Kayëta ixinëm ir Timote in
Lilaya in
Akayëta aŋo ex akinëm and ỹëgwën baŋo Pol Timote aŋ. Epela el dëŋ baŋo feland mondako gayikwa anang nang baxo mëne ecës el ɗam ex. Pol axwitan xwitan baŋo mëne ɓër fana këɓi Kaxanu eni pemërand Atëfëtan and Yesu ɓën ani kor na eni dind andiyen aŋo xarak aɓi cëmura ex na. Mëŋ baŋo felaxënënd Timote exo kapina ang ŝoroɗa fo. Ɓarikan eɓi kwëỹëtand ɓër w̃ër këɓi ecampëre, gë ɓatakëra, do gë ɓër kë ƴepënënd ekwëta ɓën.
Er ex gër akayëta in:
End ɓapela ɓand yël ɓaŋo Timote eŋ: 1.1–2.26.
End ekapina do gë emëlaya ed ekwëta xali gër eŋata eŋ: 3.1–4.8.
Ɓepelatar ɓeŋ do gë ofelar ol: 4.9-22.
1
Ecëmar el
1 Wëno Pol, parëxanda ir Yesu Kërisët hi këme ang ỹandi këŋo Kaxanu ak. Mëŋ fana ke me tëfëtërand end aniyan and ɓeƴa baxo ayël këɓo yël paɓ gë Kërisët eŋ. 2 Wëj Timote këmi ỹëgwënëlind, wëj ar ex asëñiw̃ën ar pëlot gër yomb iram an. Awa Faba Kaxanu do gë Yesu Kërisët, Axwën areɓi an, yëlëleni oyekax ol, gë axaỹënan in do gë oɓetak ol.
End ecëkwa do gë ekemën eŋ
3 Aŝëkwa këmo ŝëkwand Kaxanu, mëŋ ar këmo riyenind ang bano riyeninënd ɓëxarëk ɓëram ak* 1.3 Ɓëxarëk ɓër Pol ɓën Ɓëŝëwif ɓër bax sëfënd aye end Kaxanu hi bani ang rek gër kayëta ir Ɓëfilip 3.4-5 ak.. Aŝale këmo ŝalend gë onden onjekax, do nand këme ŝalerand yo, hik gëmëɗ, hik goyat, wëj aŝalen këmi ŝalenënd. 4 Mokofi xofi ke do aỹandi ỹandi ke mi watëdo exe nëngandëraxën, ga këme xwitand ang ŝar baxi ongwën and baxe felarënde ak. 5 Axwita këme xwitand ɓëte ekwëta ed ɗal ed xwëta këƴo Kërisët el. Ekwëta elo gër Loyis, ejix isoxari ỹanawëk, ɓëtaxënëk gër norix Enis. Do aye nang këme wëj ɓëte aŝot ŝot këƴ ekwëta elo. 6 Mëŋ ex, kemënalil anjëla and yël ki Kaxanu and ŝalen këmi mokwëtan otaxan aŋ. Këreƴ ɗangangan na këdi kë riw̃a. 7 Enimin angoc and yël këɓo Kaxanu aŋ, and gë ojaw̃, and gë aŋana, do and gë orenik exo, axo gi ex na angoc and gë anjiỹ. 8 Mal eƴ torond në end Atëfëtan and Yesu eŋ ang këme sorond wëno ak. Deƴarayind osede or Axwën areɓi ol, kërexi cëfënanënd na. Ɓëte kërexi cëfënandërand na endam eŋ, wëno andepëra andexëm aŋ. Ɓarikan toroye në end Atëfëtan eŋ gë panga ind Kaxanu iŋ.
9 Kaxanu, gë panga iŋo fexën këɓo
do w̃aceli këɓo ow̃ënëk ol,
xarak ax gi ex na ɗe ga ri këne ɓenjekax,
ɓarikan ga fëna baxo exo di mondako
në end oyekax or yël këɓo paɓ gë Yesu Kërisët eŋ,
ɗamana exo dixën ngwën iŋ.
10 Oyekax olo ŝanayak gërëgako
and ŝanayaw ko Yesu Kërisët, Afexën areɓi aŋ.
Mëŋ rëxëtëk panga ind ecës iŋ
do nëcëtënëgu këɓo angoɓen and aniyan aŋ,
aniyan and gë ecës këm aŋ,
aniyan and këɓo nangënënd Atëfëtan aŋ.
11 Gë Atëfëtan aŋo hi këme afemëra, parëxanda, do asëƴali. 12 Ɓëte gër andiyen aŋo ɓuŋa këme toro ind këme sorond iŋ, ɓari axe cëfënand na. Gayikwa aye nang këme noỹo ex ar xwëta këmo an, do mopëni fëni ke mëne axor ko xor exo kaxa er xwëtënan ke in, xali yatir akey apelatar.
13 Mëlayal eyeƴan emënëk ed wëleli këƴe elo, gilex eyeƴan ed këƴ sëf asëf gë ekwëta ed xwëta këƴo Yesu Kërisët el do gë aŋana and hik gër ndexëm aŋ. 14 Kwëtayal gër emëkw edeƴ ɓenjekax ɓend xwëtënan ki Kaxanu paɓ gë Angoc Amënëk and lëgëk gër ola oreɓi aŋ.
End Onesifor do gë ekun edexëm eŋ
15 Timote, anang nang këƴ mëne ɗek ɓër gër ebar ed Asi ɓën ŝapëran ke, ado Fiŝel do gë Erëmoŝen dëŋ gër enga eŋo exëni. 16 Axwën Yesu mëlayaleɓi gë axaỹënan Onesifor do gë ekun edexëm el gayik mëŋ laŋ baxe felënd me kemëna. Ado ga hi këme andepëra, abaŋo ŝëfënan na endam eŋ. 17 Ecëñëxët and ƴow ko ro gër Rom aŋ, aŝalara ŝalara ke gë oɓal osëm xali wat ke. 18 Awa Axwën Yesu mëlayaleŋo gë axaỹënan ir Axwën Kaxanu in, xali yatir akey apelatar. Wëj dëŋ anang nang këƴ nëmëc ɓela ɗek ang rëcara ke gër Efes ak.
*1:3 1.3 Ɓëxarëk ɓër Pol ɓën Ɓëŝëwif ɓër bax sëfënd aye end Kaxanu hi bani ang rek gër kayëta ir Ɓëfilip 3.4-5 ak.