1 Ne leettsa ndaʼa tson wiz, tsa ngoo thib fandan yez Caná, yez kuu nzi yezlyu Galilea. Ne tya ndo xnaa Jesús, 2 ne noga mrez zha Jesús kon re zha kuu ngeteed lo Jesús, tsa ya re zha lo fandan. 3 Per leettsa mbiz xit ub, tsa nzhab xnaa Jesús lo Jesús:

―Nkenot raa zha ree xit ub.

4 Tsa lee Jesús mkab ne nzhab:

―¿Chebee lon mbeza koree? Bee ter tsin or kuu leen tsow koree.

5 Per lee xnaa Jesús nzhab lo re zha kuu ngeyiid xit ub:

―Btsow goo reta kuu ne zha lo goo.

6 Ne tya nzi xoop ree ke, kuu nlortsin re zha Israel par nyoo nit kuu na zha, tsa nzhak nambi zha lo Diox ley lo zha. Ne kadta thib re reeʼa nyoo teeka thap gal o thib gayoo litr nit. 7 Tsa nzhab Jesús lo re zha kuu ntsow tsiin tya:

―Btse goo re ree baa bloo goo nit.

Ne mtse zhay mloo zha nit. 8 Tsa nzhab Jesús lo re zha:

―Bloo goo lutte, ne be gooy lo zha kuu nabee lo goo.

Ne tata mtsow zha. 9 Ne lee zha kuu nabee lo re zha mtsow preb nit kuu mreyal xit ub, per neeka net zha pa mrooy, beeta re zha kuu ntsow tsiin ne pa mrooy, tak re zha mtse re ree. Ne lee zha kuu nabee lo re zha mrez mbyi kuu mtseyaʼa, 10 ne nzhab zha lo mbyi:

―Reta zha, ner ndaa zha xit ub kuu mas wen, ne or lee re zha kuu mrez zha yaad lo ani ngwiiʼa zha naroobe, tsaraa ndaa zha xit ub kuu rax. Per lee lu mlotsowa xit ub kuu wen par kiida bluz.

11 Koree mtsow Jesús yez Caná kuu nzi yezlyu Galilea, ne koree nak thib re kuu thoz, kuu ner mtsow Jesús, tenzhee mloo Jesús yalnabee chaan Jesús, tsa lee re zha kuu ngeteed lo Jesús ngwalaaz zha Jesús.

12 Leettsa ngwalo mriid koree, tsa ngwa Jesús yez Capernaúm kon xnaa Jesús, kon re wets Jesús ne kon re zha kuu ngeteed lo Jesús, ne mlet re zha tya chop tsonta wiz.

13 Ne tsya ndetsin gaxa ani Paskw chaan re zha Israel, tsa ngwa Jesús yez Jerusalén. 14 Ne mndaab Jesús roo gwodoo naro Jerusalén, ne mwii Jesús re zha kuu ntho ngon, re zha kuu ntho mbak zhiil, re zha kuu ntho palom, ne re zha kuu ndob ntsiil temi lo re men. 15 Ne or mwii Jesús re zha, tsa mzhen Jesús chop tson doo bzhizh ne mdexkwaa Jesús thib bins, ne kon binsa mloo Jesús re zha lee gwodoo kon re mbak zhiil zha ne kon re ngon zha. Ne mchaats Jesús re temi re zha kuu ntsiil temi, ne mlobi Jesús re mes chaan re zhaʼa. 16 Ne nzhab Jesús lo re zha kuu ntho palom:

―¡Nalorka bloo goo re maa goo nzhee! ¡Tsowt goo xbi leen liz Xutʼn Diox!

17 Tsa lee re zha kuu ngeteed lo Jesús mtelaaz xkiiz Diox ta nzhab: “Nkezhyan na por re kuu ntsow zha leen liza”. [Sal. 69:9]

18 Tsa lee re zha Israel mnaabdiz lo Jesús ne nzhab:

―¿Kwan thib kuu looʼa lo nee, tsa ne nee leeʼa mtsow re koree kon yalnabee chaan Diox?

19 Jesús mkab lo re zha ne nzhab:

―Bluux goo gwodoo ree, ne lee na tsonka wiz taa nay tedib welt.

20 Tsa lee re zha Israel nzhab lo Jesús:

―Chop galbxoop liin mta zha gwodoo naro ree, ¿ne lee lu tsonka wiz taa luy?

21 Per gwodoo kuu mteth Jesús lo re zha nak kwerp Jesús. 22 Kona leettsa mroban Jesús xid re zha nguth, tsa lee re zha kuu ngeteed lo Jesús mtelaaz kuu nzhab Jesús, ne ngwalaaz zha re kuu nzhab lo xkiiz Diox ne re kuu nzhab Jesús, nak kuu wli.

23 Leettsa bee ndo Jesús lo ani Paskw yez Jerusalén, kwaro zha ngwalaaz Jesús, tak mwii zha mtsow Jesús re kuu thoz lo re men. 24 Per nyelaazt Jesús kuu mbez re men, tak nlebee Jesús reta men. 25 Ne ndechet Jesús naa cho taa kwent lo Jesús naa xa nak re men, tak lee Jesús nlebee leettsoo reta men.