate vxite ãate kaajiyu'the yu' ew yuhna, txã'wẽ yu' Dxus luuçx jiyutxna Dxus yakh çxhãçxha fxi'zewa'ja's.

6 Yakhthẽ'jwe'sx, ũus miiyajkxwe: Adx pa'jçxa yuwe fxiysaju we'wete', i'kwe'sxa' ¿kĩhçxá' jiyuya' ãjama'kwe? txã'wẽ kwe'sx we'wenimée yuwejuçxáa we'wete'. Nawa Dxus we'weni's pta'sxiççxa', kwe'sx we'weni yuweju kaapiya'jna ãate kaajiyu'the yuuçxáa i'kwe'sxa' ew jiyune'kwe Dxus jxkaahnitx.

7 Na'wẽsatx miiyajkxwe: músika tukanisa kuvxy vxite' kxtala txãatx ma'wẽwa ksuusu'the', ya'jiyumeena mem ma'wẽsa's tukaçtewa. 8 Txã'wẽy gweçxate puiiya' u'jwa'ja's ew kaajiyu'jna korneta's ãate tujkameete', kim yuhwa jiyumeeçxa' pheu'jmeetxna puiiwa'ja's. 9 I'kwe'sx yakhwa txã'wẽyçxá'. Yuwe fxiysaju we'wete', ¿ma'wẽ ya'jiyukx kĩh we'weçtewa? Ya'jiyumeena aça' kxul yuh yuuna. 10 Isa naa kiwete' yuwe ma'wẽsawa ũsyuhta'. Nawa maa yuhwa txãawe'sx pwe'sx puutx we'weya' ãjanimeesa yu' meetxna. 11 Maawa adx yakh we'weççxa', adx we'weni yuwe jiyunisaju we'wemeete', txãa yakha' puutx we'weya' ãjame'nja nasa fxiysa na'wẽ. Aça' txãawa adx yakh puutx we'weya' ãjameena nasa fxiysa na'wẽ. 12 Txãa pa'ga i'kwe'sxa' nakwe wala kĩjxa'wa ãjawa'ja's pakwe'i'kwe na' Dxus luuçxtxi kçxhãaçxha'jwa'jsaçxá's mpaakwewe.

13 Txã'wẽ yã'the', yuwe fxiysajuçxáa we'wesa' Dxusa's mpi'kxwe txãa yuwe fxiysaju we'weni's nasatx ãate kaajiyu'jya' ãjaya'. 14 Txã'wẽ yuwe jiyunimeesaju Dxusa's orãyçxa', ũuste yu' Dxusa's yajkxna txã'wẽ ya'yuuna, nawa kĩh we'weçxawa txãa yu'sa' ya'jiyumeena. 15 Txã'wẽte', ¿ma'wẽ wejx ewki? Ũusteçxáa Dxusa's yajkxna txã'wẽ yũumée, kĩh we'weççxawa txã'snawa jii txã'wẽ yuuní wejx ewna. Meeçxawa Dxusa's yajkxna memuuççxa', txã'snawa yuwe jiyunisaju memwa'jna. 16 Idxa' txã'wẽ yuwe jiyunimeesajuçxáa Dxusa's weçxana tuuthe'jene'ga aça' nasa jiimeekwesa kxte ũssa' idx yakh ja'da Dxusa's weçxana tuuthe'jya' ãjameetxna, kĩh we'weçtewa jiyumeeçxa'. 17 Dxusa's weçxana orãyni' idx yakh yu' wala yuh ewna, nawa vxite yu'sa' selpiimeena. 18 Dxus pu'çxte adxa' vxite yuwe fxiysaju we'weya' i'kwe'sxte jxthaakwe jiith. 19 Nawa yuwe jiyunimeesaju wala jxu'j we'wena ũs na'wẽ', wejxwa Dxus luuçx ksxavxyte ũsçxa', yuwe jiyunisaju jxu'jmeekweçxáa kaapiya'jna we'wewaççxáa ewna sũju'th.

20 Yakhthẽ'jwe'sx, luuçx le'çxkuẽ na'wẽ yuuna fxi'zenuwe. Naasáa ewmée yũuwa'j yuuçxá's kĩh yuhwa yajkxmée mfxi'zewe luuçx le'çxkuẽ na'wẽ. Nawa jxpa'yakx fxi'zewa'j yu's thẽ'jsa na'wẽ ew yajkxna mfxi'zewe. 21 Yuwe fxiysaju we'weni' thaakwe selpiwa'jme's Dxus librute na'jĩ'k: Vxite ajũwe'sxtxi kwe'we'je'nja yuwe jiyunimeesaju naa nasatx pta'sxna. Nawa makwe txã'wẽ yũutewa, nwẽese'jmeetxna jĩ'k. 22 Txã'wẽ yuwe jiyunimeesaju we'wenisa' Dxusa's weeçxsawe'sx Dxus ũsyuhna sũhna kaayaki'jwa'jsaçxá', sa' Dxusa's jiiyã'jsawe'sx jĩi me'. Naapkaçxha' Dxus we'weni's pta'sxya' ãjanisa', Dxusa's jiisa ũstxna txãawe'sx jĩiçxá'. Dxusa's weeçxsawe'sx jĩi me'.

23 Txãa pa'ga Dxus luuçx jxukaysa pkhaakheçxa kxazíi yuwe fxiysa yakh susna ũste', maaíi yu' Dxus Espiritu kwe'we'jnitewa jiimeesa kũhçxa', luuku yuuna ũsta' ¿jĩmeema'k? 24 Nawa jxukaysa Dxus we'weni's ãate pta'sxna ũsune'kwe aça' maaíi yu' ekajuwe'sx kũhçxa ũssa' jiyuna txajx pkalte fxi'zena ũsni's, i'kwe'sx txã'wẽ Dxus we'weni's ãate pta'sxna ũspa'ga. 25 Txãa pa'gatey i'kwe'sx ãate we'weni' txajx ũus yaakxnitxi' kpaakitxna, aça' kĩiçhuçxa Dxusa's na'jĩna weçxaana: Dxusa' isa i'kwe'sx yakh yuh ũsu'ga jĩna.

26 Txã'wẽ yã'the', na'wẽ myũuwe yakhthẽ'jwe'sx: i'kwe'sx yakh pkhaakhena ũssa maaíi yu' Dxusa's weçxana memwa'j wáa ji'phtxna, vxite' kaapiya'jwa'j wáa ji'phtxna, meeçxawa Dxus we'weni's wáa kaajiyu'jwa'j ji'phtxna. Naapkaçxha' vxite' yuwe fxiysaju wáa Dxusa's weçxawa'j ji'phtxna, meeçxa' txãa yuwe fxiysaju we'weni's wáa ãate pta'sxwa'jsa ũstxna, aça' txã'wẽ yũutewa, ew yuhna Dxus luuçxtxi selpiwa'jsate yu'. 27 Yuwe fxiysaju we'weççxa', e'z meeçxa' tekh kxazçxáa we'wewa'ja' teeçx teeçxçxah. Nawa txãa yuwe fxiysaju we'wenisa's ãate kaajiyu'jwa'jsa ũsteçxáa txã'wẽ yũuwa'ja'. 28 Nawa ãate kaajiyu'jwa'jsa kimwa meete', yuwe fxiysaju kuçx we'wenuwe txãa pkhaakhenite. Kxãanpasa' yuwe fxiysaju Dxusa's weçxa wẽjeççxa', iidx ũusteçxáa weçxana mneeyũu. 29 Meeçxa' Dxus we'weni's pta'sxwa'j wáa yuuna nawa e'z tekh kxazçxáa mwe'wewe, naapkaçxha' wẽse'jna u'psa' jxpa'yakx wẽse'jetxna Dxus we'wenitewa jiyuya'. 30 Meeçxawa wẽse'jna u'psa's Dxus we'wewáana pta'sxkahn, aça' yaçte we'wesa jxã'jpkaçx ũythasçxa we'wewa'ja'. 31 Txã'wẽ Dxus we'weni's jxpa'gasa' jxukay pta'sxya' ãjane'kwe, nawa vxite we'wena jxã'jpkaçx ũythasçxa teeçx teeçxçxah. Txã'wẽ yũute', jxukaysa piyaçxa Dxus dxi'pte wejx çxhãçxha fxi'zene'kwe. 32 Txãa pa'gatey Dxus we'weni's jxpa'gasawe'sxa' txãawe'sx ũus yaakxni's jxpa'yakxwa'ja', ma'wẽwa ũusutheni's we'wemée. 33 Txã'wẽme', Dxusa' txã'wẽ kaypuba'jna susna ũswa'jsame'. Ma'wẽta Dxusa's yaakxsa msuuwe'sxwa susmée fxi'ze', txã'wẽy fxi'zewa'ja'.

34 U'ywe'sxa' pkhaakhena ũsni kultote' paapẽjxna susna ũswa'j ji'phmeeta'. Txã'wẽ yũumée, jxpa'yakx wẽse'jwa'j ji'phta' kulto ki'puçte', Dxus ley ma'wẽ jxkaathe' kxtey yuuna. 35 Kĩh paapẽywa'j ji'phçxa', yat-su pa'jçxa txãawe'sx nmi'tx pẽyitxna. Weh yuhwa ewme' u'ywe'sx txã'wẽ kultote susna ũste'.

36 I'kwe'sxa' iiwejçx yajkxna ma'wẽwa yuuwa'j ji'phmeei'kwe. Txã'wẽ yuukahmeníi Dxus yuwe' i'kwe'sx tasxu nyafxçxah kasehme', aça' i'kwe'sxçxáa Dxus yuwe's jiisa ũsmeei'kwe. 37 Na'wẽ we'wena fxi'jaçthu txã' Dxus jxkaahnita', aça' Dxus we'weni's jiyusa ũswá'kwe meeçxa' Dxus Espiritu kaaũusuthe'jni's jxpa'gasa ũsçxa', peekx mjiyuwe. 38 Nawa txã'wẽ jxkaahna fxi'jnitxi' kxtey nwẽese'jmeena aça' txãa nwẽese'jsame's jxpa'gameete ewna.

39 Yakhthẽ'jwe'sx, na'wẽ myũuwe: Dxus we'weni's ãate pta'sxwa'jçxá's wejx miiyajkxwe. Nawa yuwe fxiysaju we'weni's yup yu' meeçxawa, 40 kultote kĩhwa susmée zhiçxkwe teeçx teeçxçxah we'wena meswe.