1 Tsa mbin re fariseo lee dits Jesús ndeke masraa zha nake dits Juan, ne masraa zha nda ntsowleyy Jesús nake Juan. 2 Per tegal leet Jesús ntsowleyy re men, sinke re zha kuu ngeteed lo Jesús ntsowleyy re men. 3 Ne leettsa myeen Jesús kona, tsa mroo Jesús yezlyu Judea ne nda Jesús yezlyu Galilea tedib welt.

4 Per or nda Jesús, ndoblo rid Jesús yezlyu Samaria. 5 Tsa mzin Jesús thib yez chaan Samaria kuu le Sicar, ne gax tya nax thib le yu kuu mndaa Kob lo Che xgann Kob. 6 Ne tya ndob pos kuu ni re zha pos Kob. Ne tak ngokwan Jesús ndo Jesús net, tsa mneyy Jesús thib lad roo pos. Kona ngok teeka ndrol wiz. 7-8 Ne lee re zha kuu ngeteed lo Jesús, mlaa zha Jesús, ne nda re zha yez ndati zha kuu wu zha. Ne ora lee thib ngot kuu nak zha yez Samaria ngwaxii nit roo pos, tsa nzhab Jesús lo ngot:

―Taa lut nit gun.

9 Per lee re zha Israel nzaalt leettsoo kon re zha Samaria, kona lee ngota mkab, ne nzhab lo Jesús:

―¿Chebee lon naaba nit, si zha Samaria nakʼn ne lee lu nak zha Israel?

10 Lee Jesús mkab lo ngot ne nzhab:

―Os leeʼa nlebeeʼa kuu nataak kuu ndelaaz Diox, ne os neʼa naa cho nak zha kuu ngenaab nit loʼa, ne os lu naaba nit lo zha, lee zha taa nit kuu ndaa yalnaban guʼa.

11 Tsa lee ngot nzhab lo Jesús:

―Zha Nabee, per neeka thib kuu ndenta par kooʼa nit, ne lee pos kwathoz naats, ¿ne pa nkenoʼa nit kuu ndaa yalnaban kuu taaʼa gun? 12 Naa ¿chu masraa nataaka nake tey nee Kob? Lee zha mlaa pos ree lo nee, ne lee zha, re zhiinn zha ne re maa zha ngwii nit pos ree.

13 Ora mkab Jesús ne nzhab Jesús lo ngot:

―Reta zha kuu nzhuu nit pos ree, tebre tob xyeek leettsoo zha, 14 per lee zha kuu gu nit kuu tan, thitanax bret raa zha tob xyeek leettsoo zha, tak lee nit kuu tan gu zha, leettsoo zha gake taxal thib xlen nit, kuu ndaa yalnaban kuu thitanax.

15 Tsa lee ngot nzhab lo Jesús:

―Zha Nabee, taa nita gun, tsa tob xyeegt raa leettsoon, ne tsa yalt raa na yaadlon nit nzhee.

16 Ora nzhab Jesús lo ngot:

―Gwa gwaxii tsaala, tsaraa yaada nzhee.

17 Lee ngot mkab ne nzhab:

―Naptʼn tsaalʼn.

Tsa nzhab Jesús lo ngot:

―Wliʼa kuu neʼa, napta tsaala, 18 tak mkenoʼa lu gaay tsaala, ne lee zha kuu napa nal, nagt zha tsaala, wliʼa kuu neʼa.

19 Or mbin ngot kona, tsa nzhab ngot:

―Ndakʼn thib profet naka. 20 Lee re tey nee zha ndala mbil zha lo Diox yek yii ree, per lee re goo zha Israel mbez goo, yez Jerusalén nak ta ndoblo golaa lo Diox.

21 Tsa lee Jesús nzhab lo ngot:

―Wlipaa na nin loʼa, too wiz kuu ndechet raa yaad goo yek yii ree, neeka Jerusalén, par gol goo lo Diox. 22 Lee re goo net goo cho lo nzhool goo, per lee re nee ne nee cho lo nzhool nee, tak lo re zha Israel ndyaad yalnaban kuu thitanax. 23 Per mzina or, ne nal nak or kuu lee re zha kuu wlipaa nzhool lo Diox, gol zha lo Diox taxal nlaaz Mbi Nayon chaan Diox. Tak tata nlaaz Diox gol re men lo Diox. 24 Diox nak mbi, ne lee re zha kuu wlipaa nzhool lo Diox, taxal nlaaz Mbi Nayon, ndoblo gol zha lo Diox.

25 Tsa nzhab ngot lo Jesús:

―Nen tyaad Zha Kuu taal Diox Nabee (kuu nak Crist), ne leettsa yaad zha, tsa ne zha naa xomod nak reta kwaa lo nee.

26 Jesús nzhab lo ngot:

―¡Na nak zhaʼa, kuu ngetediz loʼa!

27 Ne ora mzin re zha kuu ngeteed lo Jesús, ne kwathoz mzegey leettsoo re zha, tak mwii zha lee Jesús ngetediz kon thib ngot, per neeka thib zha myet leettsoo ganaabdiz, kwan nlaaz ngot o cho kwent ngetediz Jesús kon ngot. 28 Tsa lee ngota mlaa ree, ne ngwane ngot lo re men yez, nzhab ngot:

29 ―Ndaa goo, tsa wii goo thib mbyi, kuu mne lon reta kuu mtsowʼn. ¿Naa chu nagt zha Crist Kuu Mtaal Diox Nabee?

30 Tsa mroo re zha ne ngwa zha ta ndo Jesús. 31 Ne lee re zha kuu ngeteed lo Jesús, nzhab lo Jesús:

―Maestr, dow lut kwaa.

32 Per lee Jesús nzhab lo re zha:

―Napʼn thib kwaa wun, per net goo kwane.

33 Tsa lee re zha kuu ngeteed lo Jesús mndelo zha mnaabdiz zha lo altaa zha, ne nzhab zha:

―¿Chu nzo cho myaadtaan kuu ndow zha?

34 Per lee Jesús nzhab lo re zha:

―Lee kuu nzhowʼn nak, ntsowʼn kuu nlaaz zha kuu mtaalʼn, ne kona nak taxal kuu nzhowʼn, ne wlipaa teyelo tsow nay. 35 Lee re goo mbez: “Bee nzhak falt thap mbee par thop zha yalgonn”, per lee na ni lo re goo, wii goo, ngoka yalgonn ne mzina wiz thop zhay. 36 Lee zha kuu nke tsiin par thop yalgonn, nzhax lo zha, ne lee yalgonn kuu nthop zha, nak kuu xek thitanax, tsa lee zha kuu mloo bin, ne zha kuu mthop yalgonn kwathoz naley nzo leettsoo rop zha. 37 Wli kuu nzhab diiz: “Thib zha ngo bin lo yu ne lee tedib zha nthop yalgonn”. 38 Na mtaal goo thop goo yalgonn kuu ngonnt goo, tedib net zha nak zha kuu ngonne ne mtembiy, per lee re goo thope ne kayaay.

39 Kwathoz zha yez Sicar kuu nzi yezlyu Samaria ngwalaaz Jesús, tak lee ngota nzhab lo re zha: “Mne zha reta kuu mtsowʼn”. 40 Ne or lee re zha yez Samaria mzin, tsa nzhab zha lo Jesús, kwet Jesús lo re zha. Tsa mlet Jesús lo re zha chop wiz, 41 ne naroob raa zha ngwalaaz Jesús por re kuu nzhab Jesús. 42 Ne nzhab re zha lo ngot:

―Nagt beeta por kuu neʼa lo nee, tsa nyelaaz nee Jesús, sinke mbina nee kuu ne Jesús, ne kona ne nee wlipaa lee Jesús nak zha kuu ntelaa re men lo yalguth ne ndaa yalnaban lo re men.

43 Leettsa ndaʼa chop wiz, tsa lee Jesús mroo ndya par yezlyu Galilea. 44 Ne leeka Jesús nzhab lo re men, nzhont re men diiz lo thib zha kuu nak profet, leettsa tawlazka zha nak Profet. 45 Per leettsa mzin Jesús Galilea, wen mkayaa re zha Jesús tya, tak ngwa re zha lo ani Paskw yez Jerusalén, ne mwii zha re kuu mtsow Jesús tya.

46 Jesús mre ngwa yez Caná kuu nzi yezlyu Galilea, ta mtsow Jesús mreyal nit xit ub. Ne tya mzaal Jesús thib zha kuu nataak kuu nke tsiin lo rey, ne lee xgann zhaʼa ne ndak nzo yez Capernaúm. 47 Or lee zha kuu nataak lo rey mbin lee Jesús mzin yezlyu Galilea, tsa ngwa zha lo Jesús ne mnaab zha lo Jesús, ya Jesús liz zha, yategwe Jesús xgann zha kuu mer gath. 48 Tsa nzhab Jesús lo zha:

―Os leen tsowtʼn thib re milagr thoz lo goo, yelaazt goo na.

49 Per lee zhaʼa nzhab lo Jesús:

―Zha Nabee, lijer ndaa tak cha gath xgann na.

50 Tsa lee Jesús nzhab lo zha:

―Tyee liza, ¡mgweʼa xganna, naban xganna!

Tsa lee zhaʼa ngwalaaz kuu nzhab Jesús ne ndya zha liz zha. 51 Ne or ndo zha net ndya zha liz zha, lee re mos zha ngwaxii net zha, ne nzhab lo zha:

―¡Mgweʼa xganna!

52 Tsa mnaabdiz zha lo re mos zha, polor mndelo ngoo wen leettsoo xgann zha, tsa lee re mos mkab ne nzhab:

―Naaʼa a la una mroo xlee xganna.

53 Tsa lee xut ndeʼa mtelaaz, leeka ora nzhab Jesús lo zha “naban xganna”. Tsa re lizta zhaʼa ngwalaaz Jesús.

54 Ne koree ngok mrop milagr kuu mtsow Jesús, leettsa mroo Jesús Judea ne ndyaad Jesús par Galilea.